ƏSL GÜCƏ QARŞI NANKORLUQ

	30 iyul 2010


Onlayn ictimai-siyasi qəzet

Zamin HACI
zaminhaci@gmail.com

ƏSL GÜCƏ QARŞI NANKORLUQ

ABŞ-da çıxan məhşur “Forbes” jurnalı 2009-cu il üçün planetimizin ən güclü adamlarının siyahısını açıqlayıb. Mən bədbəxt bir Azərbaycan vətəndaşı olaraq bu siyahıdan çox narazıyam, imkan olan kimi Qüdrət Həsənquliyevin partiyasına, ya da Akif Nağıya qoşulub gedib jurnalın Bakıdakı nümayəndəliyi önündə Ərdoğanın portretini yandırmaq fikrindəyəm. Ən pis halda mənə çatan neft gəlirlərindən imtina edib bütün bu pulları Oqtay Əsədov Fonduna keçirəcəyəm. Yox, əgər bütün bunlardan sonra da “Forbes” jurnalı mənim etirazımı, şiddətli narazılığımı nəzərə almasa yol polisində işə düzələcəyəm.

Nədən narazıyam? Təsəvvür edin, bu gönüqalın jurnal dünyanın 67 ən güclü şəxsiyyətinin adını açıqlayıbdır, lakin bunların içində bir dənə də azərbaycanlı yoxdur! Bax mən heç, lap Lütvi Zadəni, Misir Mərdanovu və Səfər Əbiyevi də nəzərdə tutmuram, bəs ən azından ölkəmizin “regionun lideri”, “dünyada analoqu olmayan inkişafı”, “ÜDM artımında marsiançikləri də keçməsi” və sairə necə olsun? Axı bütün bunlar bir nəfərin - dövlət başçımızın cahanşümul əməyinin nəticəsidir, o isə 67 güclü şəxsiyyət sırasına salınmayıb. Belə ədalətsizlik olarmı?
Sonra da adamın üzünə dirəşirlər ki, nə üçün bloqçuları, jurnalistləri tutursunuz, insan haqları it sürütməsi edilir, xalqa xoruz səsi eşitməmiş işgəncələr verilir və sairə. Əcəb eləyirik! Sən bizi saymazsan, jurnalında güclü adam kimi göstərməzsən, mən də belə edərəm.
Yeri gəlmişkən, yapokrat deputat Mübariz Qurbanlının dünən sözümə qüvvət verən açıqlamasını oxudum. Soruşublar ki, ABŞ Dövlət Departamenti bloqçular Emin Milli və Adnan Hacızadənin həbsinə etiraz bəyanatı yayıb, buna necə baxırsınız, Mübariz əkə deyibdir: “Biz də ABŞ təyyarələrinin Əfqanıstanı bombalamasına etiraz edirik”. Doğrudan da, Əfqanıstanı bombalamaq heç yaxşı iş deyildir və Amerika bunun cavabını bloqçuların qanunsuz həbsi ilə almalıydı. Məsələn, Eynulla Fətullayevi də Bağdadın bombalanmasına görə tutmuşuq. Cavabsız heç nə qalmır. Əgər İranı da vursalar bu dəfə lap İsa Qəmbəri həbs etmək olar. Heç kim bizim məhkəmələrin müstəqilliyinə şübhə etməsin. Onlar o qədər azaddırlar ki, heç qanunları da vecə və uca almırlar. Taxta çəkiclərinin ucuna, ağlınız ayrı yerə getməsin.
Mən sadəcə bir cupbulu faktı Mübariz əkənin yadına salım, bu söhbət qurtarsın, təzədən “Forbes”in yaxasından yapışaq. Ay Mübariz bəy (istəsə əkə də yazaram, görürəm istəmir), axı bu amerikalıların Əfqanıstanı bombalamağına dəstək verənlərdən biri elə sən özünsən! Çaşdınmı? Onda yadına salıram: hazırda Əfqanıstanda ABŞ-ın müttəfiqi olaraq döyüşlərdə Azərbaycanın 136 əsgəri də iştirak edir, düz 3 taqım. Həmin əsgərlərin Əfqanıstana göndərilməsi qərarına isə Milli Məclisdə özün səs vermisən. İndi belə çıxır ki, adam əsgər göndərir, bombalamağı dəstəkləyir, yanındakı jurnalistə isə etiraz elədiyini deyir. Əlbəttə, deputatxanada bu adi praktikadır, pensiya məsələsi müzakirə ediləndə qanunun əleyhinə çıxış edən deputatlar sonra lehinə səs vermişdilər. Yaponlar da deyir biz robot düzəltməkdə hamıdan öndəyik...
Nəhayət qayıdaq mövzuya. “Forbes” yazıb ki, dünyanın “güclü lider”lərini 4 ölçüyə görə seçiblər:

başqa insanlara təsir - insanların sayı;
maliyyə mənbələrinin miqdarı;
eyni zamanda müxtəlif sferalarda güclülük;
öz gücündən fəal istifadə.

Gördüyümüz kimi, bizim ölkədə bu ölçülərə uyğun gələn nəinki bir, hətta bir neçə nəfər vardır. Ancaq jurnal bunu görməməzliyə vurubdur. İnsafınız olsun, axı ən azı Ziya Məmmədov siyahıya düşməliydi.
Mən təklif edirəm Vüqar Səfərli “Forbes”in adını KİV-ə Dövlət Dəstəyi Fondundan pul alanların siyahısına salmasın.

1239 dəfə baxılıb