BLOQÇULAR VƏ MATAH VƏTƏNDAŞLIQ

	30 iyul 2010


Onlayn ictimai-siyasi qəzet

Zamin HACI
zaminhaci@gmail.com

BLOQÇULAR VƏ MATAH VƏTƏNDAŞLIQ

Hakimiyyət azad bloqçular Emin Milli və Adnan Hacızadəyə həbs cəzası kəsməklə özünü bütün dünyada bir daha biabır elədi. Göstərdilər ki, ingiliscə danışmaq hələ çağdaş insan olmaq deyil. Bu gənclərin ikisi də ingiliscə sərbəst danışırdılar, bir növ hakimiyyətin aksentinə doğma sayılmalıydılar. Ancaq nə faydası...

Əgər Qənimət Zahidi bir oğru və bir dələduzdan ibarət duetlə şərləyib qazamata atmışdılarsa bloqçuların həbsində iki kişi qırığını, türkün sözü, kullandılar. Həmin “birdəfəlik... şprislərin” heç adını da burda çəkib qəzeti çirkləndirmək istəmirəm. Amma yox, çəkmək lazımdır, qoy onların adı yaxın tariximizin çirkli səhifələrində qeyd olunsun, gələcəkdə oğul-uşaqları bu biabırçı adlardan utansınlar. Biz onları unutmamalıyıq. Vüsal və Babək adlı həmin iki şəxsi. Onlardan biri məhkəmədə utanmazcasına hər şeyi unutduğunu söyləmişdi. Biz səni unutmarıq, narahat olma.
Bu bəlaların kökünü qazmaq lazımdır, necə ki, Baltikyanı ölkələrdə SSRİ dağılandan sonra elədilər. Oralarda rəsmən qanun çıxarıldı ki, sovet DTK-sı, o cümlədən NKVD ilə əməkdaşlıq etmiş, insanların şərlənməsində iştirak eləmiş şəxslər heç bir dövlət qurumunda çalışa bilməz. Cəbhə hakimiyyətinin məncə ən böyük yanlışlarından biri elə DTK arxivlərini açmamaq oldu.
Bu vurhavurun içində, camaatın baş götürüb ölkədən normal bir yerə qaçmaq istədiyi vaxtda İlham Xəlilov adlı vətəndaşımızdan bir təəccüblü məktub almışam. İstəyirəm siz də məktubla tanış olasınız, sonra birlikdə təəccüblənək.
İlham bəy yazır ki, xanımı Afizər Bəkir qızı Xəlilova Gürcüstan vətəndaşıdır, ona Azərbaycan vətəndaşlığı ala bilmir: “Nikahımızı 1996-cı ildə Nizami rayon VVAQ şöbəsində bağlamışıq. İki oğlumuz doğulub, ikisi də Azərbaycan vətəndaşıdır, hazırda Suraxanıda orta məktəbdə oxuyurlar. Mən özüm Azərbaycan Hərbi Hava Qüvvələrinin keçmiş zabitiyəm, torpaqlarımızın müdafiəsi uğrunda döyüşlərdə iştirak etmişəm. 2002-ci ildə xanımım VVAQ-a sənəd verdi, burda yaşamaq hüququ almaq üçün. 5 il ərzində hər dəfə 1 illiyə bu sənədin vaxtı artırıldı. 2007-ci ildə Azərbaycan vətəndaşlığı almaq üçün VVAQ-a lazım olan bütün sənədləri verdi, 6 ay gözləməyi tapşırdılar. Ancaq heç bir nəticəsi olmadı. 2008-ci ilin aprelində isə VVAQ-dan dedilər ki, artıq bu işə Miqrasiya Xidməti baxır. 2008-ci ilin mayında lazımi sənədləri toplayıb Miqrasiya Xidmətinə verdik. Bir neçə dəfə ”gözləyin" cavabı aldıq, nəhayət, 2009-cu ilin sentyabrında imtina cavabı verdilər, heç bir səbəb göstərmədilər. Nəhayət, mən Miqrasiya Xidmətinin rəisi cənab Rəhimovun qəbuluna düşdüm, bütün qanunları onun yadına saldım. Mənə dedi ki, haqlısan, ancaq xanımına vətəndaşlıq verməyəcəyik, get, hara şikayət edirsən et. O, prezidentə şikayət məktubu yazmağımı da mənə irad tutdu. Xanımım şikayətlə prezident administrasiyasında Fuad Ələsgərovun da qəbulunda olub, oradan yenə Rəhimovun idarəsinə yönəldiblər. Orada isə xanımıma Azərbaycan vətəndaşlığı verməmək andı içiblər sanki. Mənim başqa çarəm yoxdur, oğullarım əsgərlik yaşına çatanda qanunauyğun şəkildə 35 manat ödəyib onları Azərbaycan vətəndaşlığından çıxardacağam. Heç vaxt razı olmaram ki, onlar rüşvətlə vətəndaşlıq verilən bir ölkənin məmurlarının rahatlığını qorusunlar".
Gördüyünüz kimi, İlham bəy gec də olsa başa düşüb ki, bura heç yaşamalı yer deyil. Əslində ona ən yaxşı məsləhətimiz bu olar ki, elə xanımını Gürcüstan vətəndaşlığından çıxartmasın. Gürcüstan hazırda inkişaf edən demokratik, rüşvətdən azad bir ölkəyə çevrilir, ora gedən-gələn ağzının suyunu axıdır. Gürcüstanda hər hansı dövlət sənədini yarım saata, heç bir qanunsuz ödəniş olmadan almaq mümkündür!
Çox matah şeymiş Azərbaycan vətəndaşlığı... Hələ buna görə bizə pul verməlidirlər ki, nə yaxşı indiyəcən qaçıb getməmişik.

877 dəfə baxılıb