ŞƏRBALANIN SEÇKİSİ | Yeni Müsavat

	12 mart 2010


Onlayn ictimai-siyasi qəzet

Zamin HACI
zaminhaci@gmail.com

ŞƏRBALANIN SEÇKİSİ

Mən bələdiyyənin donuz qripi kimi yeni virus növü ola biləcəyini yazmışdım, ancaq indi görünür ki, daha pis bir şeymiş.

Bələdiyyə seçkisinə namizədlərin qeydə alınması başa çatdı, dünən Məzahirin Saxtakarlıq Kontoru - bizdə MSK işarətinin açması bu cürdür - seçkiyə buraxılanların sayını açıqladı. Olduqca gülünc siyahıdır, guya YAP-dan 15388, Müsavatdan isə 125 namizəd keçə bilib. Hətta bəzi oyuncaq “müxalifət partiyalarına” - adlarını çəkməyə belə həvəsim yoxdur, çünki bu yazı həşəratlara həsr olunmayıb - Müsavatdan çox yer verilib.
Hakimiyyət bununla nəyə nail olmaq istəyir? Gerçəkdən, bunlar başa düşmürlər ki, vintləri çox sıxmaq onların sıradan çıxmasına gətirir, cəmiyyət də eləcə. Sürüylə dolaşan manqurtlar, zombilər kütləsinə baxıb zövq alacağını düşünənlər yanılır. Çünki zombilər arasında uzun zaman yaşamaq hətta nəzarətçiləri də zombiləşdirir.
Müsavat başqanı İsa Qəmbər qəzetimizin “iqtidar mənasız, heç bir səlahiyyəti olmayan bələdiyyələrə seçkidə niyə müxalifətə görünməmiş təzyiqlər edir” sualına cavabında çox doğru buyurmuşdu ki, hakimiyyət xalqın azacıq fəallığından da qorxur.
Bizim iqtidar kölgəsindən ürkəcək hala gəlib. Çünki bu da tarixin bir aksiomasıdır: nə qədər qorxutsan, o qədər qorxacaqsan.
Ramiz Mehdiyevin ardıyca Arif Rəhimzadə də deyib ki, guya müxalifət bələdiyyələrə YAP üzvlərinin, hətta ölülərin namizədliyini irəli sürübmüş. (Hərçənd bu iki kateqoriyanı xüsusi ayırmağa ehtiyac yox idi, ikisi də eyni şeydir). Qabaqlar belə şeyləri iqtidar edərdi, ən azı ölülərin yerinə qutulara bülleten basardılar. Yerlərin dəyişməsi yeni göstərici sayıla bilər, deyəsən iqtidar həm də özünə müxalifət olmağa başlayıb. Masallıda bələdiyyə namizədinin həbsi, yapçı deputat Əhəd Abıyevin isə onun müdafiəsinə qalxması da bunun əlamətidir.
Ağcabədidə bələdiyyəyə namizəd olan müsavatçılara təzyiqlər lap absurd şəkildə imiş. Məsələn, 70 yaşlı bir müsavatçıya icra hakimiyyətində, büdcə təşkilatlarında çalışan arvad tərəfdən qohumları təzyiq edib, namizədliyini geri götürməsə... arvadını boşatdıracaqları ilə hədələyiblər. Təsəvvür edirsinizmi? Adam da məhz abırsızlığın bu dərəcəyə çatmasına dözməyib, namizədliyini geri götürüb. Gerçəkdən, 70 yaşda təzə arvad tapmaq çətin işdir, cəhənnəm olsun bələdiyyə... Başqa bir namizədin icra hakimiyyətində çalışan qohumu isə onun önündə diz çöküb ağlayıb, namizədliyini geri götürməsə işini itirəcəyini söyləyib. Namizədliyini irəli sürmüş müsavatçılardan ailə üzvlərinin donuz qripi olmadığı haqda arayış, saxladıqları mal-qarada dabaq və bruselyoz xəstəliklərinin olmadığı, həyət itlərini peyvənd etmələri haqda arayışlar istəyiblər. Azərbaycanda indiyə qədər hələ belə idiot seçki prosesi görünməmişdi.
Kürdəmirdə 57 saylı Dairə Seçki Komissiyası paytaxtdan verilən göstərişə tam əməl edib, namizədliyini irəli sürmüş 333 müsavatçıdan 1 nəfəri də (!) qeydə almayıb. Ancaq bu maraqlı deyil, ən maraqlısı həmin DSK-nın sədrinin adıdır. Sizcə, bu adamın adı nə ola bilərdi? Buyurun: ŞƏRBALA Səfərov! (Fərqləndirmə mənimdir - Z.H.) Doğrusu, bu haqda mənə xəbər veriləndə öncə şübhələndim, baxmayaraq ki, xəbəri ən etibarlı bir yoldaşdan almışdım. Sonra Mərkəzi Seşki Komissiyasının rəsmi saytından bu adamın adını dəqiqləşdirdim, gördüm ki, adı elə Şərbaladır. Forma ilə məzmunun bu qədər üst-üstə düşməsi hətta Azərbaycanda da adamın kefini açır. Kürdəmir müsavatçılarından dilxor olmamağı rica edirəm.
Lənət şeytana, gərək hansı səviyyəyə yuvarlanasan ki, dünyaya gəlmiş övladına “şərin balası” adını qoyasan. Ya Şərbalanın ayrı anlamı var, mən bilmirəm? Bütün hallarda həmin ata çox səmimi, uzaqgörən kişi olmuşdur.
Mümkündür ki, uşaq şər qarışan vaxt - bizim el arasında axşam düşən çağa belə deyirlər - doğulduğu üçün adı Şərbala qoyulub.

952 dəfə baxılıb