TOM BİZİM NƏYİMİZDİR

	30 iyul 2010


Onlayn ictimai-siyasi qəzet

Zamin HACI
zaminhaci@gmail.com

TOM BİZİM NƏYİMİZDİR

Yaxud, milli dövlət ədəbiyyatı konsepsiyası

Bir dəfə yazmışdım, yenə yazmağa məcburam: ölkəmizdə tənqidçilik bir peşə olaraq sıradan çıxmaq üzrədir. Özünüz qiymət verin, əgər Prezident Administrasiyasının rəhbəri, akademik Ramiz Mehdiyev də “elm bir biznesə çevrilib, istənilən dövlət məmuru və ya iş adamı pul verib elmi ad alır” yazırsa daha biz nəyi tənqid edək? Əslində bəlkə də iqtidarın yeni taktikasıdır bu, tərifi də, tənqidi də özləri edəcəklər, durumu pis günə salıb sonra bəyənməyəcəklər, beləcə məmləkət çaş-baş qalacaqdır.

Gerçəkdən, mən başa düşmürəm ki, bu iqtidar özü-özünü tənqid edib yenə köhnə üsullarla işləməyə davam edəcəksə bu tənqidin mənası nədir? Bəlkə xalqla məzələnməkdir bunun adı? Yox, inanmıram. Adamın insafı olar, yapokratiya xalqı dərin məhəbbətlə sevir, o üzdən məmurlar 10 metrə çatan hasarlar çəkib camaatdan gizlənirlər. Çünki xalqı görən anda bunlarda xalqı qucaqlayıb bağrına basmaq, o üz bu üzündən maç eləmək arzusu yaranır, bizim xalq isə bir qədər zəifdir, yüngülvari qucaqlayanda qol-qabırğası sınır. Nə isə, bu intim söhbəti yığışdıraq, axırı yaxşı yerə aparmır.
Hə, ondan danışırdıq ki, hörmətli Ramiz Mehdiyev yeni bir məqalə yazmışdır və orada Azərbaycan elmiylə, folklorla, insan haqları ilə, yazıçılıqla, şairliklə, aktyorluqla məşğul olanları yıxıb-sürümüşdür. Məqalə o qədər geniş spektri əhatə edir ki, mən burda onun hamısını şərh edə bilmərəm. Həm də, sizdən nə gizlədim - dərrakəm o səviyyədə deyil. İçində Fukuyamadan, Habermasdan-zaddan danışılan dərin məqalələri oxuyanda mənim başım ağrıyır.
Heyran qalınası şəxsdir Ramiz bəy. Bundan qabaq televiziyalardan bir məqalə yazmışdı, ölkə telekanalları nəticə çıxartdılar, indi hamısı güzgü kimi göstərir. Təzə məqalədən sonra da yazıçılarımız, şairlərimiz dünyaya səs salan əsərlər yazacaqlar. Bəs necə, Ramiz bəy qeyd edib ki, son illərdə cəmiyyətdə maraq doğuran bir dənə də roman, poema və ya hekayə yazılmayıbdır.
İcazənizlə, Ramiz bəy, etiraz edirəm. Bəs Zəlimxan Yaqubun ulu rəhbərə həsr olunan poeması nədir? AYB başçısı Anarın “Ağ qoçun kababı”, baş nazirin müavini Elçinin “Dəlixanadan qaçan ər” (ya da “Arvad ərini dəli elədi” idi əsərin adı - dəqiq xatırlamadığım üçün üzürlü sayın - Z.H.) romanları, deputat və keçmiş qaz idarəsi işçisi Hüseynbala Mirələmovun “Canavarlar arasında məhəbbət”, “Daş və Çiçək”, məhkəmə hakimi Ənvər Seyidovun “Gürzə və anakonda Yevlaxdakı iqtisadi inkişafı dəstəkləyir” pyesi nədir? Bunlar hamısı cəmiyyətimizdə böyük səs, səda, hətta çəkinmədən deyərdim ki, gurultu və zırıltı qoparmışdır. Bütün günü xalq şəhərdəki minlərlə kitab dükanlarına - onlar keçmişdə şadlıq sarayı və kababxana olubdur - axışır, metroda, avtobusda roman oxuyanlar bir-birinin belinə minirlər. Xalqımız bu şəraiti dahi siyasət, yapokratiyanın uğurlu ÜDM artımı nəticəsində əldə etmişdir. Urraaa! Eşq olsun! Biz sizə minnətdarıq, qocalar, ay qocalar! Sən elə bir zirvəsən, Küləklər çata bilməz... Abad, azad, ey əziz kəndimiz...
Uzun sözün qısası, dahi siyasətin ədəbiyyatda və folklorda, elmdə, helmdə, canım sənə desin, insan hüquqları üzrə dövlət institutunda əksi layiqincə bir prosesdir və minnətdarlığımızı Vergilər Nazirliyinin mənasız saytında yerləşdirməkdə yetərincə qərarlıyıq. Dəxi urrrrraaa!
Mən ümid edirəm ki, Prezident Administrasiyasının rəhbəri növbəti məqaləsini ölkəmizdə cizgi filmlərinin çəkilməsi probleminə həsr edəcəkdir. Axırıncı dəfə xalq arasında maraq doğuran milli cizgi filmimizə haçan baxmısınız? Problemdir. Xalq ancaq “Tom və Cerri”yə baxır.

1047 dəfə baxılıb