SUXARI FALI | Yeni Müsavat

	14 mart 2010


Onlayn ictimai-siyasi qəzet

Sevinc TELMANQIZI

SUXARI FALI

Sən səhər uşağının üzündən-gözündən öpüb, məktəbə yolla, günorta səsi xəstəxanadan gəlsin. Niyə? Çünki hansısa məktəb müdiri rəhbərlik etdiyi təhsil müəssisəsinə bazar, onun bufetinə isə restoran, kafe kimi baxır. Uşaqları da ki, Allah saxlasın, evdən çıxanda bəslənmə çantalarına təmiz və keyfiyyətli olduqlarına adın kimi əmin olduğun min cür naz-nemət qoy, onlar yenə də bufetçi xala-əmilərin market qiymətindən bir neçə dəfə bahaya sırıdığı şirniyyatı, bulka-buterbrodu gözlərinə təpəcəklər. Və nəticə... Xəstəxana koridorlarında göz yaşı axıdan valideynlər ordusu.

Srağagün Sumqayıtın 38 saylı məktəbində baş verən zəhərlənmə olayından xəbəriniz var yəqin. Deyilənlərə inansaq, 5-6-cı sinif şagirdlərindən 8-nin zəhərlənməsinə guya məktəbin binasından kənarda dayanan və onlara pulsuz suxarı paylayan şəxslər səbəb olub. Adamlar gəlib məktəb həyətinə və necə səxavətdisə, uşaqlara pulsuz suxarı veriblər. Onların bəziləri də bunu müəllimələrinə göstəriblər və çoxları məhz müəllimənin məsləhəti ilə həmin suxarını yeməyib. Yeyənlər isə sancılanaraq xəstəxanaya çatdırılıblar. Düzü, bu izahat Sumqayıt Şəhər Təhsil Şöbəsinin rəsmisi tərəfindən verildiyi üçün mən o qədər də inanmağın tərəfdarı deyiləm. Təbii ki, cümlə xəyanətlərə bais olaraq “naməlum, pis əmiləri” göstərmək vəziyyətdən ən ideal çıxış yoludur. Nəymiş? Üç nəfər “06" markalı maşında gəlibmiş, Ukrayna istehsalı olan suxarıları nəyə görəsə paylayıb aradan çıxıblarmış. İndi də polis onları axtarırmış. Lap ”Kurtlar vadisi"nin ssenarisinə bənzədi. Azzzz sonra!
Yəni bu cocuqların həmin suxarını məktəb bufetindən almadıqları barədə ortada konkret fakt yoxdu. Biz naməlum, illər boyu axtarılan, amma tapılmayan “cani”lərin əməllərindən əziyyət çəkmiş millətik. Ona görə bu dəfə də həmin suxarı satıcılarının tapılacağına əmin deyilik. Lap tutaq ki, o suxarını uşaqlara məktəb həyətində paylayıblar. Müdiriyyət, dərs hissə müdiri, lap elə qapıçı həmin dəqiqələrdə hara baxırmış, başı nəyə qarışıbmış? Çıxıb bir soruşmazlar, uşaqlara paylanan o zadın istifadə müddətinə baxmazlar? Onun paylanmasının səbəbləri ilə maraqlanmazlar? Elə gücləri binəva valideyndən pul qoparmağa çatır?
Zarafat deyil, insanlar öz uşaqlarının həyatını bir neçə saatlıq da olsa məktəb rəhbərliyinə, müəllim heyətinə etibar edir və qarşılaşdığı mənzərəyə bax... Belə çıxır ki, sabah məktəbin həyətində narkotik maddə, zərərli jurnallar... gətirib paylayacaqlar. Fərda Qədirov kimisi də Allah eləməmiş, əlini-qolunu sallayıb, rahatca içəri keçə biləcək. Və buna görə heç kim cavabdehlik daşımayacaq. Neyləsinlər, qara eynəkli, pis adamların əməlidir də. Allah saxlayanda saxlayır, saxlamayanda isə yox. Doğrudanmı başımıza gələnlərdən dərs çıxara bilmirik?
Dəfələrlə internetdə oxumuşam ki, xarici məktəblərin yeməkxanalarında satılan yeyəcəklərin siyahısı ölkənin Təhsil Nazirliyi tərəfindən təsdiqlənir, ora tez-tez ekspertlər göndərilir, malların istifadə müddətinin keçib-keçməməsi araşdırılır. ANS-in “İç xəbər” verilişinin ən sevimli mövzusu məktəb bufetləri olduğundan vaxtilə bu verilişdə Bakı məktəblilərinin qarnına ötürülən faciələrdən xəbər tuta bilirdik. Göyərmiş kolbasaların buterbrodu, qurumuş peçenyelər... Elə Azərbaycan təhsilinin özü kimi.
Bu günlərdə “Azərbaycanda uşaqların müdafiəsi islahatı üzrə milli konfrans” keçirilir. Orda kim nə cükküldəyib, qrant yemək üçün nə fövqəladə təklif səsləndirib - bilmirəm. Bircə onu bilirəm ki, “Azərbaycan məktəblilərinin təhsil müəssisələrində qidalanması qaydaları” təsdiqlənsə, bunu da normal şəkildə həyata keçirsələr, min belə konfransa dəyər.
Mövzunun ağırlığını azaltmaq üçün bir lətifə danışım. Deməli, müəllim uşaqlara falın ziyanlı olması barədə danışır və “uşaqlar, heç hansısa kağıza baxıb gələcəyi söyləmək mümkün ola bilərmi” deyə sual verir. Balacalardan biri əlini qaldırıb deyir: “Niyə də olmasın, anam dərsdən gələndə gündəliyimə baxır və axşam atam evə gəlincə nələr olacağını dəqiqliklə deyir”.
Bax belə, falçılara bel bağlamayın. Məktəb divarları bizə gələcəyimizi göstərəcək.

279 dəfə baxılıb