ABIYEV ABIYEVLİYİN İDEOLOQUNA QARŞI

	09 fevral 2012


Onlayn ictimai-siyasi qəzet

Şahvələd ÇOBANOĞLU

ABIYEV ABIYEVLİYİN İDEOLOQUNA QARŞI

Əhəd Abıyev abıyevliyin ideoloquna, yəni Ramiz Mehdiyevə qarşı danışdı. Onu təəccübləndirən, qəzəbləndirən odur ki, bu ölkədə ona da mane olurlar, ona da hörmət yoxdur. Axı bu necə ola bilər? Axı bu ölkə Əhəd Abıyev kimilərinin ölkəsi deyilmi? Onda kimin ölkəsidir? Abıyev bu ölkə üçün nələr etməyib?! Ən bədnam böhtanları səsləndirib, ən bədnam işlər görüb. İndi onun adamlarını da, onu da incidirlər?!

Əhəd Abıyevi yandıran odur ki, maraqları naminə hər şeyə getdiyi hakimiyyət ona yiyə durmur, onun maraqlarını tapdalayır. Əhəd Abıyev bunu əvvəlcədən görmürmüş. Öz statusunu anlamırmış. Bilmirmiş ki, o, yeganə deyil, əvəzsiz deyil, bu ölkədə onlardan çoxdur. Bu ölkə elə onların ölkəsidir, amma iş başında biri olmaz, başqası olar...
İndi Abıyevə bir vaxt “danış” deyən dillər, ona “sus” deyəcəklər. Lazım gəlsə, başqaları da ona qarşı danışacaq. Lazım gəlsə, susdurmağın başqa yolunu tapacaqlar. Abıyev bir şeyi anlamır ki, əleyhinə danışdığı, qarşı çıxdığı Ramiz Mehdiyev onun özünü Əhəd Abıyev edən siyasətin başında duranlardan biridir. Abıyevliyin ideoloqu, ölkəni abıyevlərin ölkəsinə çevirmək işinin icraçısıdır. Birincinin birincisidir.
Hegel deyirdi ki, şahlıqlarda, Şərq ölkələrində yalnız bir adam azad olur. Yalnız bir adamın tam hüququ var. Əhəd Abıyevlərin statusu, azadlığı isə nisbi, müvəqqəti, aldadıcıdır. Azadlıq olmayan ölkələrin hamısında belədir. Hətta Ramiz Mehdiyev bir gün Abıyevin durumuna düşə bilər.
Abıyevin indiki halı, qışqırması maraqlıdır, amma danışar da, susar da mahiyyətcə bir şeydir. Amma Abıyevə, onun qarşı çıxdığı Ramiz Mehdiyevə, ümumiyyətlə onların təmsil etdiyi rejimə qarşı bu xalqın içindəki nifrət susmaq bilmir. Çünki Azərbaycan çoxdan bu xalqın deyil. Onun əlindən hüquqları alınıb, onun haqları, hakimiyyəti qəsb edilib. Onun parlamenti siyahı ilə müəyyənləşən oyuncağa çevrilib. Onu oğrular idarə edir. İndi bu ölkə oğrularındır, doğruların yox. Amma hər oğru da özünü istədiyi kimi apara bilməz. İş bundan ibarətdir...

Daha bir neçə söz...

Xalqın içindəki nifrət hissi nə üçün çox ucadan səslənmir? Nə üçün bu ölkəni Neft-Qaz Çıxarma idarəsinə çevirənlərin qulağı bu nifrətin səsindən tutulmur. Qorxu haqda düşünün. Qorxunun mahiyyəti belədir. O ürəklərə hakim kəsiləndə milçəyi filə döndərir. Lakin o ürəklərdən qəfil çəkilə bilir və bu zaman ondan qurtulanlar fili də milçək kimi görə bilir.
Daha bir neçə söz isə Asif Atanın “Mənalar” essesindən...

Vəsiqələrlə yarpaqlananlar.
Bağçasında meyvə bitmir dahi bağbanın.
Avgi tövləsindən cənnət törəyəcək!...
Fəal olduğu dərəcədə fəaliyyətsiz!
Beyinlərini həqiqətin üzünə bağlayanlar!
Doğr”uluq oğurlandı!
Zurna bağırır ki, “Sağ qalmışam!”
Saz çağırır ki, “Sağ qalmışam!”
Tar səslənir ki, “Sağ qalmışam!”
Kaman dillənir ki, “Sağ qalmışam!”

631 dəfə baxılıb