ZARAFAT HARDA OLUR | Yeni Müsavat

	14 mart 2010


Onlayn ictimai-siyasi qəzet

Zamin HACI
zaminhaci@gmail.com

ZARAFAT HARDA OLUR?

Yaxud gül kimi təklifi necə yoldular

Deputat Aydın Həsənovun tərtəmiz, ciddi sözlərini qulaqardına verdilər, halbuki çoxdandır deputatxanada belə gözəl çıxış olmamışdı.

Artıq bilənlər bilir, bilməyənlər də getsin dombalaq aşsın - dünən Həsənov deyib ki, Milli Məclisə gələn il üçün gözlənilən seçkiləri ləğv eləmək lazımdır. Deputat təklifini çox məntiqli əsaslandırıbdır: «Seçkiyə 50 milyon manat sərf olunması büdcə layihəsində nəzərdə tutulur. Qoy bu pullar xalqın vəziyyətinin yaxşılaşdırılmasına sərf olunsun. Seçki olanda xaricdən qonaqlar gəlir, onları qarşılamağa, yola salmağa çoxlu pul gedir. Nə qədər ki, Dağlıq Qarabağ münaqişəsi davam edir, heç Milli Məclisə seçkilər keçirilməsin. Elə indiki deputatlar yerində qalsın. Burdakı deputatlar xalqın ən ləyaqətli övladlarıdır, o cümlədən mən də».
Əlbəttə, Aydın bəy son cümləsi ilə bir qədər təvazökarlıq edibdir, ancaq başa düşmək olar. Hamısı təklifin həyəcanı üzündəndir, axı təklif həyata keçsə Aydın bəy gərək uzun illər xalqın yolunda əziyyət çəkib deputat işləməyə davam edəydi.
Bütün hallarda 50 milyon manatın xalqın ehtiyaclarına sərf olunması doğrudan uğurlu olardı. Onsuz da hamı bilir ki, (bunu bilməyənlər üçün də yuxarıdakı təklifim keçərlidir) bizim ölkədə deputat seçkiləri tamamilə saxta bir prosesdir, Prezident Administrasiyasından verilən siyahı üzrə kuklaları, düymə basanları toplayıb yığırlar bir salona, qurtarır gedir. Ara yerdə dava-dalaş, saçyoldu, it qırğını elə camaatımıza qalır. Aydın bəy bunu aradan götürməyi təklif edirdi. Onun təklifində həm də bir etiraf var idi ki, parlament seçkilərinin xalqa heç bir xeyri yoxdur. Yəni 50 milyonu çölə atmaq kimi bir şeydir.
İlk növbədə ağıla gələn odur ki, yoldaş Həsənov prezidentin, baş prokurorun ömürlük təyinatına yol açan qanun dəyişmələrindən ilham alaraq bu təklifi veribdir. Ancaq belə deyil. Çünki prezident və prokuror vəzifələri deputatlıq qədər əziyyətli deyil. Deputat il uzunu hər gün qanun qayırır, sonra həmin qanunu adam içinə çıxarır, həyata və mümkün başqa yerlərə keçirdir, tez-tez çıxış edir, düymə basmaqdan barmağı əyilir, dırnağı sınır. Üstəlik, gərək hər dəfə deputatxanaya girəndə qapını dilənçi kimi kəsdirib şikayət edən qara camaatdan uğurla yayınasan. Bəzi deputatlar bu işdə o qədər uğur qazanıb ki, bu saat Kəlbəcərə kəşfiyyata göndərsən Vartanın pul kisəsini dal cibindən çıxardıb gətirər, o it oğlunun xəbəri də olmaz. Hələ deputatın seçicilərin sünnət toylarına nə qədər nəmər salmağı var... Ağır işdir, ləyaqətsiz adam bu işdə ancaq 5 il davam gətirə bilər - bircə deputatlıq müddətinə.
Kəlbəcər demişkən, Aydın bəy deputat qoyulmazdan öncə Respublika Hərbi Toplanış Məntəqəsinin rəisi işləmişdir, bu da onun durumu düzgün qiymətləndirməsinə təsir edən əsas faktorlardan və traktorlardan biridir. (Traktoru bura qafiyə xətrinə soxuşdurdum, heç bir anlamı yoxdur). O yaxşı bilir ki, nə qədər bu hakimiyyət vəzifədədir, heç vaxt Qarabağ münaqişəsində həll olmayacaq. Axı əsgərliyə yolladığı cavanları yaxşı tanıyır! Məsələn, mən yoldaş Həsənov bu hərbi komissar vəzifəsini daşıyanda əsgərlikdə olmuşam, bizim taqımda bir pəltək, bir ruhi xəstə, bir yastıayaq, iki distrofik var idi. Məni də ki, şəkildən görürsünüz. Həmin bu Aydın əkə minus 4 gözlüklə məni birbaşa Murova basmışdı, özü də atıcı kimi. Elə ki, gözlük qardan tərləyirdi, mən də hara gəldi atırdım, hərdən deyəsən güllə ana vətənə tərəf uçurdu. Şveykin əsgərliyi kimi bir şey idi. Ta Şveyki tanımayanlar varsa onlara heç dombalaq aşmağı da məsləhət görmürəm.
Uzun sözün qısası, Həsənovun gül kimi təklifini elə beşikdəcə boğdular, bəzi yapokratlar bunu zarafat adlandırdılar, məsələ batdı. Həsənovun özü də məcbur oldu zarafat söhbətinə razılaşsın.
İndi bircə sual qalır ki, görəsən Aydın bəy deputatların xalqın ən ləyaqətli övladları olmağını da zarafatla demişdi, yoxsa ciddi...

964 dəfə baxılıb