DAHA BİR NEÇƏ LİTR KOROĞLU

	12 mart 2010


Onlayn ictimai-siyasi qəzet

Zamin HACI
zaminhaci@gmail.com

DAHA BİR NEÇƏ LİTR KOROĞLU

Hakimiyyətin Koroğluya heykəl qoymaq fikrinə düşməsi xalqımızı ruhlandırmışdır. Mən bu mövzuda iki-üç cümlə yazmışdım, ancaq oxuculardan gələn reaksiyaların ardı-arası kəsilmir.

Taleh bəy yazır: “Koroğlunun heykəlini qoymağı Hacıbala Abutalıbova etibar etmək olmaz. O, Bakı İcra Hakimiyyətinin başçısı olana qədər Suraxanının icra başçısı olub, bütün rayon ərazisini heyvan heykəlləri ilə doldurubdur, marşrut avtobusunun sürücüsünə dayanacaqda saxla deyən yoxdur, inanın. Hamı bax belə deyir: ”yeddi qoçun yanında (Əmircan qəsəbəsi) saxla, maralın yanında saxla, ceyranı keçən kimi saxla, Şirlərin (Günəşlinin girəcəyində nəhəng heykəllər) yanında saxla"...Yalnız son vaxtlarda “insan” heykəlləri qoyuldu rayonda, o da məlum məsələdir". Doğrusu, mən hörmətli oxucunun məntiqini anlamadım. Əgər heyvan heykəlləri camaata oriyentasiya baxımından yardımçı olursa, bunun nəyi pisdir? Karl Marksın heykəli it ilində götürülüb, hələ də camaat oranı həmin heykəllə adlandırır. Pis onda olar ki, getdiyin yerin adını bilməyəsən, heç bir adı olmaya. Üstəlik gör necə intim səslənir: “Ceyranı keçən kimi saxla...”
İndi Koroğluya heykəl qoyulandan sonra da xalqımızın qəhrəmanlıq potensialında böyük açılmalar olacaqdır. Məsələn, “Çənlibel” adlı restoranlarda yeyib-içəndən sonra gənclərimizin necə aslana dönməyini çox görmüşük. Ola bilər ki, gələcəkdə cavanlar Koroğlunun heykəli önündə and içib əsgərliyə yollansın, toylarını oradan başlasın və sairə.
Toy demişkən, Elçin Əliyev adlı oxucumuzun daha konstruktiv təklifləri vardır. O yazır ki, Sevgililər Günündə “Gənclik” metrosu ətrafında Əsli və Kərəmə, Leyli və Məcnuna, lap elə Romeo və Cülyettaya da heykəl qoysaq yaxşı olar. Elçin bəy həmçinin mənim təklifimi - Koroğlunu əmək və əhalinin sosial müdafiəsi naziri Füzuli Ələkbərova bənzər düzəltmək haqda - bəyənərək yazır ki, əslində burda məna var. Çünki Koroğlunun başına yığışanlara “dəlilər” deyirdilər, indi sosial müdafiə nazirinin də dəlilərlə məşğul olmaq vəzifə borcudur: “Sadəcə, Koroğlunun 777 dəlisi var idi, ancaq bu hakimiyyətin dəli elədiyi camaatın sayı yüzminlərlədir”.
Bu yaxınlarda bir Amerika internet saytı son 10 ilin ən ağıllı adamlarını seçmişdi, mən təəssüf elədim ki, o 25 nəfərlik sırada Azərbaycandan bircə nəfərin də adı yox idi. Əlbəttə, bu bizim tam ağılsız olduğumuza dəlalət etmir, bizdə də ağıllı adamlar var, sadəcə, amerikalılar paxıllıqdan onların adını siyahıya yazmayıb. Ən azından Misir Mərdanovun - dahi təhsil nazirimizin adını aqillər cərgəsinə yazmaq onların borcu idi. Nəyə görə? Adi bir fakt: biz orta məktəbdən bilirik ki, litr həcm vahididir, uzunluğu isə santimetr, metr, lap pis halda saqqızla ölçmək olar. Ancaq Misir müəllimin çap elədiyi bir dərslikdə kvadratın sahəsini ölçmək üçün belə sual qoyulub: “Tərəfləri 1 litr olan kvadratın sahəsi nə qədərdir?” Di get. Heç bədbaxt (eh, Rəsul bəy, hardasan?) amerikalının ağlına belə dahiyanə kəşf gələrdimi? Mən hesab edirəm ki, tərəfi 1 litr olan kvadratın sahəsi 220 voltdur. Əlbəttə, cavabım doğru olmaya bilər, hər halda Mərdanov qədər ağıllı deyiləm.
Elə Koroğlu heykəli haqda sərəncamla eyni gündə prezident “qəza vəziyyətində olan ümumtəhsil məktəblərinin yenidənqurulmasi ilə bağlı əlavə tədbirlər haqqında” da sərəncam imzalayıb. Sərəncamda 2009-cu il dövlət büdcəsində nəzərdə tutulmuş Prezidentin Ehtiyat Fondundan Təhsil Nazirliyinə 3 milyon manat ayrılması nəzərdə tutulur.
Bütün təhsil qəza vəziyyətindədir, hansısa məktəbin uçuq damını yamamaqla iş düzəlməyəcək. Elə bil getdiyin avtomobil dərəyə yuvarlanıb xurd-xəşil olub, sən isə qanın axa-axa birtəhər salondan çıxıb deyirsən: “Gərək şüşəsiləni dəyişdirim”.

908 dəfə baxılıb