“QAYNAR XƏTT”in SOYUQ DUŞ EFFEKTİ

	14 mart 2010


Onlayn ictimai-siyasi qəzet

Sevinc TELMANQIZI

“QAYNAR XƏTT”in SOYUQ DUŞ EFFEKTİ

Başımıza nə gəlirsə, bu yersiz utancaqlığımızdan, uzaqgörənliyimizdən gəlir. “Amma anam bilməsin...” psixologiyasıdır canımıza-qanımıza hopan. Necə hopubsa, qurtula bilmirik ondan. Sürücülərin jarqonu ilə desəm, “kruq”u çox yekə götürdüyümün fərqindəyəm. İcazənizlə niyə belə təsirləndiyimi yazım, işin nə yerdə olduğundan siz də hali olun.

Deməli, o gün qəzetimizdəki bir məqalədə yazılıb ki, məktəbdə uşağından rüşvət istənildiyi üçün Təhsil Nazirliyinin “Qaynar xətt”inə müraciət edən valideynin başı “ağrıyıb”. Valideyn həmin xəttə rüşvət olayı barədə məlumat verib, özünü təqdim edib, sonra da telefonunu və sair verib ki, yalançı məlumat olduğunu düşünməsinlər. Sonuc? Bir gün sonra məktəbin direktoru valideynə zəng vurub, azərbaycanlıların sevdiyi ifadə ilə desək, bu işverənliyinin hesabını sorub. Valideyn gözünə döndüyüm də yaranmış bu dialoq fürsətindən istifadə edib direktora ürəyindəkiləri demək əvəzinə “Qaynar xətt”ə müraciət etdiyini boynundan atıb. İndi də qəzetə gileylənir ki, bəs belə dərd olar, nazirlik niyə anonimliyi saxlamır. Mənim uşağımı məktəbdə incidirlər, uşaq pisikir, ay bağ belə, bostan belə...
Sən dərdə-azara, qayğıya bax, əziz oxucu. Adam inciyibmiş. Özü də kimdən-kimdən - Təhsil Nazirliyindən. Halbuki bu məqamda özündən inciməli idi. Adama deyərlər, birincisi, sən buranın Azərbaycan olduğunu bilmirsənmi? Bilirsənsə, nə azarın qalıb “Qaynar xətt”də? Bizimki kimi məmləkətlərdə hər kəs öz işini özü həll etməlidir. Qaynar-ilıq xəttə-filan bel bağlamadan həm də. Ölkənin Təhsil Nazirliyindən əlimiz yağa-bala batıb ki, onun xəttinə də ümidli olaq? Uşağından məktəbdə rüşvət istəyiblər, bacı (qardaş)? Bir saniyə də itirmədən gedirsən həmin məktəbə, girirsən direktorun qəbuluna, o sənin üzün, o direktorunku, bu da qanunlar. Qoçaqdır sənə o rüşvətin hansı dəftər-kitabda yazıldığını sübut etsin. Edə bilməyəcək təbii ki. Direktor udquna-udquna qalanda sən artıq bu dueli 1:0 hesabla qapatmış olacaqsan. Məktəb rəhbərliyinin qabağında gözün kölgəli deyil ki? Yox. Avtobus sürücüsü pulunun qalığını səhv qaytaranda, üst qatdakı qonşunun evindən başına su yağanda necə səsini başına atırsansa, bu məqamda da eləcə davranmalısan. Nə artıq, nə əskik.
Heç kəs “uzaqdan döyüş asan gəlir” haqq-hesabına girməsin. Şəxsən özümün başıma gəlib, görmüşəm. Məndən səbəbsiz yerə külli miqdarda pul istəyən bir məktəb direktoru ilə düz bir saat çənə-boğaza girmişəm. Bir saz onun əlində, biri mənim, deyiş ki, deyişəsən. O bir saatın sonunda adam katibəsindən bir stəkan soyuq su istəyib içəndən sonra “ömrümdən ömür getdi” deyə söhbəti qapadıb. Mən sağ, o salamat. İndi də üz-üzə gələndə qanlı-qanlı nəzərlərini dikir, mən də gülümsünüb keçirəm. Həə, nə olsun? Guya mən həmin vaxt bu məmləkətdə adını qaynar qoyduqları bir xəttin olduğunu bilmirdim? Bilirdim. Amma bununla paralel onun da fərqindəyəm ki, heç kəs məndən rüşvət ala bilməz. Necə ki, mən heç kəsdən rüşvət almıram. Bunu bildiyin andan sən qalibsən.
O ki qaldı ay uşağı incidəcəklər palavrasına, mən bunun da zəifliyə geydirilən ucuz don olduğunu düşünürəm. İncidəcəklər, yenə də aslanlar kimi kəsdirəcəksən məktəbin qapısını. Ta ki, bu savaşı qazanana qədər. Övladın savadlısa, qorxacaq heç nəyin yoxdur demək ki.
Digər tərəfdən, onun saxtakar bir mehribanlıq və sevgi ilə əhatə olunmasını istəyirsənsə, o da başqa. Rüşvətini ver, qoy müəllimə onu görəndə “canım-gözüm” deyib başını sığallasın. Amma unutma ki, onda uşağın da elə o bəyənmədiyin saxtakar müəllim-direktor tayfasının tayı olacaq. O da böyüyəndə insanların üzünə yox, cibinə baxacaq, onlara puluna görə hörmət edəcək və s. Bilirəm, bəlkə də çoxunuz “uşaqlar soyuq münasibətdən tez sınırlar, onun xətrinə bu rüşvət də başımın-gözümün sədəqəsi olsun” deyirsiniz. Amma yenə də təkrar edirəm ki, hər şey bizim əlimizdə. Biz evdə uşaqlarımızla normal söhbət edib ona nəyin pis, nəyin yaxşı olduğunu başa salsaq, o da belə münasibətdən sarsılmaz.
Və sonda. “Qaynar xətt”in məktəb direktoruna işləməsi faktına gəlincə, lütfən, heç kəs uşaq sadəlövhlüyü göstərməsin. Bu xətt də, bu məktəblər də, bu müəllimlər də şanlı nazirliyə tabedir, sizə yox. Siz öz balanızı qoruduğunuz kimi onlar da öz “balalarının” boğazından kəsmək istəmir. Bala şirin şeydir, unutmayın...

286 dəfə baxılıb