QARANLIQ YAZI | Yeni Müsavat

	05 fevral 2012


Onlayn ictimai-siyasi qəzet

Zamin HACI
zaminhaci@gmail.com

QARANLIQ YAZI

Köhnə Karl Marks heykəli tərəfdə nəqliyyat naziri Ziya Məmmədovun yeni beyin məhsulu keçən həftə açıldı, xalqın “istifadəsinə verildi”. Bu nəsə yeni bir şeydir, dünya mühəndis elmində kəşfdir. Çay axmayan yerdə körpü tikiblər, sonra onun altından tunel qazıblar, tunellə körpünün arasında boş qalan yer isə ticarət mərkəzi olacaqdır. Minnətdarıq. Vətən sevgisinin bu cür ifadəsinə görə. Axı vətənin hər qarışı qiymətlidir, heç bir yer boş qalmamalıdır. Bu tikilinin bir unikallığı isə özündə yapokratiyanın üç azarını - yeraltı keçid, körpü və dükan tikintisi - birləşdirməsidir.

Ümumiyyətlə, Ziya bəy hər yerdə bu cür çalışır, məsələn, Bakı Beynəlxalq Avtovağzalından həm uzaq-yaxın ölkələrə, Hindistana, Afrikaya, Avstraliyaya, Ucar və Zərdaba avtobus reysləri təşkil olunur, həm camaat oradakı uzun ticarət mərkəzindən alver edir, hələ istəsən oteldə mehman ola bilərsən. Faydalı iş əmsalı çox böyükdür bu zırpı tikilinin. Hələ sizə bir sirr də açım, nəqliyyat naziri özü qəsdən avtovağzalı gəmi şəklində tikdiribdir, əgər dünyanı su bassa avtovağzal avtomatik olaraq torpaqdan qopub üzməyə başlayacaqdır. Ziya Məmmədov bu xilas gəmisinə hər nazirdən bir cüt götürəcəkdir ki, nəsilləri kəsilməsin.
“İstifadəyə verildi” sözlərini isə boş yerə dırnaqda yazmadım. Məzəlidir ki, tunelin açılışı keçirildi, ancaq orada tikinti işləri hələ də başa çatmayıbdır. Bu da bir Azərbaycan təcrübəsidir, bir obyektin açılış törəni minimum 3-4 dəfə keçirilir, hər dəfəsində dövlət başçısı gəlib qırmızı lent kəsir, camaat da elə zənn edir nəsə təzə iş görülüb. Hətta bizdə elə olur ki, körpünün bir ucunun açılış törəni olur, o biri ucunu açana qədər öncə açılan hissə uçub dağılır.
Əlbəttə, camaat da əslində indi belə nağıllara, “inkişaf” əfsanələrinə aldanmır. Ümumiyyətlə, bizim nəyə inanmağımız, nəyə inanmamağımızın özü çox şübhəlidir, etiraf edim ki, mən 36 il içində yaşadığım camaatımızdan baş açmıram. Çalışıram nələrisə dərk edim, edə bilmirəm. Nə isə, bu, uzun söhbətdir, qalsın başqa vaxta.
Suraxanı rayonunda yerli icra hakimiyyəti Səhiyyə Nazirliyi ilə birgə maraqlı eksperiment keçirdir. Bu ideyanın kimdən gəldiyini bilmirəm, hər halda Azərbaycan şəraitində çox yeni bir olaydır. Orada camaatın elliklə tibbi yoxlanışı keçirilir. Hamının! Bir nəfər kimi! Əgər Suraxanıda 210 min adamın yaşadığını nəzərə alsaq, çətin işdir. Artıq 20 min sakin tibbi yoxlamadan keçib, onlardan 1997 nəfərində müxtəlif xəstəliklər tapılıb. Rayonda 13 tibb müəssisəsi var, oralarda çalışan 745 tibb işçisini də yoxlayıblar, 95-i xəstə çıxıb.
Demək, camaatımız arasında məlum olmayan xəstələrin sayı çoxdur. Bircə kütləvi yoxlama bu qədər xəstəlik ortaya çıxarırsa... Hakimiyyət xalqı xəstə salıb, indi bunu özləri etiraf edir. Maraqlı durumdur. Şəxsən mən Suraxanı eksperimentinin məqsədinin nə olmasını anlamıram. Belə eksperimentlər prezident administrasiyası rəhbəri Mehdiyev yoldaşın məlum “məqalə və tezis yaradıcılığının” növbəti mərhələsi sayılmalıdırmı?
“Şeytan da baş açmaz” - nədənsə son günlər bu el məsəlimiz yadıma tez-tez düşür. Bəlkə olayların ilin sonuna düşməsi simvolikdir, bu, nəyinsə sonudur? Ancaq nəyin? Bəyəm biz indiyə qədər yaşadıqlarımızın nə olduğunu, hansı adla çağırmaq lazım gəldiyini anlamışıqmı? Ümumiyyətlə, biz yaşayırıqsa, onda avropalılar nə edir? Hətta qonşu gürcülər nə işlə məşğuldur?
Başa düşürəm - bir yazar üçün cavabsız suallar düzgün deyil, onun borcu oxucuya cavablar verməkdir. Üzürlü sayın, bunu bir beyin tutulması saya bilərsiniz. Hərdən adam özünü çox qatı qaranlıqda, dumanda hiss edir. Və anlayırsan ki, heç bir tunel, körpü səni bu qaranlıqdan çıxarda bilməyəcək.
Yeri gəlmişkən, məndə qaranlıq fobiyası yoxdur, heç vaxt, uşaq olarkən də qaranlıqdan qorxmamışam.

2497 dəfə baxılıb