ÇİRKİN “AZƏRBAYCAN MODELİ”

	30 iyul 2010


Onlayn ictimai-siyasi qəzet

Şahvələd ÇOBANOĞLU

ÇİRKİN “AZƏRBAYCAN MODELİ”

Beli donqar, ayağı əyri, ifritə və dözülməz...

Ramiz Mehdiyev özünün bütün yazılarında “Azərbaycan modeli” haqqında söz açır. Son yazısında isə alimlərimizi danlayıb və hədələyib ki, onlar bu haqda susurlar. Sitat: “Artıq dünya politoloji tədqiqatlarında ”Azərbaycan modeli" haqqında fikirlər səslənir. Lakin bizdə hələ də inkişafın Azərbaycan modeli ilə bağlı fundamental təhlillər aparılmır".

Doğrudan da bu Azərbaycan modeli nədirsə, onu azərbaycanlılar heç cür anlaya bilmir. Azərbaycan modeli elə bu anlaşılmazlıqdan, bu təzaddan ibarətdir. Ramiz Mehdiyevin özünün etirafı da maraqlıdır. Bəlli olur ki, bu, haqqında alimlərin susduğu bir modeldir. Bu, alimlərin susduğu və susdurulduğu bir modeldir. Gəlin görək Ramiz Mehdiyev özü bu model haqqında nə deyir:

alimlər bacarıqsızdır, elmi institutlar işləmir, Elmlər Akademiyasının nə işlə məşğul olduğu bilinmir;
universitetlər hüquqçu yetişdirə bilmir, politoloq tapa bilmirlər;
məmurlar pulla elmi adlar alır, tələbələr köçürməklə məşğuldur;
nağılı, bayatını belə toplaya bilmirlər;
maraqlı bədii əsər, roman, hekayə yazılmır;
teatr yoxdur;
televiziyalarda bütün günü düşük mahnıları və müğənniləri göstərirlər və s.

Budur inkişafın Azərbaycan modeli. Elə bir inkişaf ki, hər şeyin içində belə qəmbərqulular çıxır. Bu, elə bir inkişafdır ki, onu tərifləyənlər də axırda şikayətə, tənqidə keçdi. Bu, elə bir modeldir ki, onun müəllifləri də ondan şikayətçidir...
Model deyəndə gözümüzün qabağına gözəl və gözəllik gəlir. Bacarıqsız Folklor İnstitutunun duya bilmədiyi xalq dili ilə desək, uca boy, düz qamət, siyah hörüklər, gözqamaşdıran əndam... Axırını deyə bilmirəm - modeldən danışmaq doğrudan da çətin işdir. Model çox gözəl şeyə deyirlər və indi bəlli olur ki, bu Azərbaycan modelini onunla səhv salmaq olmaz. Burada elmi adı pulla alırlarsa, gör pulla daha nələri etmək olmaz. Burda pulla hər bir çirkinliyə yol açmaq olar.
Azərbaycan modeli elə bir modeldir ki, bu modeldə yalnız bir azərbaycanlıdan söhbət gedir. Azərbaycan da ondan başlayır, azərbaycanlı da, elm də, inkişaf da, həqiqət də. Bu modelin sirri budur. Bir azərbaycanlı bütün azərbaycanlılara qalib gəlirsə, bu, Azərbaycan modelidir.
Bu model Anarı mandatsız qoydu, sonra əsərsiz qoydu. Bu model Əkrəmə mandat verdi, hörmətsiz qoydu. Bu model Bəxtiyara susmağı öyrətdi. Bu model Rüstəmxanlıya təşəkkürlər söylətdi. Yamanca modeldir. Nəvələrimizin prezidenti də indidən bəllidir. Deputatlarımız seçmədən bəlli olur, bələdiyyələrimiz bələdçisiz seçilmir.
Çox böyük inkişaf var - hətta yaltaqlıq da bu modeldə gəlir gətirir. Daha deməyə səbrim çatmır...
Çirkin və rəzil, haqsız və mürtəce bir modeldən söhbət gedir. Bizi erməninin qabağında aciz edən, farsa zəif salan, rusa oyuncaq edən, türkdən ayrı salan bir modeldən söhbət gedir. Azərbaycanlı olmaq üçün insan olmamaq tələbi yaradan bir modeldən söhbət gedir. Əzən və aciz qoyan bir modeldən söhbət gedir. Xalqı sürüyə çevirən bir modeldir bu...
Dünyada dəyərlər modeli var, siyasi idarəetmə və ya hakimiyyətin formalaşması modeli, azadlıq və demokratiya modeli var. Dünyada inkişafın sınaqdan keçmiş ən optimal, ən ədalətli Avropa modeli var. Dünyada dəyərlərin, azadlığın olmadığı ölkələrə isə şərti olaraq ölkələrin adı ilə bağlı modellər təyin edirlər: Koreya modeli, Uqanda modeli, Türkmənistan modeli və s. Yaxud Azərbaycan modeli...

477 dəfə baxılıb