BERMUD ÜÇBUCAĞI | Yeni Müsavat

	03 sentyabr 2010


Onlayn ictimai-siyasi qəzet

Zamin HACI
zaminhaci@gmail.com

BERMUD ÜÇBUCAĞI

Məntiqə görə bu gün bələdiyyə seçkilərindən yazmaq gərəkdir. Axı belə bir prosesin olması haqda xəbərlər yayılmışdır, hətta rəsmən qeyri-iş günü elan olunmuşdur. Camaatın bəziləri isə namizədliyini irəli sürmüşdür. Mən çox fikirləşdim, ancaq bu seçki haqda nə yazacağımı bilmədim. Ona görə də Gəncədən gəlmiş bir şikayət məktubunu sizə çatdırıram.

Asif Yaşar oğlu Abbasov Müsavat Partiyasının Gəncədən bələdiyyə üzvlüyünə namizədlərindən biridir. Yazır ki, hakimiyyət orqanları ondan namizədliyini geri götürməyi tələb ediblər. Xəstə və yaşlı atasını prokurorluğa aparıblar, 5 saat orada saxlayıblar. Atası həmçinin polis idarəsinə də aparılıb.
Biz atanın övlad yolunda əziyyət çəkməsini çox görmüşük. Ancaq bunlar adətən başqa tipli məsələlər üzrə olub. Məsələn, iraq olsun, övlad xəstələnər, ali məktəbə hazırlaşar, əsgərliyə çağırılar (elə bunlara da Azərbaycan şəraitində “iraq olsun” düşür) və sairə. Ancaq övlad bələdiyyə olacaq deyə atanı polisə dartmaq nə üçün? Mənasız quruma görə xalqa bu cür zülm edənlər görəsən az-maz mənası olan hakimiyyət strukturu üçün nə edərlər? Adamları tikə-tikə doğrayarlar bəlkə də. Bu boyda hakimiyyət hərisliyini doyuzdurmaq müşkül işdir. Bir ölkə buna bəs eləməz, gərək yapokratlar BMT-nin filanın başına keçsinlər, planetə göstərsinlər analar necə oğullar doğubdur.
Bələdiyyə haqda bu qədər, hələ çox oldu.
Amerikalılar Tailandda bir təyyarə tutublar, İrana qadağan olunmuş silah daşıyırmış. Bu təyyarənin bir izi də Azərbaycana gəlib çıxıb, sən demə, onu Tağıyev qəsəbəsi yaxınlığındakı, Hərbi Hava Qüvvələrimizə məxsus aerodromda enən görüblər. Bu haqda Amerika mətbuatı yazır, hələ təyyarənin bizim aerodroma enməyinin xəritəsini də dərc ediblər.
Ən maraqlısı 35 ton silahla tutulan bu «İl-76» təyyarəsinin marşrutudur. Təyyarənin başlanğıc uçuş nöqtəsi elə bizim aerodromdur. Sonra yanacaq götürmək üçün Birləşmiş Ərəb Əmirliyi və Tailandda yerə enib, oradan Şimali Koreyaya uçub, fərz edilir ki, Şimali Koreyada silah götürüb, yenidən Tailandda enib və ələ keçib.
Mən niyə “fərz edilir” yazdım? Çünki ola bilərdi təyyarə elə bizdən də Şimali Koreyaya nəsə aparıb. Mümkün deyilmi? Azərbaycan kimi korrupsiya ölkəsində, qanunların rüşvətlə satıldığı ərazidə hər şey mümkündür. Hətta ola bilər ki, təyyarə elə bizim korrupsionerlərdən birinə məxsusdur. Çünki amerikalılar İrana qadağan olunmuş silah daşıyan bu təyyarənin kimə məxsus olduğunu tapa bilmir. Tipik Azərbaycan üslubudur. Bizdə baxırsan bir villa tikilib, ancaq heç bir sənədi yoxdur. Ən yaxşı halda hansısa qaçqının adına sənədləşdirilib. Tailandda tutulan təyyarə bir qaçqının adına çıxsa təəccüblənmərəm.
Belə bir fərziyyəni nəzərdən keçirək. Təyyarə Azərbaycandan silah götürüb, aparıb Şimali Koreyaya, orda satıblar. Geri qayıdanda acgözlükdən yenə silah vurublar, İrana aparmaq üçün. Ya da silahı Koreyada sata bilməyiblər, qayıdıblar İrana satsınlar.
Hərbi ekspert, polkovnik Üzeyir Cəfərovdan soruşun, sizə belə tipli əhvalatlardan çoxlu danışar. Onun başını da qana bülənd ediblər belə danışıqlara görə. Vaxtilə Cəfərov yazmışdı ki, Azərbaycan Hərbi Hava Qüvvələrinin giziri Çinin Urumçi şəhərində qəzaya uğrayan ticarət təyyarəsində həlak olub. Heç kim cavab vermədi ki, həmin gizir Urumçidə necə təyyarə sürürmüş.
Elə indi də Müdafiə Nazirliyi susur. Jurnalistlər soruşublar, MN mətbuat xidməti deyib ki, bu haqda heç nə deyə bilməz. Qınamıram, nə desinlər? Silah alveri ilə məşğul olan təyyarənin Azərbaycan hərbi aerodromundan uçuş yapmağını necə izah etmək olar axı? Çətin işdir. Yeri gələndə, heç o boyda Hərbi Hava Qüvvələri komandanının qətlinin səbəbini xalqa aça bilmirlər, bir təyyarə nə şeydir?
Azərbaycan Bermud üçbucağı kimi bir yerə çevrilib. Dünya bunu anlamalıdır. Burda baş verən qeyri-adi hadisələrdən, mistik işlərdən dərs almalıdır. Bizim necə təhlükəli rejimdə yaşamağımızı dərk etməlidirlər. Nəzarətdən kənar zonadır bura.
Bəlkə yaxşı axtarsan Con Kennedinin gerçək qatili də Xızı dağlarından çıxar.

1295 dəfə baxılıb