G20 TOPLANTISININ “OTELLO”ları

	05 fevral 2012


Onlayn ictimai-siyasi qəzet

Sevinc TELMANQIZI

G20 TOPLANTISININ “OTELLO”ları

Allah heç qoymasa, dünyanın taleyini həll etməyə yığışmışdılar. Yeni sazişlər imzalayacaq, qərarlar verəcək, bəşəriyyətə yeni yön verəcəkdilər. Amma bunların dərd-sərinə bax, sən canın. Qosqoca ölkələrin qosqoca prezidentləri özlərini “palatka toyları"ndakı kimi aparıblar. Biri o birinin arvadını öpüb, bir başqası şit-şit “səni çoxdan görmürəm, gəl ərinlə birgə mənimlə şəkil çəkdirək” deyib, üçüncüsü isə “bu dəqiqə sizi yortaram” ədasıyla prezident həmkarını əyri-əyri süzüb. Sanki adamlar ora maliyyə böhranından çıxış yolu axtarmağa yox, “Aşk-ı-Məmnu” serialı çəkməyə gediblərmiş.

ABŞ-ın Pittsburq şəhərində keçirlən G-20 zirvə toplantısından danışıram. Yəqin, xəbərləri oxuyub, toplantıdan çəkilən fotoları seyr etmisiniz. Qoy baş verənlərin özətini deyib, sizi intizarda saxlamayım: deməli, ABŞ prezidenti Barak Hüseyn Obama Fransa prezidenti Nikola Sarkozinin xanımı Karla Brunini düz dörd dəfə öpüb. Hüseyn Karlaya “səni bir daha görmək şansım olmayacaq” deyərək onunla çox isti görüşüb. Bundan xoşhal olduğunu deyən Karla sonrası gün qəzetlərdə görüşdən bəhs edən şəkillərə baxanda Mişel Obamanın Barak Obama ilə öpüşən Karlaya qəzəblə baxdığını görüb. Daha sonra Obama xanımını adı daim arvadbazlıqda hallanan İtaliyanın baş naziri Silvio Berluskoniyə qısqanıb. Belə ki, Obama cütlüyü Silvionu qəbul edərkən, baş nazir Mişel Obamaya xeyli kompliment deyib. Bu dəfə Obama qəzəblənib. İngiltərənin baş naziri Qordon Braunun da görüşərkən Mişeli öpməsi müsəlman əsilli prezidentin əsəblərinə toxunub. Özünü ələ almağa çalışan prezident bu dəfə də Rusiyanın birinci ledisi Svetlana Medvedyevaya “gəlin şəkil çəkdirək, axı bizim birlikdə çox da şəklimiz yoxdur” deyib.
Necədi sizinçün? Burda siyasətin qırıntısını tapa bildiniz? Dediyim kimi, serial dadında keçən bu toplantının ana xətti qısqanclıq olub və bizim kimi sıravi Fatma-Tükəzbanlara, eləcə də Əli-Vəlilərə mesaj verilib ki, narahat olmayın, yerindən-statusundan asılı olmayaraq dünyadakı bütün qadın-kişilər bir-birinin “kopya”sıdı. Onlar okeanın o tayında yaşaya, əyinlərinə milyon dollar dəyəri olan qiyafələr geyinə, dünyanın nəzərlərini üzərlərinə cəmləşdirə bilərlər. Amma hamısını eyni, çoxlarına görə cılız olan qısqanclıq hissi idarə edir. Elimizin məşhur “qaçqın olanda nə olar, tank sürməlidir” məsəlini improvizə etsək, prezident və ya birinci ledi olanda nə olar? İnsan hər yerdə insan deyilmi?
Hələ çox-çox əvvəl qısqanclıqdan bəhs edən köşə yazıb, öz aləmimdə fərqli görünmək istəmişdim. Yadımdadır, həmin vaxt dost-tanış, “yaxından-uzaqdan gələn” qohum-əqrəbalar abrımı ətəyimə bükdülər ki, bəs bu ibtidai hissi niyə təbliğ edirəm, qısqanclıq insanın vəhşiliyi, hətta günahı, nə bilim, içinə şeytanın girməsiymiş.(Di gedin, gücünüz elə mənə çatırdı? Qoçaqsınız, prezident arvadlarına dodaq büzün) Düzü, bu mövzuda dissertasiya-zad müdafiə edəcək səviyyədə təcrübə sahibi deyiləm. Amma bildiyim və tez-tez təkrarladığım bir həqiqət var: münasibətlərə bu hissin “bir qaşıq”(çay, xörək qaşığı və ya çömçə - seçim sizə aid-S.T) əlavə edilıməsində ziyan yoxdu. Şit, dadsız-duzsuz yemək ancaq dieta saxlayanların, bir də bəlli xəstəlikləri olanların menyusuna daxildir.
Bir-birini qısqanmayan cütlüklərin münasibətlərinə çoxdan fatihə oxunub, halvalarını da yeyiblər, Elşad Xosenin sözü olmasın, sevgilərinin cümə axşamı verilib, yeddisi, qırxı da çoxdan çıxıb. Yəni tam mükəlləfiyyətə dönüb ilişgilər. Günlük dialoqlar da “bu axşam televizorda nə var?”, “payız gəldi, yenə qrip olacam” tipdə olur. Və ya sərhədsiz özünəgüvən var ortada: “onsuz da açanda əlimdə, yumanda ovcumdadır”. Bu nə vaxtdan sevgi əlaməti sayıla bilər?
İnsan ki sevdiyinin telefonuna gələn sms-lərin “bip” səslərinə qulaq kəsilmədi, telefon danışıqlarını gizli-gizli izləmədi, detektiv həssaslığı ilə onun geyimini, saç düzümünü necə dəyişdirdiyini təqib etmədi, gediş-gəliş saatlarının monitorinqini aparmadı, onda apar qaytar o münasibəti. Belə məsələlərdə paylaşmağın yersiz tolerantlıq olduğunu düşünürəm. Bəlkə də elə buna görə “qadının qadından başqa düşməni yoxdur” deyib müdriklər. Qoy bir ağıllı söz də deyim: məncə, hətta mobil operatorlarda da “bu nömrəyə zəng çatmır, telefon ya söndürülüb, ya da əhatə dairəsi xaricindədir” anonsunu bir qadının səsləndirməsi təsadüf deyil. Çünki bu anons daha çox qadınları təbdən çıxarır və onların təkrar-təkrar qarşı tərəfə zəng etməsinə, sms yollamasına səbəb olur. İş adamları da bir növ psixoloqdu, insanların zəif yerlərini tapıb, ordan pul qazanırlar. (Hələ çox şey yazardım, amma mənə ayrılan yer bu qədər.)
Bir sözlə, “föst” ledi bajılar, dünya qadınları sizinlə qürur duyur. Sükanı belə saxlayın. Lazım gəlsə, saçyoldusu da məqbuldu. Təki sizin olan sizin qalsın...

1154 dəfə baxılıb