BARMAĞIMIZ KOSMOSDA | Yeni Müsavat

	03 sentyabr 2010


Onlayn ictimai-siyasi qəzet

Zamin HACI
zaminhaci@gmail.com

BARMAĞIMIZ KOSMOSDA

Rabitə naziri Əli Abbasov - əslində onun idarəsinin adında “informasiya texnologiyaları” kimi mənasız ifadə də yer alır və heç bilən yoxdur bu nə deməkdir - uca millətimizə göz aydınlığı verdi, Qurban bayramı günlərində sevindirdi bizləri. Kosmosa peyk uçurtmağımız haqda yapokratiyanın vədi yerinə yetmək üzrədir, uzağı 2011-ci ildə Yer kürəsinin başına “Azərsat” adlı bir haqq-hesab dolanacaqdır.

“Haqq-hesab” ona görə yazıram ki, hələ bilinmir bizim peykimiz nə formada olacaqdır. Mümkündür ki, onu ya badımcan, ya da xalqın təpə-qapaz edilməyinin şərəfinə polis dəyənəyi şəklində qayırsınlar.
Peykin uçmağı dövlətimizə cəmi-cümlətanı 200 milyon dollara başa gələcəkdir, deyirlər ki, uzağı 5-6 ilə peyk mayasını çıxardacaq, üstəlik gəlir gətirəcək. Hansı yolla? Peykimizdən yararlanmaq istəyənlərə icarəyə verəcəyik.
İndi bəzi uzağı görməyənlər deyir ki, 200 milyon dollarlıq peyk haramıza yaraşır, ölkədə 1 milyon qaçqın, 1 milyon yetim-yesir, 10 min ac məmur və sairə varkən, dövlət onları yedirməkdə çətinlik çəkərkən bizim kosmosda nə itimiz azıb. Guya kosmos ABŞ, Çin, Rusiya kimi fövqəldövlətlərin oyuncağıdır. Qəti razı deyiləm, ona qalsa ÜDM artımında kainatda birinci yerdəyik, neçə dənə yeraltı keçid qazmışıq, aftafa zavodumuz var, regionlarda dəvəyağlama fabrikləri də öz yerində. Kosmosa uçmaq, lazım gəlsə hələ o yana da keçmək elə bizə yaraşır.
Ancaq məlum məsələdir ki, biz yerdə yolu necə çəkiriksə göydə yolu da elə çəkəcəyik, çünki kosmosa peyk uçurtmaq göyə yol çəkmək kimi bir zaddır. (Kimin kefi istəsə hələ “şeydir” söyləyə də bilər). Nəqliyyat naziri Ziya Məmmədov 1 kilometr çala-çuxur yolu 10-15 milyon dollara necə minnətlə çəkirsə, bizim kosmosa uçan peykimiz də 200 milyon dollara o cür uçacaq. Şübhəniz olmasın, bu 200 milyon dolların hardasa 100 milyonu yeyinti olacaq, mümkündür ki, bizim peykimiz heç kosmosa çatmamış düşsün bəşəriyyətin təpəsinə, qanqaraçılıq olsun. Ermənilərin başına düşməyinə etiraz etmirik, bəlkə bu yolla işğal problemi də həll edilər, necə ki, Məmmədovun çəkdiyi asfalt böyrək daşı, öd daşı kimi xəstəliklərin müalicəsində əvəzsiz rol oynayır.
Yox, əgər peyk uçub orbitə çıxa bilsə yenə problem yoxdur. Ondan qəşəng məqsədlərlə istifadə edəcəyik. Məsələn, peykin pəncərəsinə maqnitofonda Ağadadaşın ifasında “O elə bir zirvədir”, Ədalətin “Ay qız, keçmə bizim məhlədən” kimi hit mahnıları qoyub Yer kürəsini feyziyab edə bilərik. Peykin tualetini Ermənistan üzərində boşalda bilərik. Yaxud peykə elə trayektoriya vermək olar ki, o, kosmosda YAP-ın embleminin şəklini cızsın - dalından mavi tüstü buraxaraq. Bələdiyyə seçkisində yaxşı reklam aksiyası olardı.
Yeri gəlmişkən, mən Ziya Məmmədovu heç anlamıram, ya da ola bilər onun qələminin qırılmağı dəqiqdir. Yoxsa necə ola bilər, göyə bu boyda, 200 milyon dollarlıq yol çəkilir, ancaq bu layihənin içində nə Elton var, nə Anar var, heç Cavid Qurbanov da yoxdur! Halbuki, ən azı “Transgeyt” şirkətinə pul buraxmaq olardı, Çindən uzun, rahat avtobus-peyklər alıb gətirərdilər, Azadlıq meydanına düzərdilər.
Bu peyk məsələsində yeganə minus cəhət odur ki, peyk uçurduruq. Bəli, təəccüblənməyin. Məncə, bizim dövlətin imkanları, pulunun çoxluğu imkan verirdi ki, biz birbaşa kosmik gəmi uçurdaq, ən pis halda. Yaxşı halda kosmik orbital stansiya da quraşdırmaq imkanındayıq. Əcəb layihə olardı, bütün dövlət aparatını, deputatları, icra başçılarını, prokuror və hakimləri yığardıq kosmik gəmiyə, uçurdardıq Andromeda dumanlığına. Niyə ora, onun da səbəbi var. Alimlər deyir ki, bizim qalaktika sürətlə Andromedaya doğru uçur, neçə milyardsa ildən sonra orada olacağıq. Qoy nazir-mazirlərimiz gedib orada xalqın qarşılanması, rahatlığı üçün şərait yaratsınlar. Biz də uçub çatan kimi ayağımızı isti vannaya salaq.
Heç bizim ölkədə kosmonavt hazırlamağa da ehtiyac yoxdur. Neçə illərdir çəkisizlik şəraitində, acqarına havada uçuşuruq, dombalaq aşırıq. Tapanda yediyimiz də pasta-mastadır, xəstəlik həbləridir. Öyrəşmişik biz kosmik şəraitə.
Saturndan halqa vurub Marsda satmaq da olar. Marsda yaxşı yarmarka yerləri var. Yoxsa peykin adını niyə “Azərsat” qoymuşuq? Adıyla böyüsün...

998 dəfə baxılıb