ARMUD SATAN PROKUROR | Yeni Müsavat

	14 mart 2010


Onlayn ictimai-siyasi qəzet

Zamin HACI
zaminhaci@gmail.com

ARMUD SATAN PROKUROR

Bizim bir mahnımız var, deyir, “öldürdü nazın məni, insaf da yaxşı şeydir”. Bugünkü yazımızda naz məsələsinə deyil, ikinci sətrə - insafın yaxşı şey olmasına toxunacağıq. (Öz aramızdır, bu cəm şəkilçisindən qəzet köşəsində yararlanmaq da əla şeydir, elə bil məsuliyyəti oxucu ilə bölüşürsən. “Yazımızda, toxunacağıq”... Özümə də məzəli gəldi).

Britaniyanın keçmiş baş naziri Toni Bleyer təzəlikcə bir azərbaycanlıdan pul alıb ölkəmizə səfər elədi, metanol zavodunun açılışında qart-qurt edib qayıtdı. İndi İngiltərə mətbuatı Bleyeri ağ yuyub qara sərir, onun korrupsioner olmağını, insan haqlarını pozan bir avtoritar rejimlə alverini tənqid edir. Hətta bir qəzet yazmışdı ki, Bleyerin kürəyindən “satılır” lövhəsi asmaq lazımdır. Aldığı 200 min dolları Bleyerin burnundan gətirmək istəyirlər, hərçənd burun da burundur ha...
Məncə, ingilis mediası burada insafsızlıq edir. Axı Bleyer Britaniya hakimiyyətinin həmişəki davranışından fərqli bir şey etməyibdir. Guya biz Britaniyanın Azərbaycana münasibətində haçan alverçi münasibətindən fərqli bir davranış görmüşük? Elə yalnız bp şirkətinin misalında hər şey aydındır. Neft kəmərini çəkiblər, qara qızıl hara lazımdırsa axır, pullar sel kimi qazanılır, Britaniya hakimiyyəti də ölkəmizdə insan haqlarının pozulmasına göz yumur. Bu da sənə klassik demokratiya ölkəsi... Britaniyanın Azərbaycana münasibətində nə qədər vecsiz olduğunu, ölkəmizi boş bir şey sayması adicə BBC radiosu FM tezliyindən qovulanda üzə çıxdı. Heç olmazsa - yenə insaflılıq baxımından - amerikalılar özlərinin “Azadlıq” radiosu haqda davamlı çıxışlar etdilər, Britaniya hakimiyyəti isə BBC-yə görə Azərbaycan hakimiyyətinə gözünü də ağartmadı. Biz, yeri gəlmişkən, Britaniya səfirinin hansı sifətdə olduğunu da çoxdan unutmuşuq. Bir növ Herbert Uelsin “Gözəgörünməz adam”ı kimi bir şeydir.
Sözüm odur ki, Bleyeri təkləyib danlamaq düz deyil, hamısı bir bezin qırağıdır - həm keçmiş, həm indiki Britaniya nazirləri.
Bir dənə oxucu məktubu indicə gəldi, bilmirəm bunu mövzuya necə uyğunlaşdırım, ancaq heç belə öhdəliyim də yoxdur. Ona görə Qaşqay bəyin məktubunu şərhsiz verirəm. Bəy yazır: “Bəstəkar Eldar Mansurovun babasının Qız qalasının yanındakı tarixi evini qanunsuz sökürlər. İndi gör bu nə deyir: ”Bir tərəfdən mənə çox pis təsir edir ki, babama məxsus evi sökürlər, ancaq başqa tərəfdən baxanda həmin bina Qız qalasının qarşısını kəsir". Vətənpərvər insan olaraq mənə pis təsir eləyən nədir? Bunun babasının binası neçə illərdir Qız qalasının önünü kəsirmiş, adını ziyalı qoyan Mansurov isə buna dözürmüş! Məncə, Eldar Mansurov ən azı ictimai qınağa tuş olunmalıdır. Qoy o, xalqa izahat versin ki, niyə indiyə qədər onun babasının evi Qız qalasının qarşısını kəsib, o isə buna dözüb. Hüquqşünaslarla məsləhətləşib biz bəstəkarı məhkəməyə də verə bilərik. İndiyə qədər onun babasının evinin xalqımıza vurduğu mənəvi ziyanı hesablayıb babasının varisi kimi Eldar Mansurovdan tələb eləyə bilərik".
Nə deyim, gerçəkdən bizim xalqın insafı yoxdur. Qorxdum məktubu dərc etməsəm məni də məhkəməyə verərlər. Xalqın səsi - haqqın səsidir. (Bu şərhi də qorxumdan yazdım).
Qayıdaq mövzuya. Qəzetdə yazılıb ki, baş prokuror Qaralov Qaradağda meyvə bazarı açır. Yeri gəlmişkən, soyadı Qaralov olan prokuror bazarı Ağdaşda, Ağcabədidə, Ağsuda açsa məntiqsiz görünərdi. Qaralov bazarı məhz Qaradağda açmalıdır, uzağı Qarabağda. Nə isə, qəzet bu hadisəni tənqid edir, yazır ki, gərək generallar belə işlərlə məşğul olmasın. (Orada Bəylər Əyyubovun da ticarət mərkəzi açmasından bəhs edilmişdi).
Qardaşlar, insafınız olsun, axı Qaralov başqaları kimi bazar bağlatdırmır! Əksinə, açır ki, xalqımız orada həm işləsin, həm meyvə alıb vitaminlərlə möhkəmlənsin. Yoxsa çox zəiflik yaranıb, istintaqda prokuror adama bir qapaz vurur, baxır adam ölüb. Belə şey olarmı?
İnsaf hissi deyir ki, elə yazıya da nöqtə qoymaq vaxtıdır, bir az da sabaha qalsın. Sabah sizə qismət olsa Əyyubovun ticarət mərkəzindən yazacağam.

943 dəfə baxılıb