ÖZÜN BİLƏN YAXŞIDIR

	30 iyul 2010


Onlayn ictimai-siyasi qəzet

Zamin HACI
zaminhaci@gmail.com

ÖZÜN BİLƏN YAXŞIDIR

Yazılarda iqtisadi inkişafımız sayəsində dombalaq aşan insanlar haqda çox qeyd elədim; bu, sevindirici haldır ki, bir çox oxucuların yaradıcılığına təkan vermişdir.

Bu yaxında Elçin Əliyevin "Dombalaq" şeirini çap elədim, indi isə başqa bir oxucumuz - Vasif Həsənov maraqlı təkliflər yazıb göndərmişdir: "Hörmətli Zamin bəy, Azərbaycanda dombalağın ayrıca bir idman növu kimi qeydə alınaraq, bu idman növü üzrə əvvəl ölkə, sonra isə qitə və dünya miqyasında yarışların keçirilməsi çox yaxşı olardı. Sonra isə bu idman növünün olimpiya idman növü hesab olunmasına dair Beynəlxalq Olimpiya Komitəsi qarşısında məsələ qaldırılmalıdır. Aydındır ki, federasiyaya rəhbərlik hər hansı yüksək vəzifəli, pullu-paralı dövlət rəsmisinə tapşırılacaq.
Ümumilikdə, bu idman növü bir neçə mərhələdən ibarətdir. Əvvəl yarış iştirakçıları "dombalaqaşma" mərhələsində yarışırlar. Bu mərhələdə idmançının sürəti əsas götürülür. 2-ci mərhələ isə "dombalaqvurma" mərhələsi sayılır ki, burda da xallar əsasən havada vurulan saltolara görə verilir.
Ən yaxşı nəticə göstərənlərə isə müvafiq dərəcələr verilir: 1-ci dom, 2-ci dom və s. Hər dərəcəni fərqləndirməkdən ötrü yarışmaçının qurşağına uyğun rəngdə qayış da bağlamaq olar.
Bu idman növü ilə məşğul olanlara uğurlar arzu edirəm".
Mən də uğur diləyirəm, gerçəkdən ölkədə bu qədər dombalaq aşan körpülər tikilir, xalq sevincindən dombalaq aşır, nə üçün bu bizim milli idman növümüz olmasın? Bu sahədə yüksək xidmətlərinə görə nəqliyyat naziri Ziya Məmmədovu Milli Dombalaq Federasiyamızın prezidenti qoymaq da doğrudur.
Bunlar öz yerində, mən hər gün bir daha əmin oluram ki, biz dəlixanada yaşayırıq. Dəli, bir az da yumşaq söyləsək, "psixi problemləri olan şəxs" kimdir? Gerçəkliyi qiymətləndirməkdə, özünü tanımaqda çətinlik çəkən adam. Məsələn, tutaq ki, Biləcəridə hər gün işıqlarını söndürən "BakıelektrikşəbəDə" idarəsi ilə bacarmırsan, ancaq özünü Burundi kralı, ya da Qvineyanın müstəqilliyinin atası sayırsan. (Müəllif şəxsi təcrübəsi əsasında yazır bunları, ağlınıza ayrı şey gəlməsin). Dünyanın bütün ruhi xəstəxanaları tarixən cürbəcür "napoleonlar", "prezidentlər", "peyğəmbərlər", "millət xilaskarları" ilə dolu olmuşdur.
Keçək fakta, yoxsa söhbət uzandı. Jurnalist Eynulla Fətullayev 2 ildən çoxdur qazamatda saxlanılır. Onun həbsə alınmağını dünyanın az qala hər yerində bilirlər, Avstraliyadan Britaniyaya, Qətərdən Kanadaya qədər dünya ölkələrindən insanlar Eynullaya dəstək məktubu yazır. Ancaq onun zindana qədər yaşadığı ərazinin hakimiyyəti bəyin həbsindən xəbərsizdir. Srağagün Fətullayevin atası və bizim hamımızın əziz dostumuz Emin dayı zəng vurub deyir ki, bəs evə bildiriş gəlib, Eynullanı bələdiyyə seçkilərində səs verməyə çağırırlar. Dəlixana deyil nədir? Bir hakimiyyət qurumunun adamı həbs etməsini o biri hakimiyyət qurumu bilmir. Koordinasiyasızlıq - psixi pozuntunun bir növüdür.
Hələ görün Şəmkirdə nə olub. Orada bir kənd məktəbinin direktoru polisə zəng vurub deyib ki, direktor olduğu məktəbə bomba qoyub! Hazırda adamın məhkəməsi gedir. Görün təhsil sistemimiz adamı hansı hala gətirirmiş... Direktor belə öz məktəbinin havaya uçmasını arzulayır! Xəyalən olsa da. Allah bilir bu saat Misir Mərdanov Təhsil Nazirliyinin binası haqda hansı bədbin düşüncələrə dalıbdır...
Bakıda isə "Akkord" şirkətinin anbarından oğurluq olub, oğruları tutub görüblər elə şirkətin öz işçiləridir. Mən, yeri gəlmişkən, mahnı bəstələyib oxuyan prokurorunu işdən qovduğu üçün baş prokuror Qaralovu qınayıram. Guya nə etməliydi? Bəlkə qanunların keşiyində durmalıydı? Bizdə qanunlara ayrı adam baxır. Toyda mahnı oxuyası, oynayası adam.
Elə burdan-bura Füzulinin İşıqlı kəndinə səsi çatmayan hakimiyyətin okeanın o tayındakı ABŞ-a nota verməyi də özündən xəbərsizlik əlamətidir.

1087 dəfə baxılıb