DEMOKRATİK KƏRƏNAY | Yeni Müsavat

	30 iyul 2010


Onlayn ictimai-siyasi qəzet

Zamin HACI
zaminhaci@gmail.com

DEMOKRATİK KƏRƏNAY

Xarici işlər nazirinin müavini Araz Əzimov «Media forum» saytına deyib ki, bloqçular Emin Milli və Adnan Hacızadənin həbsinə xaricdən reaksiyaları veclərinə də almırlar. Sitat: «Ayrı-ayrı dövrlərdə müxtəlif məsələlərlə bağlı o qədər belə bəyanatlar görmüşük ki...» Doğru buyurur Araz əkə. Onun təmsil elədiyi hakimiyyət xaricdən, demokratik Qərbdən verilən etiraz bəyanatlarını peysərə ötürməkdə, qulaq ardına verməkdə 14 illik böyük təcrübəyə malikdir.

Çünki bu bəyanatların bir oyun qaydası olduğunu, əslində heç bir konkret anlam daşımadığını gözəl bilirlər. Ortada sanki bir anlaşma var, Azərbaycan hakimiyyəti insan azadlıqlarını istədiyi qədər boğa bilər, Qərb isə bəyanatlar verər, qurtarar gedər.
Almaniya guya Avropanın ən demokratik ölkələrindən sayılır, ancaq biz onun burada səfirliyi olmasını az qala unutmuşduq. Yaxşı ki, bloqçular tutulanda bu ölkədən etiraz bəyanatı gəldi, qocaman Almaniyanın hələ sağ olduğunu bildik. Hərçənd, Xarici İşlər Nazirliyimiz alman səfirliyinin siftəsini, deyəsən, kor edəcək. Səfiri nazirliyə çağırıb danladılar, nota verdilər. Ey gidi dünya, gör Almaniya nə günə qalıb, Azərbaycan ona nota verir, «bizim müstəqil məhkəmələrin işinə qarışmayın» deyir.
Dünən isə ABŞ səfirliyinin müvəqqəti işlər vəkili Donald Lu 2 saylı Mərdəkan internat məktəbinə 5600 dollarlıq musiqi alətləri bağışlayıb. Kərənay, saksafon, zərb alətləri və sairə. Ötən iki ildə ABŞ səfirliyi bu məktəbə 11500 dollarlıq musiqi alətləri veribdir.
Çox gözəl işdir, buna görə xalqımız amerikalılara minnətdardır. Həmin yetim uşaqlar bu alətlərdə çalıb böyüyəndə ən azı toyxanalarda iş tapa biləcəkdir. Amerika çoxdan başa düşüb ki, biz elə zurna çalmağa yarayırıq, demokratiya bizlik deyil. Yapokratlar ölkəni talasın, xalq da kərənay çalsın. Yeri gəlmişkən, bu alət özbək zurnasının adıdır. Bizə kərənay vermək bizim özbək rejiminə doğru getməyimizin işarəsidir. Ümumiyyətlə, ölkəmizdə saksafon, zurna çalmaq işinə yaxın illərdə böyük tələbat olacaqdır. Məsələn, Ucar-Yevlax yolunun açılışında zurna çalanlar dəstəsi lazımdır. Bəlkə Mərdəkan internatında saksafon çalanlar içindən gələcəyin «Bill Klintonu» da çıxacaqdır. Hələ sovet dövründən bizim əsas ideoloji şüarımız «Çal, aşıq, çal, komsomolun canı it canıdır» şəklində idi. Çalıb-oynamağa meylli camaatıq.
Söz düşmüşkən, ABŞ hələ də ölkəmizə səfir qoymağa çətinlik çəkir. Bu günlərdə vəkil dostlarımızdan maraqlı təklif almışam, onlar deyir ki, qoy Amerikanın Azərbaycandakı səfirini də elə... Azərbaycan hakimiyyəti təyin eləsin. Gerçəkdən, yaxşı olar. O qədər kadrımız var, Eskuderonu fırıldaq bulağına susuz aparıb susuz gətirərlər. Qoyarıq birini ABŞ səfiri, qurtarar gedər. Guya nə fərqi var, alverçinin onsuz da milliyəti olmur.
Sonda dəyərli insan, cəsur hərbçi, yapokratiyanın zülmündən Norveçə mühacirət etmiş polkovnuk İsa Sadıqovun məktubunu çap edirəm: «Bir neçə il öncə burada bir konkursda iştirak edirdim. Finalda iki qrup qaldı, hesab da 4-4 idi. Sual vermək növbəsi mənim idi, dedim Azərbaycan. Onlar bu ölkə haqda bildiklərini deməli idilər. Azərbaycan sözünü eşidən kimi hamısı dedi »neft", elə bildim uduzduq, çünki axırıncı sualı vermişdim. Ancaq rəqib komanda dərhal cumdu xəritəyə, özü də Afrika qitəsinə. Bir az sakitləşdim, ancaq ürəyimdə fikirləşdim ki, biabır olduq, Azərbaycan hara, Afrika hara... Ən azı iki dəqiqə axtardılar, Afrikada ölkə qalmadı barmaq gəzdirməsinlər, özü də əsasən Zimbabve və Konqo arasında axtarırdılar. Sonra qrupdan biri mənə diqqətlə baxdı, dedi ki, bilirəm, o özü Azərbaycandan gəlib və qara deyil, yəqin bu ölkə Orta Asiyada, ya da ərəb ölkələri içindədir. Nə isə, Azərbaycanı tapa bilmədilər, biz də böyük mükafat aldıq. Ancaq uzun müddət xəcalət çəkdim ki, gör mənim ölkəm nə günə qoyulub, Ermənistan, Gürcüstan deyilən kimi hamı dərhal tapır, bizi isə tanıyan yoxdur. Mən bu gün «minnətdarlıq» edirəm ölkə rəhbərlərinə - artıq bizi insan haqları boğulan ölkə kimi tanıyırlar. Azərbaycanın pis xəbərlərindən artıq dünyanın qulağı dolub. Bizə yazıq kimi baxırlar, biləndə ki, Azərbaycandan gəlmişik".

1187 dəfə baxılıb