HAMI YANLIŞ ANLAYIR | Yeni Müsavat

	30 iyul 2010


Onlayn ictimai-siyasi qəzet

Sevinc TELMANQIZI

HAMI YANLIŞ ANLAYIR

Qəfil məni təqlid etdiyini sezdim. Öz otağında oturub, öz aləmində kimlərdənsə müsahibə alırdı. Telefon əvəzi qulağına bir qələm qabı dirəyərək “müsahib”lərini sual yağışına tutmuşdu. Və söhbətin sonunda məni düşünməyə vadar edən o cümlə gəlirdi: “Bir sözlə, deyirsiniz ki, yanlış anlaşılma olub, hə? Siz elə demək istəməmisiniz...”

Məni təqlid edən evdəki balaca od-alov, yəni 6 yaşlı qızım idi. Hər gün evdə müsahiblərimlə dialoqumu gizli-gizli izləyən, bəzən ona özündən və sözündən böyük reaksiyalar verən bu uşaq sonda özünə gizli müsahib də tapmışdı. Sadəcə, sonda elə cümlə işlətməsi marağıma səbəb oldu və niyəsini soruşdum. “Həmişə sən müsahibə götürdüyün adamlara elə deyirsən axı...” Ani düşündüm, çox uzağa getmədən son bir həftədə elə media səhifəsində hazırladığım yazıları yadıma salmağa çalışdım. Nələr olub bu cameyədə? Bir qəzet bağlanıb, bir qəzetin bir əməkdaşı səs-küylü ayrılıqdan sonra öz iş yerinə qayıdıb, Mətbuatın İnkişafına Dövlət Yardımı Fonduna yenə az vəsait ayrılıb, bir nazir bir redaktoru məhkəməyə verib... Elə burdaca dayandım, daha artıq nəsə sadalamağa ehtiyac yox idi. Balaca haqlıydı, sözügedən mövzularla bağlı hazırladığım yazıların demək olar ki, bütün qəhrəmanları yanlış anlaşılmadan şikayət etmişdilər, mən də yazmışdım. Məlum olmuşdu ki, yaranan bütün problemlərin kökündə tərəflərin bir-birini yanlış anlaması dayanıb.
Biz jurnalistlərin fəaliyyətində belə şeylər çox olur. Kimlərsə mikrafon-diktafon “duet”ini görəndə cuşa gəlir, Koroğlu kimi nərə çəkir, asır-kəsir, bütün bunlar qəzetdə çıxanda isə məlum olur ki, bu, qəzet üçün deyilmiş və ya bu adam çox da elə demək istəmirmiş. Necə deyərlər, yanlış anlaşılıb. Loru dillə desək, müsahib bütün həyatını bizə danışmalı, biz də iş-gücümüzü atıb, onu dinləməli olduğumuz halda, bu barədə heç nə yazmamalıymışıq. Və ya o, hirslənib nəsə deyə bilərmiş. Amma bizə nə düşüb? Jurnalist yanan ocağın üstünə yağ tökməkdənsə, Dədə Qorqudluq edib, tərəflərin münasibətlərini düzəltməliymiş. Bax belə-belə yazılmamış qanunları var bu yazı-pozu işinin.
Amma sözümün canı təkcə bu deyil. (Sadəcə fürsətdən istifadə edib, qeybət qırdım-S.T.) Bu ölkədə sözün böyük mənasında anlaşılmaq problemi var. Xəstə həkiminə, valideyn müəllimə, vətəndaş öz deputatına... dərdini anlada bilmir. Hərə bir dildə danışır çünki. Biz azərbaycanlıların sevdiyi ifadə ilə desək, heç kim heç kimin kitabını oxumur və avtomatik olaraq, dilini də bilmir. Kobud səslənsə də deyim ki, biri bicliyindən, o biri də gicliyindən belə problemlə üzləşir. Birinci az danışır ki, çox “quş” buraxar. Ona görə də qarışıq-quruşuq ifadələr seçir, nitqini bəzəyib-düzəyir, nə şişin, nə də kababın yanmaması üçün cəhd göstərir, nəticədə də ortaya bir şey çıxmır, yəni, anlaşılmır. Sonuncu isə cahilliyindən, savadsızlığından belə problemlə üzləşir.
Şəxsən mən bir neçə gün öncə iki qonşumun timsalında yanlış anlaşılmanın hansı bəlalara yol aça biləcəyini gördüm. Demək, qonşulardan biri digərinin bağındakı su nasosunu yoxlamaq istəyirdi. Bağ sahibinin həyat yoldaşı elə eyvandanca o qonşunun üstünə bağırdı ki, bağa niyə icazəsiz girib. Dava-qırğın başlananda nasos sahibi mədəni şəkildə dedi ki, ay bacı, mənim burda iki dəqiqəlik işim var, eşidirsiz? Xala da eyvandan qayıt ki, kar özünsən, bildin? Bu yerdə xalanın qazanda nəyin bişdiyindən xəbəri olmadan bir çömçəyə iddialı olan böyük oğlu eyvana çıxdı ki, alə, bəs sən mənim anama kar dedin hə? Gözlə orda, gəlib səni yortacam... Sonra da bildiyiniz kimi, azərbaycansayağı “vur-vurum” tipli dava, aralaşdırmalar və sair. Hamısı da nəyin ucbatından? Anası ölmüş yanlış anlaşılmanın...
Bir ara bizim məmləkətdə “mənim heç nədən xəbərim yoxdur” kimi məşhur bir məsəl vardı. Hansı məmur suçu, məsuliyyəti boynundan atmaq istəyirdisə, deyirdi ki, əttövbə, mənim bu hadısədən xəbərim yoxdur. İndi də “yanlış anlaşılma” dəbi çıxıb. Srağagün parlamentdə də deputatlıq müddətinin artırılması ilə bağlı deputat Aydın Həsənov yanlış anlaşılmadımı? Adam təklif verdi, sonra da məlum oldu ki, zarafat etmək istəyib, amma yanlış anlaşılıb. Düzdü, ona bu yanlış anlaşılmanı çox tez anlatdılar. Elə spikerin otağına girən kimi ANLADI ki, bu həna o hənadan deyil. Amma yenə də adam yanlış anlaşılıb da, neyləsin?
Və nə yaxşı ki, bu yanlış anlaşılma var. Yoxsa ki, bəzi qorxaqlar, yalançılar... özlərini nəylə sığortalayardılar?
P.S. Düzünü deyin, heç olmasa, mənim nə demək istədiyini anladınızmı? Bax, sözümüz sözdü, yazı başımı ağrıtsa, deyəcəm ki, yanlış anlaşılmışam.

260 dəfə baxılıb