DAHA MƏNİ GÖZLƏMƏ...

	03 sentyabr 2010


Onlayn ictimai-siyasi qəzet

Sevinc TELMANQIZI

DAHA MƏNİ GÖZLƏMƏ...

Son bir neçə gündə paytaxtın avtobus sərnişinləri, “Bəyin oğurlanması”nın Mirişi kimi küçənin o başı sənin, bu başı mənim qaçmağa girişiblər. Yolda rastlaşdıqları tanış-tunuşla da aralarında təxminən “Hara? Oooooraaaaa!” dialoqu yaşanır.

Neyçün ki, Nəqliyyat Nazirliyinin müfəttişləri sürücüləri basıb döyməkdən yorulandan sonra indi də sərnişinlərin canına daraşıblar. Avtobusların dayanacaqdan kənar saxlanmasına qoyulan qadağa küçələrdə ilginc insan mənzərələrinə səbəb olub. Yazıq camaat bilmir ki, hansı dayanacaq harada yerləşir, filan avtobusu gözləmək üçün şair demiş hangi səmtə, hangi yana üz tutsun. Yəni bir var şüşəli-oturacaqlı, qanuni dayanacaq, bir də var, yersiz-yurdsuz olanlar. Birincini tapmaq çətin deyil, azar yersiz-yurdsuzun azarıdır. Onu tapınca piyadanın nəfəsi kəsilir. Və dediyim o mənzərə yaşanır.
Məsələn, sən illərdir dayanacaq kimi tanıdığın məkanda dayanıb, öz “halalca” avtobusunu gözləyirsən, bu vaxt Nəqliyyat Nazirliyinin qəstumlu-bazburutlu müfəttişi gəlir ki, a bala, hansı avtobusa minəssən? Başqa vaxt olsa, adam qayıdar ki, sənə nə? Amma gözünün qabağına bir neçə müfəttişin bir sürücünü vəhşicəsinə döydüyü videorolik gəlir, udqunub cavab verirsən. Dərd orasıdır ki, gözlədiyin avtobusun dayanacağı başqa yerdə olsun və nazirlik nümayəndəsinə bunu deyən vaxt o dördtəkərli “möcüzə” sənə tərəf yaxınlaşsın. Müfəttiş bir gözünü sənə, o birini isə avtobusun içindən məlul-məlul sənə baxan sürücüyə (əslində sürücü sərnişinə potensial 20 qəpik gözü ilə baxdığı üçün həmin anda onun necə “cingildədiyini” də duyur-S.T.) ağardacaq və yuxarıda dediyim kimi, sən avtobusun dalınca mirişsayağı qaçmaq zorunda qalacaqsan...
Bəlkə də çoxlarına görə, avtobusların dayanacaqdan kənar saxlanmasına qoyulan qadağa çox sivildir, nəqliyyatdakı xaosu azalda bilər və sair... Razıyam. Sürücülərin hətta başını qaşımaq üçün əlini qaldıranlara qosqoca minik vasitəsini yolun ortasında saxlaması heç də xoş mənzərə deyil. Amma baxır hansı məmləkətdən danışırıq... Təxminən “düzəlmişdi hər yarağımız, qalmışdı saqqal darağımız” misalındakı kimi. Nazirlik şanlı dayanacaqlara gəlib çatana qədər onlarla eybini örtsə daha yaxşı olmazmı? Dayanacaqlarda lövbər salan taksilər, yol tikintisi-yamanmasından yeyilən pullar, avtobus sürücülərinə qoyulan yerli-yersiz “taksa”lar... Vallah, siyahı uzundur, hamısını yazsam, deyəcəklər mən də nazirlik kimi “xaltura” edirəm. Sözüm o ki, onsuz da tıxac probleminin həlli, eləcə də yollardakı qayda-qanun avtobusların dayanacaqdan kənarda saxlamasından keçmir. Yəni Fatıya bundan tuman çıxası deyil. Yaxşısı budu, nazirlik öncə böyük problemləri həll edib, insanların əsəbləri ilə oynamağı sonraya saxlasın.
Əsəb demiş, yadıma bir süjet düşdü. O gün məhz bu dayanacaqdan kənarda saxlama qadağasına görə getdiyimiz avtobusda bir qadın sərnişinlə davakarlıqda ad çıxarmış marşrut sürücüsü dalaşdı. “Düütlü” söyüşlərin biri beş qəpikdən... Axırda sürücü hamımızı təhdid etdi ki, ya o qadını susdurun, ya da maşını aşıracam (ucuz ölüm belə olurmuş sən demə). Nəhayət, dözməyib, avtobusu saxladı, qadının üstünə cumaraq bəyan etdi ki, gedib türmədə 10 il yatmaq da olsa, onu öldürəcək. Nəsə, dayını birtəhər sakitləşdirdilər, yola düzəldik. Amma sonda Polat Alemdarsayağı bir kəlam söylədi ki, hələ də yadımdan çıxmır: “Bu ”ostanovka söhbəti" çox qanlar axıdacaq, çooooxxx".
Bax, ona görə deyirəm ki, sizə bu lazım idi? Bu günə qədər hamı azərbaycançılığına salıb yaşayırdı da. “Qardaş, qabaqda saxla”, “Buyur, amma cəld ol”. Kim kimi öldürüb 10 il türməni gözə alırdı ki? Əsəbləri tarıma çəkilmiş kasıb təbəqəni yenidən sınağa çəkməyin nə adı var? Axı hamımız bilirik ki, Nəqliyyat Nazirliyinin bir atımlıq barıta bənzəyən belə səmərəsiz aksiyaları tez-tez baş tutur. Ayaq üstə sərnişin aparma qadağası, sürücülərin vahid geyimdə işə çıxması.... Hamısı pulyığma əməliyyatı üçün super bəhanələr olub. Amma budəfəkindən sürücü dayı demiş, həm də əməllicə qan iyi gəlir...
Onsuz da bu dəqiqə məmləkət insanını elə günə qoyublar ki, hara, niyə getdiyinin fərqində deyil. Aşıq Veysəlin mahnısındakı kimi, gündüz-gecə yol getməklə məşğuldu. Heç olmasa, icazə verin, dayanacağı yeri özü müəyyənləşdirsin. Axı deyirlər, yol gedənindir.
P.S. O gün oxudum ki, Nəqliyyat Nazirliyi sərnişindaşıma ilə məşğul olan hər bir nəqliyyat vasitəsinin dərman qutusu, odsöndürən, diyirlənməyə qarşı dayaqlar... la təchiz olunmasını tələb edir. Siyahıya bax ey, adamın canına üşütmə düşür. Sürücü demiş, bu işdən qan iyi gəlir. Mən ölü, siz diri, görərsiniz...
P.P.S. İndi bildiniz, avtobusun arxa şüşələrinə niyə kifayət qədər duyğusal təsir bağışlayan “Daha məni gözləmə”, “Arxamca baxma” sözləri yazılıb?

540 dəfə baxılıb