İŞLƏR YAĞ KİMİ GETMƏYƏNDƏ...

	30 iyul 2010


Onlayn ictimai-siyasi qəzet

Sevinc TELMANQIZI

İŞLƏR YAĞ KİMİ GETMƏYƏNDƏ...

Ölməz türk şairi Orxan Vəli Kanık necə deyirdi?

“İstanbulu dinliyorum, gözlerim kapalı,
Önce hafiften bir rüzgar esiyor,
Yavaş-yavaş sallanıyor
yapraklar ağaçlarda...."

İmkanınız olanda oxuyun, şedevr şeirdir. Uğursuz paralel olacaq, bilirəm, amma mən də bu ara Bakını dinləyirəm. Özü də gözüm qapalı. Eşitdiklərim ləzzət eləyir. Şairin dediyi kimi, biz tərəflərdə də öncə xəfif bir rüzgar əsib, indi növbə ağaclardakı “yarpaqların” yavaş-yavaş sallanmasına çatıb. İlahi, nələr çatır qulağımıza?
Bir məqalə gündəmi bu qədərmi dəyişə, illərdir deyilən “gerçək”lərin tozunu bu qədərmi çırpa, əzbərləri beləmi unutdura bilərmiş? Ramiz Mehdiyev “rüzgar”ı əsəndən bəri ölkədə yer-yerindən oynayıb. Keçmiş, məşhur reklam rolikindəki kimi, artıq hamı danışır, sükut pozulub.
Ötən gün telekanallardakı vəziyyətlə bağlı növbəti “zəhmətkeş toplantısı” keçirildi. İnandırım sizi, qan çanağı idi, qan. Bir toplantıda neçə nəfər polemikaya girər, neçə adam bir-birinə ayıb-qaxınc deyər, ay başına dönüm?! Elə bil hamı bu günü gözləyirmiş. İstəyirsiniz, sadalayım, mənzərə aydın olsun. Təbii, birinci tədbirin ağsaqqalı Nuşirəvan Məhərrəmli bütün kanalları ağ yuyub qara sərdi, yenə ora-bura müraciət edib “misri qılınc” istədi ki, bunları “qanına qəltan eləsin”. Sonra Novella Cəfəroğlu ANS-i satılmaqda ittiham etdi, ardınca Sabir Rüstəmxanlı “Space”ni kanal saymadığını dedi. Qulu Məhərrəmli AzTV-dən, sonuncunun nümayəndəsi özəl telekanallardakı səviyyəsiz aparıcılardan şikayətləndi. Necə deyərlər, baba nənədən, nənə nəvədən, nəvə... Hələ ki dartırlar, “turp” isə çıxmır.
Elə çıxmamağı yaxşıdır. Mağıl, biz də fürsətdən istifadə edib hansı telekanalın əslində nə işlə məşğul olduğunu öyrəndik. Məsələn, bu polemikalar olmasaydı, haradan biləcəkdik ki, büdcədən maliyyələşən televiziyalara ancaq qohum-əqrəba yığılır, ANS hazırda svetoforun növbəti əmrini gözləyir (Mir Şahin Ağayevin qırmızı-sarı işıq barədə tezislərini yada sal) və ya “Space”nin rəhbəri yumor sahəsi üzrə Moskvada təhsil alıb? Zarafatsız, dava bu mənada yaxşı şeydi, kimin kim olduğunu göstərir. Xüsusən də bir-birinin cik-bikinə bələd olanlar arasında.
Allah heç qoymasa, manıslardan, onların əyin-başının abıra salınmasından başlamışdılar. Mövzu yaman uzağa getdi. Nə telekanalların xəbər siyasəti qaldı, nə camaatın zövqünü korlamaları, nə də ictimai rəyə təsir edə bilməmələri. Reytinq cədvəllərini qoydular ortaya. Məlum oldu ki, bu günə qədər bəh-bəhlə təriflədikləri bəzi gülməşəkər kanalcığazların cəmi 1 faiz reytinqi varmış. Aha, bəs onda bunlara haradan yağır yağış kimi reklam? Axı bazar şərtlərinə görə, hər bir müəssisə öz məhsulunun reklamını ən baxımlı kanalda yerləşdirmək istəyir. Deməli, bu baxımlılıq palavrasına bir quş. Hansı kanalın pultu kimin əlindədirsə, reklam da ora yağır.
Sonra dedilər ki, sən demə, xəbərçiliyi, operativliyi ilə öyünən kanal da ictimai rəyə təsir edə bilmirmiş, camaat ona görə xarici telekanallara baxırmış. Adama deyərlər, bəs onda sənin şanlı hökumətinin nümayəndələri niyə ictimai rəyə təsir etməyən kanalın efirindən düşmürlər. Ölkədə bu rəyə təsir edən iki-üç qəzet var, hamısı da hər gün səhifələrindən bar-bar bağırır ki, gəlin sizə tribuna verək. Niyə getmirsiniz? Yəni bu, nə pəhriz, bu, nə turşu? Digər tərəfdən, qəzetləri kağız parçası, şər-şəbədə maşını adlandırırdınız, nə oldu? Ağız büzdüyünüz çap KİV-i hər gün ölüsü 10.000 qəzet satdırır.
Hələ mən onun neçə evdə, neçə adam arasında oxunduğunu demirəm. Telekanallar son bir neçə ildə onlarla, yüzlərlə müstəqil fikirli insanın üzünə qapılarını bağlayıblar. Və nəticə... Camaat artıq röyalara, rəqsanələrə, aygünlərə baxmaq istəmir. Onlara həm də sərbəst fikir, düşünən beyinlər lazımdır. Bir yalanı sadə camaata neçə dəfə “yedirtmək” olar axı? Zarafat deyil, 40 gün ömrü olan bir şeyi kanallar vasitəsilə illərdir sırımağa çalışmısınız. Daha getmir, qardaşım...
Deməli, o məşhur məsəldə deyildiyi kimi, televizor heç də bütün evlərə maneəsiz girə bilmirmiş. İstəməyəndə qapını açmırsan və zibil pulu yığan JEK işçıləri kimi bağıra-bağıra qalır qapının o biri üzündə. Bunu biz bilirdik, hökumətdəkilərin bilməsi də faydalı oldu. Amma qorxuram, bu gedişlə çoxları havaya girib barıtını çox edə və hökumətin özünə ilişə. Bax, onda Kərəmi ağlamaq tutacaq.
Nə isə... Mən gözüm qapalı dinləməyə davam edirəm. Siz də gözünüzü yumun. Qorxulu şeylər olacaq. Mən ölü, siz diri, görərsiniz.

543 dəfə baxılıb