MƏNİM ƏZİZ MARQANSIM

	03 sentyabr 2010


Onlayn ictimai-siyasi qəzet

Zamin HACI
zaminhaci@gmail.com

MƏNİM ƏZİZ MARQANSIM

Səhiyyə Nazirliyinin 3-4 apteki qoruyucu maskaların bahalığına görə bağlaması gözdən pərdə asmaqdan başqa bir şey deyil. Ölkənin dərman bazarında biabırçı durum var. İki misalla başlamaq istərdim.

Əgər sizin astma xəstəliyiniz varsa, həkimlər yuxuya gedə bilmək üçün “Dimedrol” həblərini dərman yazacaqlar. Ondan sonra buyurun, Bakının bütün apteklərini ələk-vələk edəcəksiniz, hər yerdə sizə deyəcəklər ki, “Dimedrol” yoxdur. Gərək bu ucuz və mənasız (10 həbinin qiyməti 20-50 qəpik arasında dəyişir) dərmanı əldə etmək üçün bir aptekçi tanış tapasan, alasan. Yoxsa axtarmaq mənasızdır.
Yaxud qolunuzda bir yara çıxıb, həkim məsləhət görüb ki, bunu kalium-permanqanat məhlulu ilə - el arasında “marqans” adıyla tanınan qədim tibbi vasitə ilə yuyasınız, çünki bu marqans çox əla dezinfeksiyaedici bir zaddır. Üstəlik, marqans zəhərlənmələr zamanı xəstələri qusdurmaq üçün də işlədilir. Uzun sözün qısası, bu yaxında bir yaxın adamın səhhətindəki problem üzündən marqans lazım olmuşdu və bu yaramaz marqansı tapmaq bədbəxt müəllifə - yəni mənə həvalə edilmişdi.
Bu marqans demokratiya, azadlıq kimi matah bir şeymiş sən demə, aptekləri dolaşıb neçə çarıq yırtdım, gördüm deyən olmadı. Əslində bu da “Dimedrol” kimi çox ucuz bir dərmandır, Sovet dövründə apteklərdə zibil kimi olardı. Bəs indi niyə yoxa çıxıb? Guya marqansdan partlayıcı maddə düzəltmək olurmuş. Məsələn, bunu bertole duzu ilə qatanda zırıltı qopurmuş. Dimedrolu isə narkomanlar atıb hallanırmış.
Mənim bu partlayış-narkomaniya işlərinə sözüm yox. Hərçənd, azca savadlı şəxs bilir ki, lazım olanda şəkər tozu da partlayıcı maddəyə çevrilə bilər və bizim sarsaq əczaxana, səhiyyə və sabitlik sisteminin məntiqiylə şəkər tozu da qeybə çəkilməlidir. Yoldaşlar, axı bu nə idiotizmdir? Ya marqansı, “Dimedrol”u ümumiyyətlə qadağan edin, ya da camaatı avara qoymayın.
Xatırladım ki, Səhiyyə Nazirliyinin 1 dekabr, 2005-ci ilə aid 141 saylı əmrində marqans və “Dimedrol” bütün tibb müəssisələrində əhaliyə pulsuz verilən dərmanlar siyahısında yer alır. Bu necə şeydir ki, xəstəxanada guya pulsuzdur, ancaq aptekdə pulla da tapmırsan? Bu sarsaqlığın səbəbini kimsə izah edə bilərmi? Aptekləri düşük maska şousu ilə “bağlayan” Səhiyyə Nazirliyi bu suallara cavab versə yaxşı olar.
Yeri gəlmişkən, mən həmin maska satmayan, yaxud baha satan və səhiyyə nazirinin qəzəbinə tuş gələn apteklərin hüquqlarını müdafiə edirəm. Onları dövlətin zorundan qurtarmalıyıq, çünki onların da maska satmamaqda öz məntiqi var. Keçən həftə Bakıda bir quldur valyutadəyişmə məntəqəsinə basqın etdi, 8 min dollar apardı, məntəqənin işçisini yaraladı, hətta onu izləyənlərlə atışdı. Sonradan polis xəbərində deyildi ki, quldur tibbi maskada olub. Doğrudan da bu saat donuz qripini bəhanə edib sifətini gizlətmək, hər cür quldurluqla məşğul olmağa münbit şərait yaranıb. Və həmin “marqans məntiqi” tələb edir ki, bizim ölkədə heç tibbi maskalar da satılmasın.
Son günlər avtomobil qəzalarında kütləvi, ailəvi qətliamlar adi hal alıb. Neyləməli? Əlbəttə, avtomobil satışı qadağan olunmalıdır.
Adamlar hündür mərtəbədən atılıb intihar edir, qoy 2 qatdan hündür binaların tikintisi qadağan olunsun. Və sairə. Bu qadağaları sonsuza qədər uzatmaq olar. Təki ölkədə sabitlik olsun. Marqans sabitliyi - əgər kefiniz istəsə bunu belə də adlandıra bilərik.
Uzun axtarışlardan, kalium permanqanatı kəşf edənin var-yoxunu, onu yoxa çıxardanların isə yeddi arxa dönənini yaxşıca yad edəndən sonra mən, nəhayət, bu absurd axtarışı dayandırdım və Tibb Universitetində oxuyan bir qohumdan azacıq marqans ala bildim. Qızıl kimi şeymiş bu! Qohum onun bir çimdiyini kağıza büküb verdi, avtobusda hər an qorxurdum ki, birdən oğrular üstümdə marqans olduğunu bilərlər. Bərk-bərk qucaqlamışdım marqansı. Heç acığa yardıma ehtiyacı olana da vermədim, qoydum evdə gözəl bir yerə, indi marqansa baxıb həzz alıram. İlk fürsətdə marqansla şəkil çəkdirib aptekləri dolaşacam, fotonu göstərib yanıq verəcəm. Qoy partlasınlar - mən əziz marqansıma qovuşdum!
“Partlasınlar” demişkən... Marqans axtararkən məndə çox önəmli bir fikir də yarandı: tezliklə bertole duzu tapmalıyam. Belə ölkə olmaz...

995 dəfə baxılıb