BİR ÇANTA ZARAFAT | Yeni Müsavat

	30 iyul 2010


Onlayn ictimai-siyasi qəzet

Zamin HACI
zaminhaci@gmail.com

BİR ÇANTA ZARAFAT

Bizim ölkədə idarəetmə üsulunun zarafatdan ibarət olduğunu ötənlərdə yazmışdıq, hər gün bunun sübutu baş verir. Əslində indiki hakimiyyətin köklərində Şən və Hazırcavablar Klubuna sevginin durması əvvəl-axır idarəetmə üslubuna da tam təsir etməliydi. Elə həmin klubun bu hakimiyyətin gəlişi ilə - 2003-cü ildən sonra iflasa uğraması təbii idi. Daha hansısa qapalı klub çərçivəsində aktyorluq eləməyə ehtiyac qalmamışdı, bütün dövlət zarafatla, məzə ilə yürüdülürdü.

Deputat Qüdrət Həsənquliyevin çantasını Bakı hava limanında yox eləyiblər. Hər kəs, o cümlədən yoldaş Həsənquliyev də dərhal bu bəd əməldə AZAL şefi Cahangir Əsgərovun barmağı olduğunu söylədi, yazdı. Səbəb çox sadədir: keçən həftə Həsənquliyev deputatxanada Əsgərovun qarasına xeyli danışmışdı, onu Naxçıvana təyyarə biletini bahalaşdırmaqda, şəxsi təyyarə saxlamaqda, ümumiyyətlə korrupsiyada suçlamışdı. Buyur, bu da deputat çıxışının nəticəsi - adamın çantasını elə yoxa çıxardıblar heç izi-tozu qalmayıb. “-Çanta görmüsən? - Qığını da görməmişəm”. Hava limanında deputatla bu cürə danışıblar.
Sizə deyim ki, yoldaş Həsənquliyev yaxşı qurtardığına görə pirə-filana nəzir verməlidir, çünki yoldaş Əsgərov hakimiyyətin zarafat səhnələrində daimi personajlardan biridir, hətta bir çox səhnəciklərin müəllifidir. Məsələn, vaxtilə teatrın direktoru qocaman Murtuz Ələsgərovla məzələnmək üçün onu cin bazarına - birbaşa Fələstinə, Yasir Ərəfatın dəfn mərasiminə göndərmişdi. Orda da bilirsiniz də, yası necə yola verirlər - bir dəstə adam meyiti götürür çiyninə, bağıra-bağıra, güllə ata-ata yürüyür. Orda yas mağarından getmək istəyən şəxs mollaya “bir fatihə ver” söyləmir, deyir avtomatdan bir daraq boşalt, bizim qalxmaq vaxtımızdır. Molla o yanda, bunlar bu yanda - taqqataraq düşür. İndi təsəvvür elə o dəlixanada onsuz da ürəyi yuxa Murtuz yoldaş nə günə qalıbmış. Uzun sözün qısası, Murtuz yoldaş Bakıya qayıdanda isə bu dəfə Əsgərovun girinə keçmişdi, hava yaxşı olsa da onun təyyarəsinə enməyə icazə verməmişdilər, Bakı üzərində yarım saat fırladandan sonra aparıb Gəncədə salmışdılar, ordan avtomobillə qayıtmışdı. Deyilənə görə yoldaş Ələsgərovun deputatxana müdirliyindən vaz keçməyində bu vaqeənin böyük rolu olmuşdu.
Bax, Canik istəsə Həsənquliyevin uçduğu təyyarəni aparıb Nargin adasına endirərdi. Ya da heç endirməzdi, göydə saxlayardı. Kim nə deyə bilərdi? Adam ünlü sənətkardı, kəsdiyi başa, qayırdığı səhnəciyə etiraz haqqı heç kimə verilməyib. Ancaq öz aramızda qalsın, tənqidə görə çanta yox eləmək çox düşük zarafatdır.
Əlbəttə, təqsirsizlik prezumpsiyasına görə biz çantanın qəsdən oğurlandığını tam deyə də bilmərik. Bizim hava limanında belə oğurluqlar tez-tez olur, hətta bu yaxında çanta oğurlayan cinayətkar qrup yaxalanmışdı. Yəni orada çantanın yox olmağı bir növ təbii haldır.
Həsənquliyev oğurluqla bağlı baş prokuror Qaralova müraciət edib. Halbuki gərək NATO-ya şikayət edəydi, çünki çanta yoxa çıxan gün o, NATO-nun Avropadakı bir tədbirindən qayıdırmış. Dəli şeytan deyir ki, ola bilsin Həsənquliyevin çantasında NATO-nun hansısa məxfi sənədləri olubdur. Məsələn, BAXCP-nin bəyanatına münasibət, Zəlimxan Yaqubun poemalarının Şimal Alyansının Əfqanıstandakı əməliyyatlarına təsirinin sxemi, NATO və Vasif Talıbovun şərqə doğru genişlənməsi arasında ziddiyyətlərin analizi və sairə. İndi bu sənədlər oğruların əlində xalqımızın ziyanına işləyəcək.
Dünyada təsadüfi heç nə yoxdur, elə Zəlimxan əkə də bizim bu cızmaqaranın axırına boş yerə düşməmişdir. Dünən qəzetdə oxudum, yoldaş Yaqub deyib ki, “nəğməkar şair”, “bəstəkar şair” kimi ifadələri boş, cəfəngiyyat, qondarma hesab edir.
Gerçəkdən, bunlar boş şeylərdir, bu dünyada çalışıb saray şairi olmaq lazımdır. Zarafatsız.

1095 dəfə baxılıb