MANIS - CÜMLƏ XƏYANƏTLƏRƏ BAİS

	03 sentyabr 2010


Onlayn ictimai-siyasi qəzet

Sevinc TELMANQIZI

MANIS - CÜMLƏ XƏYANƏTLƏRƏ BAİS?

Yatsam yuxuma da girməzdi ki, nə vaxtsa manıs tayfasını müdafiə etmək üçün klaviatura döyəcləyəcəm. Amma çox yekə danışmamaq lazımmış bu həyatda. Milli Teleradio Şurasının üzü qara olsun, elə xoruz səsi eşitməmiş açıqlamalar verdi ki, bilmədik gülək, ya ağlayaq. Ağlamalı hissəyə keçəcəyəm.

Hələliksə onu deyim ki, Prezident Administrasiyasının rəhbəri Ramiz Mehdiyevin telekanallarla bağlı məqaləsinin kolxozsayağı, öhdəlik, qırmızı bayraq yarışı kimi hər yerdə müzakirəsi artıq adamı çimçəşdirir. Məqalənin içindəki az-çox haqlı məqamlar da bu səbəbdən artıq mənasız görünməyə başlayıb. Hərə yuxarılara daha xoş görünmək üçün əcaib-qəraib tezislər irəli sürür, məşhur tamaşadakı kimi “bolshe zəhrimara” təklifləri verir.
Məsələn, srağagün bunlara MTRŞ sədri Nuşirəvan Məhərrəmi birini də əlavə etdi. Dedi ki, efirdəki bəzi aparıcı müğənnilərin geyimi, davranışına nəzarət olunacaq. Bundan başqa, onların efirdə dedikləri yalanlara görə hüquq-mühafizə orqanların müraciət edilməli və nəticədə cəza tətbiq olunmalıdır.
Elə burada dayanaq lütfən. Birincisi, özlərinin bəyənib, camaata sırıdıqları manıscıqların birdən gözlərinə cin-şeytan kimi görünməsinin səbəbi hələ də mənim kimi çoxlarına qaranlıqdır. İkincisi, onları cümlə xəyanətlərə bais kimi göstərmələri də səmimiyyətdən xəbər vermir. Qardaşım, bunlar pis idisə, niyə ad, təqaüd, mənzil verir, təbliğat konsertlərinizə çıxarır, ömründə 2 kitab arası açmayanları YAP-ın rayon təşkilatlarına üzv, nə bilim, Qadınlar, Gənclər Şurasına sədr seçirdiniz? Bu bədbəxtlər neylədilər ki, birdən qara siyahıya düşdülər? Dediniz “soyun, camaatın fikrini dağıt” - elədilər. “Bəsitlik səp ətrafa” - əmrinizə də səs çıxarmadılar. Milləti kitabdan-mütaliədən, intellektual həyatdan soyutmağı başardılar. Nə yalan danışdılar? Hansısa biri “sevgilim yoxdur, özüm də qız uşağıyam” dediyinə, yoxsa uşağının atasını gizlətdiyinə görə böyük yalan danışmış oldu? Bu yalandan mənə, sənə, ona nə? Cəhənnəmə danışsın...
Sən öz hakimiyyətinin məmurları tərəfindən gündə camaatın qulağına üfürülən yalandan danış. Daman, kələ-kötür körpüləri güzgü kimi təqdim edənləri, iqtisadiyyatın saatbaşı inkişafından, yeni iş yerlərinin açılmasından, insanların firavan yaşayışından danışanları... cəzalandır qoçaqsansa. O yalana görə məhkəməyə müraciət etməyə cəsarətin çatacaqmı? Yox. Onda bu binəvalardan nə istəyirsən? Lap tutaq ki, Aygün Kazımova bundan sonra efirə kəlağayı ilə çıxacaq, Rəqsanə uşaqlarının atası ilə bağlı DNK testinin nəticələrini tamaşaçılara təqdim edəcək. Bununla həll olunacaqmı problemlərimiz? Bununla cəmiyyətdəki ümumi abırsızlığımız örtüləcəkmi? Aygünün dekoltesinin dərinliyi, razrezinin uzunluğu ilə müəyyənləşmir cəmiyyətin əxlaqı. Ora gələnə qədər o qədər örtüləsi ayıblarımız var ki. Özü də kim tutacaq ey bu yalanları? “Kor kora kor deməsə bağrı çartlayar” misalındakı kimi... Böyük yalançılar balaca yalançıları cəzalandıracaq, hə?
MİRŞ-ın birdən-birə bu qədər doğruçu olması da adamın gözünü yaşardır. Sədr açıqlamasında deyir ki, saat 23.00-ə qədər efirdə ədəbsiz ifadələrin, söyüşlərin (məncə, bura yalan da aiddir)... işlədilməsi yolverilməzdir. Niyə məhz bu saata qədər? Belə çıxır ki, sözügedən saata qədər ekran qarşısında oturanlar abırlı-ismətli insanlar olur, ondan sonrakı tamaşaçılara isə nə gəldi demək olar? Canları çıxsın, niyə bu saatadək oyaqdılar, eləmi? Adama deyərlər, axı həmin saata qədər də iqtidar telekanalları, məmurlar efirdən müxalifətin (2003-cü ildə efirdən camaata “quduzlaşmış kütlə” deyən kanal vardı, yadınıza düşdü?), müxalifət qəzetlərinin ünvanına ədəbsiz ifadə səsləndirir, bəzən söyüşə yol verirlər. Nə oldu, birdən gözünüzə Röyanın “biiipli” söyüşləri xoş görünmədi? Aygünlər, röyalar, rəqsanələr səbəb yox, nəticədir.
Yenə də deyirəm, bu, yarımmüdafiə yazısıdır. Bu manıscıqların nə yuvanın quşu olduğunu hamı bilir. Onlar özləri də bilirlər ki, var-dövlətləri, cah-cəlallı yaşayışları itirdikləri hansı dəyərlərin hesabınadır. İlk gündən gözləyirdilər ki, günlərin bir günü birdəfəlik şpris kimi kənara atılacaqlar. Bu taleyi göz önünə almışdılar. Sadəcə, geci-tezi vardı.
Sadə camaatı isə bəzilərinin ikili standartları, yalanları ağrıdır. Nuşirəvan müəllim, öz-özünüzü cəzalandırmaqdan başlaya biləcəksinizmi?

532 dəfə baxılıb