MÖVZU BOL OLARSA... | Yeni Müsavat

	30 iyul 2010


Onlayn ictimai-siyasi qəzet

Sevinc TELMANQIZI

MÖVZU BOL OLARSA...

Hər tərəf mövzu qaynayır, əziz həmkarlar, fərqindəsiniz? Əlini hara atırsan, “dişə dəyəsi” açıqlama, olay hop eləyib, düşür klaviaturanın düymələrinin üstünə. Döyəclə ki, döyəcləyəsən... Mövzu da bol olarsa nə olar? Oxucu yorulmaz, dükanda-bazarda, qohum-əqrəbanın darıxdırıcı məclisində danışmağa nəsə tapılar. Yadımdadır, sıxıcı yay günlərində, mövzusuzluqdan zəncir çeynədiyimiz vaxt mən əsasən mediadan yazan müxbir olaraq, köşə yazarları qarşısında “niyə yazmağa heç nə tapmırsınız” deyə sual qoyub yazı hazırlayırdım, onlar da “ölkədə mövzu qəhətə çıxıb, Allah qəhr etsin” janrında köşələr yazıb, yayı yola verirdilər. Amma indi beləmi?

İqtidarın şanlı-qanlı siyasəti nəticəsində bir günümüz də darıxdırıcı keçmir. Telekanalların durumu ilə bağlı zəhmətkeş toplantıları, bu yöndə atılan addımlar, Türkiyə-Azərbaycan münasibətləri ilə bağlı “rəngli-rəngli” adamların hər gün dəyişən mövqeləri, altdan-altdan hakimiyyətin Türkiyə ilə bağlı atdığı qıcıqlı addımlar... Hansı birindən yazasan? Həftənin 7 yox, 8 günü, qəzetin də 24 səhifəsi olsaydı, nə dərdimiz vardı...
Ən aktual olaysa heç şübhəsiz ki, Türkiyə-Azərbaycan münasibətləri ilə bağlıdır. Qəzetlərin işi asandır, şükür ki, hələlik kim hansı mövzunu necə işıqlandırmağını bilir. Azar telekanalların azarıdır. “Yuxarı” dan son, konkret göstəriş gəlmədiyi üçün bunlar da bilmirlər neyləsinlər. Bir süjetlərində “Türkiyə qardaşımızdır” deyirlər, o birində “Azərbaycana edilən haqsızlığı unutmarıq”. Gah nala vurular, gah mıxa. Elə bəzi siyasətçilərimiz, tanınmış ziyalılarımız da onlar kimidir. Bu günlərdə mən də Türkiyə bayraqlarının Şəhidlər Xiyabanından götürülməsi ilə bağlı məqalə hazırlamaq üçün “bir ayağı orda, bir ayağı burda” olan siyasilərdən rəy soruşurdum. Allah kəssin bunların qazandığı çörəyi. Biri dedi, bəlkə bir həftə sonra danışaq, bir başqası “vallah, bu barədə düşünməmişəm, qoy düşünüm görüm mənə necə təsir edir”(elə bil həkim müalicəsinin effektini soruşuram bunlardan-S.T). Hələ biri vardı, mövzunu dəyişmək üçün gah araya şirinlik qatdı, gah lətifə danışdı. Axırda da dedi, əşi, sərhəd boş söhbətdir, təki qəlblər sınmasın... Əslində onları da qınamıram. Televizorun düyməsini basmasan göstərə bilər? Yox. Yuxarıdan da hələ “düymə” basılmayıbsa, bir açıqlamaya görə çörəyindən olmalı deyil ki?
Ramiz Mehdiyevin məlum məqaləsindən sonra içi özüm qarışıq hamıda bir teletənqidçilik ruhu baş qaldırıb. Daha heç kəsin gözünə heç bir veriliş xoş görünmür. Hamı alıb əlinə qayçını, doğra ki, doğrayasan. Bayaq televiziyalardan danışdım, yadıma “Xəzər” televiziyasının xəbərlər verilişi düşdü. Telekanalda gün ərzində ilan-qurbağa ilə bağlı ürəkbulandıran sənədli filmlərə birtəhər dözürük, amma vallah-billah bu xəbərlər buraxılışına adamın səbri çatmır. Şirin çayın üstündən içilən turş dovğa effekti yaradır, məni qınamayın. Aparıcının əl-ayağını ölçə-ölçə, artistik jestlərlə danışığı, süjetlərdəki şivənçilik, yersiz hay-küy, bir çox hallarda hadisələrin uydurma təəssüratı yaradan təqdimatı - buraxılışda ən azı bir-iki süjet üzü bağlı qəhrəmanlarla bağlı olur - sadəcə insanı bezdirir. Bildiyim qədər buraxılışın baş redaktoru türkiyəlidir və deyəsən soyadı da Ünlübostandır, bir dəfə açıqlama götürmüşəm ondan, ona görə yadımda qalıb. Və hiss olunur ki, qardaşlar Türkiyə xəbərçiliyi xətti ilə getmək istəyirlər. Məni hakimiyyətin anti-Türkiyə siyasətinin davamçısı saymayın, amma mən ömür-billah Türkiyə telekanallarının xəbərlər proqramını sevməmişəm. Adamlar hətta pişiyin ağaca çıxmasından, zooparkda itlə siçanın dostluq etməsindən belə saatlarla süjet hazırlayıblar, zooparkın qabağında əllərində mikrofonla dayanıb, “şok, şok, şok, sayın seyircilər” deyib, həmin bu dütdülü xəbəri yayımlayıblar. Bizdə də eyni xətt davam edir deyəsən. Özü də “Xəzər”çılərin təqdimatında. Gözəl ağa gözəl idi... davamını özünüz bilirsiniz. Bax, abilərimiz demiş, özünüzə çəki-düzən verin, yoxsa sizdə də ATV-dəki kimi bir ekspert şurası yaradarlar, qalarsınız udquna-udquna...
Harda qalmışdıq? Dedim axı, mövzu çoxdur, yazdıqca qurtarmır. Amma mənə ayrılan yer bitdi. Bitməsi yaxşı oldu. Yoxsa ki, o məşhur şerdəki kimi, “hamısını indi desəm, nağıl qalmaz sabaha...”
Bax belə, nağıllara çox da inanmayın...

442 dəfə baxılıb