5-ci ADAMI ÖLDÜRDÜLƏR

	03 sentyabr 2010


Onlayn ictimai-siyasi qəzet

Şahvələd ÇOBANOĞLU

5-ci ADAMI ÖLDÜRDÜLƏR

Bu, bir hekayə deyil, gerçəkdən olmuş Azərbaycan reallığıdır

Dekabrın 7-də şəhərdə bir tanışımla rastlaşdım. Salam verdikdən dərhal sonra dedi: “Bəy, 5-cisi öldü!” Əvvəl anlamadım. Təəccübümü görüb dedi: “Özün yazdığını deyirəm. 28 may qəsəbəsində maşın daha birini vurub öldürdü”.

Bundan sonra mənə hər şey çatdı. 2 ay ərzində 5 ölü! Bu ölkəni idarə edənlərə isə heç nə çatmır. Söhbət Bakı-Şamaxı yolunun üstündə yerləşən və 28 may qəsəbəsi adlanan kənddən gedir. Bakıdan uzaq deyil, Xırdalanı keçəndən sonra Müşfiqabad qəsəbəsinə çatmamış yolun üstündə yerləşən bu qəsəbəni yeni salınmış kənd saymaq olar. Tanrının bəlası odur ki, yenilənmiş Bakı-Şamaxı yolu da bu kəndin qırağından keçir. Faciələr də yol istifadəyə verilməyə başlandığı dövrdən başlayıb...
Bundan əvvəl, yəni 1 noyabr 2009-cu ildə qəzetdə yazdığım məqalədən:
“Son illərdə burada böyük bir qəsəbə salınıb. Salınıb deyəndə onu hökumət-zad tikməyib, camaat özü öz başına bir dam qaldırmaqla iri bir kəndin əsasını qoyub. Qəsəbə Qaradağla Abşeronun arasında yerləşir, amma Binəqədiyə baxır. Bizdə hər şey belə kəllə-mayallaqdır. Amma 28 may (adı gözəldir) Bakının bir hissəsinə çevrilib, inzibati tabeliyinə görə paytaxta aid olub. Əhali yeni qəsəbə üçün bunu perspektiv gətirən bir hal sayır. Qoy belə saymaqda davam etsinlər.
Son vaxtlar isə buranın camaatı lap sevinirmiş. Çünki yeni Bakı-Şamaxı yolu gündəlik həyatı, işi-gücü Bakı ilə bağlı olan camaatın gediş-gəlişini asanlaşdıra bilər. Amma bu sevinci dadmamış həmin yol kəndə qəm və yas gətirir. Yaxın vaxtlarda bir-birinin ardınca bu yolda kəndin 3 sakinini maşın vurub. Hər üçü də ölüb. Yas yerində bunu adamlar heç nə olmamış kimi danışırdılar. Yeni yol hələ tam hazır deyil, onun yalnız yarı zolağı istifadəyə verilib. İndi görün tam istifadəyə verildikdən sonra bu yolda nələr baş verə bilər.
Bu yolda qarşı hərəkətləri ayırmaq üçün ortasında beton maneələr qoymaq nəzərdə tutulub. Amma kənd boyu uzun bir məsafədə yolun üzərində bircə dənə də olsun keçid yoxdur. Tuneldən söhbət getmir, bu uzun ölüm məsafəsində adi piyada keçidi zolağı (“zebra”) və işıqfor adlandırmağa hələ də dilimiz öyrəşməyən “svetofor” belə yoxdur. Beton dirəklərdən görünür ki, belə piyada keçidləri ümumiyyətlə nəzərdə tutulmayıb. İndi görün Şamaxı yolu ilə rayonlardan Bakıya, Bakıdan isə rayonlara tələsən sürücülərlə onların qarşısından adlayıb yolu keçən kənd sakinlərini nə gözləyir?! Heç biri də inadından qalmır, o deyir “mən keçəcəyəm”, o biri deyir “yox, mən keçəcəyəm”. Axırda da iş bir az pis qurtarır".
11 noyabr 2009-cu ildə dərc olunmuş yazımdan:
“Ötən həftə Bakı-Şamaxı yolunun üstündə yerləşən (Xırdalandan bir az o tərəfə) 28 may qəsəbəsində baş verən maşın qəzalarında 3 nəfərin öldüyünü yazmışdım. Burada heç bir yol keçidi yoxdur, işarə və qaydalar işləmir, təzə yol salınmasının şövqünə qazı sıxan sürücülər isə piyadaların axırına çıxır. Ümid vardı ki, bəlkə nəsə düzələ, amma xəbər gəldi ki, daha bir nəfəri maşın vurub.
İndi daha bir nəfərin ölüm xəbəri gəldi. Gələn həftəni gözləyək. Bir daha deməyin yeri var: Qədim bir xalqıq, bu boyda keşməkeşli tarixi yol keçmişik, amma Bakı-Şamaxı yoluu salamat keçə bilmirik..."

365 dəfə baxılıb