KÖTƏYİ CƏNNƏTƏ GERİ YOLLADIQ

	30 iyul 2010


Onlayn ictimai-siyasi qəzet

Sevinc TELMANQIZI

KÖTƏYİ CƏNNƏTƏ GERİ YOLLADIQ

Son günlər cəmiyyətdə bir feminizm, qadın təəssübkeşliyi dalğası başlayıb ki, gəl görəsən: bəyanatın, tədbirin, yeni qanun layihələrinin biri beş qəpiyə. Son olaraq srağagün parlamentdə qadın zorakılığı mövzusu müzakirə olundu. Deputatlar, rəsmi struktur rəhbərləri, eləcə də beynəlxalq təşkilat nümayəndələri elə alovlu danışdılar ki, dedim yəqin bu ölkənin bir nömrəli problemini həll etməyə hazırlaşırlar. Keçmə bəzi qorxaqların belə zərərsiz mövzularda yeri-göyü dağıtmalarından. Demək, problem qadına qarşı zorakılıqdır, amma ortada konkret günahkar yoxdur - arvadını döyən əli, narkoman vəli və ya təcavüzkar pirvəli... Onun canına döşəməyə də nə var ki?

Zarafat deyil, o boyda Avropa Şurasının(AŞ) o boyda baş katibinin Azərbaycandakı xüsusi nümayəndəsi Veronika Kotek də müzakirələrdə dilə gəlib və deyib ki, AŞ Azərbaycanda bu problemin həllinə dəstək verəcək. Ura!!! AŞ-nin bu günə qədər ölkədəki demokratikləşmə prosesinə verdiyi saysız-hesabsız töhfələri xatırlayanda adamın qəlbi dağa dönür. Bilirsən ki, AŞ-nin bu dəstəyindən sonra ölüsü bir-iki günə arvadını döyən bütün vəhşi kişilər onların qabağında diz çökərək, İlhan Şeşenin o məşhur mahnısındakı kimi “son zamanlar yapdıqlarıma baxma ne olursun, benim aklım başımda deyil...” mahnısını oxuyacaqlar. Özü də əllərində çiçəklərlə. Görərsiz.
Tədbirin ən sensasiyalı, “po bolshe zəhrimar” olan qismi isə sonda baş tutub. Dinləmələrin sonunda qadınlara qarşı zorakılığı pisləyən bəyanat qəbul edilib. Di gedin, qadın düşmənləri! Bunu istəyirdiniz? İndi o bəyanatdan sonra kimin nə haqqı var qadına gözün üstə qaşın var desin? Sizə zarafat gəlməsin, 2015-ci ilə qədər bu problemlə bağlı qanunvericilik bazası yaradılacaq. Problemin həlli üçün cəmiyyət maarifləndiriləcək. Ay can, ay can, büdcədən yenə də paraları səpələyəcəklər. O pullarla da bir-iki qaçqın düşərgəsində, yataqxanalarda eynəkli professorlar “qadınlar bir çiçəkdir” tipli fəlsəfi çıxışlar edəcək. Sonrası? Canınıza sağlıq, yenə də milli kişilər yemək dadsız alındığı, uşaq yerli-yersiz ağladığı, arvadın “dili uzandığı” üçün şillə-təpiyini işə salacaq. Nişanlısı tərəfindən döyülən qız yenə də düşünəcək ki, ərə gedəndə vəziyyət düzələcək. Ərə gedəndə özünə təsəlli verəcək ki, hamilə qalanda ona əl qaldıran olmaz. Hamilə olanda da ümidini uşaq dünyaya gələndən sonra ərinin adam olacağına bağlayacaq... Və beləcə, ümid edə-edə yaşayacaq. İnanın ki, vəziyyət də dəyişməyəcək.
Mən demirəm ki, ölkədə belə problem yoxdur və ya onu müzakirəyə çıxarmaq yelbeyinlikdir. Sadəcə, qadın zorakılığına gələnə qədər keçiləsi o qədər yol var ki. Guya bu ölkənin bir nömrəli dərdi qadın zorakılığıdır? Kişilər, uşaqlar, yaşlılar gül vurub bəyəm? Məmləkət insanını hər addımbaşı döyürlər - sözlə, qanunsuzluqla, sayğısızlıqla, ədalətsizliklə. Onların hansı birinin zərbəsi daha yüngüldür ki? Bu ölkə bu sayaq zorakılıqlardan üz-gözü göyərmiş insanlardan ibarət deyilmi? Elə həmin o müzakirələrdə odlu-alovlu danışanların kimliyinə fikir verin. Hərəsinin ayağında ən azı bir düjün “döyülmüş ” günahsız adamlar var.
Digər bir tərəfdən, bilirsinizmi bizim kimi cəmiyyətlərdə belə statistikalar niyə qabarıqdır? Müsəlman ölkəsi olmamız, savadsızlıq kimi faktorların öz yeri var. Amma ən əsası odur ki, bu ölkədə insanların, xüsusən də kişilərin aqressiv olmaları üçün bəs deyincə səbəb yaradılır. Yolda-izdə, iş yerində, dövlət müəssisələrində - hər yerdə hüququ tapdanan, sözün bütün mənalarında döyülən kişinin gücü ancaq zəif və zərif məxluqlara çatır. Hirsini-hikkəsini də ancaq ondan çıxır. Nəticə də göz önündədir. Məncə, qadınını döyən kişini bu əməldən vaz keçirmənin yolu bəllidir - normal cəmiyyət, ədalətli idarəetmə, sivil qanunlar. Birinci ondan başlayaq. Kişilərin o dediyim məşhur mahnını oxuması ancaq bu halda mümkün ola bilər.
Qadınlarla bağlı iki məşhur məsəl var, yəqin bilirsiniz. Birincisi, cənnətin qadınların ayağı altında olması, ikincisi isə qadına vurulan kötəyin cənnətdən çıxması... Deməli, sonuncusunu artıq həll etdik - ellikcə keçirilən müzakirələrdə kötəyi cənnətə geri göndərmişik. Qalıb cənnəti anaların ayağı altına sərməyimiz. Onun üçün də parlamentin bircə müzakirəsi bəsdir...

246 dəfə baxılıb