DANIŞIQLARIN AVTOBUSDA BİTMƏSİ

	03 sentyabr 2010


Onlayn ictimai-siyasi qəzet

Zamin HACI
zaminhaci@gmail.com

DANIŞIQLARIN AVTOBUSDA BİTMƏSİ

Həmişə belə olur. Ona görə də hakimiyyətimiz işğal olunmuş torpaqları guya hərbi yolla qaytaracağı ilə hədələyəndə mən camaatımız sarıdan narahat oluram. Yox, savaşda gənclərin həlak olması ehtimalını göz önünə gətirmirəm, onsuz da bizim yapokratların dava-dava oyunlarının mənasız söz yığını, avam kütlələri sakitləşdirmək, gözə kül üfürmək, saqqız kimi uzanan sülh danışıqlarında uğursuzluğun günahını başqalarının üzərinə yıxmaq üçün olduğunu Qafqazda azca ağlı olan hər kəs bilir.

Yeri gəlmişkən, bugünlərdə televiziyaların birində xəbər gedib ki, Türkiyənin xarici işlər naziri Davudoğlu Azərbaycan və Ermənistan prezidentləri arasında son görüş barədə məlumat almaq üçün Elmar Məmmədyarovla telefonla danışıb, sonra isə onu Türkiyəyə dəvət edib. Dostumuz Qaşqay bəy bunu belə izah edir ki, Davudoğlu Məmmədyarovun nə dediyini telefonda heç cür anlamayıb, çağırıb Ankaraya, deyib bəlkə üzbəüz başa düşərəm bu zalım suaxili dilinin qədeş ləhcəsində nə qırıldadır.
O cümlədən, iqtidarın savaş ritorikasını ermənilər belə qiymətləndirdi ki, əşşi, onsuz da Azərbaycan rəhbərliyi daxili auditoriya üçün həmişə belə sözlər deyir, bu dəfə istiot bir az çox olub, ziyan eləməz.
Tam doğru sözümdür, dünən “Neftçilər” metrosunun girişində bir dəli gördüm, o öz-özünə danışırdı və çox qəribə bir cümlə işlətdi: “Azərbaycanın 86 faizi işğal olunub, qalan 14 faizlə neyləyə bilərik?”. Vaxtım az idi təəssüf ki, yoxsa onu söhbətə tutub torpaqlarımızın işğalına bu tam yeni yanaşma tərzinin incəliklərini öyrənərdim. Mən hələ belə ağıllı dəli görməmişdim, neçə saatdır o cümlənin təsiri altındayam.
Qayıdaq mövzuya, yoxsa az qala Xankəndinə gedib çıxmışıq, ya da Səfər Əbiyev demişkən, “İrəvandan o yana”.
Mən yapokratiyanın savaş ritorikasının artmasından ona görə narahat oluram ki, hər dəfə belə çıxışlardan sonra bəlkə daxili psixoloji gərginlik artır, ya nəsə ayrı şey olur - ölkədə Qarabağa dəxli olan bədbəxt hadisələr baş verir. Buyurun, indi də çox keçmədi. 24 noyabrda Pirəkəşkül yaxınlığında zirehli transportyor sərnişin avtobusu ilə toqquşdu, adamlar yaralandı. Dünən isə Dərnəgüldə qarabağlı məcburi köçkünlərin yaşadığı yataqxana yandı.
Yoldaşlar, bəs bilmirdinizmi alovlu çıxışlarınızın qığılcımları yataqxanaya düşüb yandıracaq? Savaş qazını çox edəndə zirehli maşını saxlamaq çətinləşəcək, o da Qarabağ uzaq olduğundan elə yaxındakı avtobusa girəcək? Sözgəlişi, Bakıda və ətrafında zirehli texnikanın sayı bəlkə Qarabağ bölgəsindəkindən çoxdur. Səbəbi aydındır: hakimiyyəti qorumaq vətəni qorumaqdan vacibdir.
Bu arada İlham Əliyevin Rusiyada səfər zamanı Ulyanovskda - Vladimir İliç Leninin ata yurdunda söylədiyi sözləri ən yaxşı halda zarafat, rus prezidenti Medvedyevə yönəlmiş qara yumor saya bilərik. Sitat: “Əgər dünyada bütün münasibətlər Rusiya və Azərbaycan arasındakı münasibətlər kimi olsaydı, o zaman heç bir problem də yaşanmazdı”. Gerçəkdən, yaxşı zarafatdır, şəxsən mən çox bəyəndim. Rusiya Qarabağı faktiki işğal edib Ermənistana boşqabda verən, milyardlarla dollarlıq silah bağışlayan, orada yerləşdirdiyi hərbi bazalarla bizi daim hədələyən bir irticaçı dövlətdir. Əgər onun Azərbaycana bu münasibəti başqa dünya ölkələrinə örnək göstərilirsə... Daha nə yazım. Xeyirli olsun.
Sadəcə, Türkiyənin üstünə niyə tökülüşmüşdük, anlaşılmır. O da elə Rusiya ilə münasibətlərimizə bənzər münasibəti bizə göstərmək istəyirdi.
Avtobuslarda, yataqxanalarda bu aralar ehtiyatlı olmaq gərəkdir. Ölkədə savaş rüzgarları əsir...

1145 dəfə baxılıb