BƏS QONAQPƏRVƏR İDİK, NƏ OLDU

	15 mart 2010


Onlayn ictimai-siyasi qəzet

Sevinc TELMANQIZI

BƏS QONAQPƏRVƏR İDİK, NƏ OLDU?

Səmimiyyətimə inanın. Gözüm təsadüfən sataşdı. Əslindəsə belə verilişlərə vaxt ayırmağa nə vaxtım, nə həvəsim olur. Amma hərdən yaxşının qədrini bilmək üçün(hərçənd belələri çox azdır) pislərə də baxmaq lazımdır. ATV-nin «Yağ kimi»sini deyirəm. Vaxtilə müğənnilərin evinə girib, onların alt paltarını belə təftiş edən şit aparıcı vardı ha, Zaur, indi ekranın baş deqüstatoru olub. Kişi qazanlara başını soxur, yeməklərdən dadıb ekspert rəyi söyləyir, bununla da kifayətlənmir, onu bişirən müğənni-manıs tayfasını dalaşdırır, onların evindəki məclislərdə süni qalmaqallar, ürəkbulandıran söhbətlər etməklə reytinq yığmağa çalışır və sair. Bir sözlə, adamı yeməkdən-mətbəxdən bəs deyincə iyrəndirir.

Yəqin bilirsiniz, bu verilişin orijinal versiyası Türkiyənin Shov Tv kanalında yayımlanan «Yemekteyiz» adlanır. Daş düşər o günə ki, bizdə nəsə orijinal layihə olsun. Peşmandı qonşu ölkənin telekanalları xırdaca yenilik etsinlər, bircə ay sonra onun şit, səviyyəsiz versiyası yerli ekrana çıxmasa, bizim televizyonçuların ürəyi partlayar. Nəsə, heç Türkiyədəki veriliş də matah bir şey deyil. Həftə içi 5 yarışmaçı yemək bişirir, dalaşır, qırışır. Axırda da biri ən yüksək balı toplayıb, qalib seçilir. Bizdə də sistem eynidir, amma Allah heç qoymasa, «improvizə»lərlə. «Yağ kimi»nin qonaqları müğənni-aktyor tayfası olur. Cümə günü o şoğərib pult evin balacasının əlinə düşəndə istər-istəməz diqqət kəsildik. İlahi, bu nə rəzillik?
Biz eşitmişik ki, yemək süfrəsi bütün umu-küsülərə, pis söhbətlərə nöqtə qoyulan məkandır. İnsanlar çay-yemək süfrəsi arxasında barışır, bir-birinin könlünü xoş etməyə çalışır. Masada çox danışan uşaqlarımıza bunu qadağan edir, «bax, çox danışsan, yemək səndən küsər» demirikmi? Bu verilişdə hər şey tərsinədir. Adamlar acığını-qıcığını süfrədə bir-birinə tökürlər, ev sahibi otaqdan çıxan kimi arxasınca danışırlar, aparıcı süni qalmaqal yaradır, bir də görürsən, aləm qarışıb, məzhəb itib, duz-çörək yaddan çıxıb. Nəymiş? Reytinq qazanırlarmış. Reytinqi qazanmağın yolu bundan keçirsə, ağıllı-başlı boks yarışması göstərin də. Çayı-çörəyi niyə qatırsınız axı bura? Özü də reytinqə qalsa, kobud bir misal deyim ki, dünyada ən reytinqli kanallar, saytlar porno xarakterli olanlardır. Yəni, ona qalsa deyirəm...
Verilişin gedişində məlum oldu ki, yarışmaçılardan biri - aktyor Arif Quliyev həftə içi nəyəsə əsəbiləşərək verilişi tərk edib. Paho, bu kişi də yaşının bu vaxtında bir ağıllı hərəkət eləsə dünya dağılar da. Son illər ən görünməmiş səviyyəsizliklər onun ifasında üzə çıxır. Adam illərdir yığa-yığa gəldiklərini səxavətlə dağıdır. Nəsə, süfrəni dava-dalaşla tərk etmək mədəniyyətini də bu ekrandan göstərdilər bizə, uşaqlarımıza.
Sonra iştirakçılar bir-birinin həftə içi bişirdikləri barədə həm üzbəüz, həm də studiyadan kənarda rəylərini bildirdilər. İkiüzlülüyün daha bir nümunəsi. Üzdə bir-birinə «canım-balım» deyənlər studiyadan kənarda şirə-aslana döndülər. O bunun dalınca danışdı, bu, onun dalınca. Adamlar bu hərəkətdən sonra o məclisdə yeyib-içdiklərini necə həzm etdilər, heyrət. Anlayıram, yarışmadır. Amma qalib olub, təkcə pul udmaq naminə də hər rəzilliyə qol qoymaq olmaz axı. Ekrandan bütün dəyərləri tapdamaq, onlara tüpürmək nə vaxtdan qaliblik şərti sayılır?
Allah heç qoymasa, qonaqpərvər millətiydik, nə oldu? Adam qonaq-qarasına, evinə getdiyi adama belə davranarmı? Nə aşılayırsınız camaata? Evinə getdiyin adamı təhqir etməyi, yoxsa qonağıyla məzələnməyi?
Və sonda... Qalibə verilən pul mükafatının məbləğini bilmədim, amma ATV rəhbərliyindən bir təvəqqem var. Lütfən o pulu mədəni şəkildə bir konvertin, ölüsü, qutunun içində təqdim edin. Yoxsa ki, qoyun alverində behləşən kəndlilər kimi əzik-üzük yüzlükləri tamaşaçının gözünə soxaraq qalibə vermək səviyyəsizliyin son həddidir. Həddi qoruyun lütfən...
P.S. Müəllifini bilmədiyim bir məşhur zarafat var. Ölkədə hamının şair olmasından bezən birisi deyir ki, görüm bizə şair xalq deyənin özü bizim kimi şair günə qalsın. Bu kəlam bizim qonaqpərvərliyimizə də aiddir. Ay bizə «qonaqpərvər xalq» deyən, səni görüm....

298 dəfə baxılıb