İLİN BÜTÜN HADİSƏLƏRİNİN YADDA QALMASI

	14 mart 2010


Onlayn ictimai-siyasi qəzet

Şahvələd ÇOBANOĞLU

İLİN BÜTÜN HADİSƏLƏRİNİN YADDA QALMASI

Yaşadığımız il başa çatır və hər yandan onun nəylə yadda qalması barədə söhbətlər eşitməkdəyik. Bu vaxtlar mətbuat ilin hansı məqamlarla yadda qalması barədə mövzularla zəngin olur. Ciddi yazılar, şərhlər, rəylər, reportajlar hazırlanır. Hətta müğənnilərdən ilin gərdişi haqda fikir öyrənilir, bütün ili toylarda keçirən bu adamlar da başa çatan təqvimə və onun gətirdiyi tale qədəmlərinə ciddi yorumlar verirlər.

Dünən “Azadlıq” radiosunun saytında hətta Ermənistan və Gürcüstanda ilin nə ilə yadda qalması barədə maraqlı yazılar oxudum. Qəzetlər isə bir-birindən fərqli istiqamətlərdə ili “hədəfə” alıb. Mətbuat sanki hesabat verir, hesabat sorur. İlk baxışdan bir ajiotaja oxşayır, amma birdən də bu hala sevinməli olursan - heç olmasa, bu ölkədə hesabat verən və hesabat alan bir sosial institut mövcuddur. Bu institut özü nə qədər çətin durumda olsa belə, o var və ictimai olaylar velosipedinin çarxını fırladır ki, onun hərəkəti susmasın...
Bizim ölkədə hakimiyyətin heç bir qolu hesabat vermir, nə ilin əvvəlində, nə ortasında, nə də axırında. İlham Əliyev bir dəfə də deməyib ki, mən filan dövr üçün və ya filan məsələ, yaxud sahə ilə bağlı hesabat vermək istəyirəm. Demir ki, demir. Parlamentimizdən danışmağa isə adamın dili gəlmir, şəxsən mən hətta oradakı müxalifətçiləri xatırlayanda da bizdə parlamentin real mahiyyəti barədə düşünə bilmirəm. Parlament də, oradakı adamlar da, onların fəaliyyəti də avtoritar hakimiyyətin yaratdığı görüntü modelidir. Hətta yaxşı məqamlar belə “deputatxana”dan hesabat gözləməyə əsas vermir.
Müxalif partiyalar xalqa necə hesabat versin? Siyasətlə məşğul olmaq praktik olaraq onlara qadağan edilib. Xalqın qarşısına çıxmağa imkan belə yoxdur. Cib müxalifəti də nədənsə ilə yekun vurmur. Elə bil heç kim başına artıq iş açmaq istəmir. Fəqət, yaxşı ki, müstəqil mətbu qurumlar var, hər cür ictimai və peşə sahələrini təmsil edən adamlardan sorğular edir, hesabat istəyir, yaxud onların dili ilə hesabat tələb edir. İlə yekun vuran yazarlar isə öz mövqe və tənqidləri ilə hakimiyyətdən hesabat tələb edir, yadda qalan pis məqamlarla onların məsuliyyətini xatırladır və bu, bizim ölkədə mülki cəmiyyətin varlığına zəif və kövrək bir işarədir.
Həmkarlarımdan biri məndən soruşdu ki, bütün il boyu yazan adam kimi deyə bilərəmmi, 2009-cu ilin ən çox yadda qalan hadisələri hansılardır. Dedim ki, mən ilin heç bir hadisəsini yaddan çıxarmamışam. Çünki bütün hadisələrdən ciddi gözləntim olub. Hər zaman həyəcanla gözləmişəm, amma gözlədiyim nəticə ortaya çıxmayıb. Odur ki, hər şey yadımda qalıb.
Bəs mənim doğrulmayan gözləntim nə idi? Çox konkret - ölkədəki idarəçiliyin niyyətinin dəyişməsi. Amma dəyişmədi. İş başında yenə həmin niyyətlərdir. Ən yaxşı işin də altını eşirsən, oradan şəxsi maraqlar, qazanc eşqi, tamah və məkr çıxır. Halbuki bəzən işlər yaxşı nəticə verməyə bilər, amma arxasından yaxşı niyyətlər çıxmalıdır. Lakin heç nə dəyişməyib. Ölkəmiz bir il də yalanla yaşadı, yalanla idarə olundu, yanlışlıqlara qərq oldu, talan edildi, şansları qaçırdı, geri getdi.
Mən indi pis nəticələri bir-bir xatırlasam, kimsə elə bilər ki, özümü yanan və qanan adam kimi görsətmək üçün bunları deyirəm, amma mən yalnız ölkəni qaranlığa qərq edən niyyətlərin yenə il başında olduğunu deyə bilərəm.
Son illər yeni il ərəfəsində bir hadisəni mən çox maraqla xatırlayıram - Hacıbala müəllimin Bakının ortasında qurduğu hündür Yolkanın yüngül bir küləklə uçmasını. Bu, çox simvolik bir hadisə idi. Bu ildən də bir hadisəni yəqin uzun müddət xatırlayacağam. Xarici işlərdən danışan Novruz Məmmədov bu yaxınlarda birdən-birə tərzini dəyişib, Türkiyənin Ermənistanla başladığı proseslərin Azərbaycanın xeyrinə olduğunu söylədi. O boyda həngamədən sonra. Zərdüşt Əlizadə isə bu haqda açıqlama alan müxbirə demişdi ki, baş verənlər Novruz müəllimə təzə çatıb. Təəssüf ki, ilimiz bu kimi gülüş doğuran xatirələrdən və acı itkilərdən uzağa getmir. Amma təqvimin özü də simvolik bir bölgüdür, bizim üçün azadlıq ili hələ gəlməyib. Üstəlik, hər dövr həm də yaxşı işlər və yaxşı duyğularla yadda qalır.

319 dəfə baxılıb