“ÖZ-ÖZÜMƏ DANIŞDIM BƏZƏN YERİMDƏ...”

	10 fevral 2012


Onlayn ictimai-siyasi qəzet

Şahvələd ÇOBANOĞLU

“ÖZ-ÖZÜMƏ DANIŞDIM BƏZƏN YERİMDƏ...”

“Azadlıq” qəzeti də 20 yaşına çatdı. İtkilərlə, çətinliklərlə, qarışıq dövrlərdən keçərək. Amma azadlığımızın bir simvolu kimi yaranan bu tarixi qəzet yenə də azadlığın simvollarından biridir, azadlığın bir hissəsidir.

İndi bu qəzet Azərbaycanda az sayda AZADLIQ adalarından biridir. Onun xüsusi yerini heç kim dana bilməz. Amma yubiley günü olsa da haqqında pafoslu sözlər deməkdən qaçmağa çalışıram. Çünki bu qəzetin oynadığı rol çox konkret, aydın və başadüşüləndir. İndi “Azadlıq” bizim ölkədə ifadə azadlığının möhkəm dayağı olmağa çalışır. Müstəqil mətbuatın küncə sıxışdırıldığı bir vaxtda aldığı zərbələrdən sarsılmadı, gördüyü işdən geri çəkilmədi. Ayaq üstə dura bildi, ən başlıcası, azadlığını saxladı. Hazırda ölkəmizə azadlığın gəlməsi üçün aparılan mübarizədə əvəzsiz rola sahibdir. Zəif resurslarla mühüm işin öhdəsindən gələ bilmək isə təşəkkürə layiqdir. Əslində “Azadlıq” yubileyi olmadan da bu təşəkkürlərə layiqdir. Hər gün, hər sayı ilə...
Bu gün isə “Azadlıq”ın kollektivi xüsusi təbriklərə layiqdir. Bizim tarixi reallıqda bir qəzet üçün 20 yaş böyük bir başlanğıcdır. Təəssüflər ki, “Azadlıq”ın ilk gündən başladığı tarixi missiyanın aktuallığı hələ də qalır. Ölkəmiz azadlığını qazana bilsəydi, biz bu qəzetdən sadəcə maraqlı və oxunaqlı KİV olmağı gözləyərdik. Amma indi o özü də bundan artıq bir missiyanı öhdəsinə götürüb, həm də heç kimin xahişi olmadan.
“Azadlıq”ı təbrik edirik. Azad sözü yaşatmaq üçün çiyninə aldığı yükə görə.
Bəs arzumuz nədir? Təbii ki, azadlıq. Redaktoruna azadlıq. Ölkəsinə azadlıq. Tezliklə Qənimət Zahidi iş başında görmək. Ümumiyyətlə, böyük arzular var. Bu gün Nəcəf bəyi xatırlamamaq olmaz. Möhtəşəm bir insan idi. Həm çağdaş dövrümüzdə azad mətbuatın simvoludur, həm azadlıq hərəkatımızın öndərlərindəndir, həm də “Azadlıq” qəzetinin qurucusudur. “Azadlıq” bu gün öz işi ilə Nəcəf bəyi də, bu günlərdə itirdiyimiz Elçin Səlcuqu da, sırada olmayan başqalarını da yaşatmaqdadır. İndi “Azadlıq” həm də yaşadan qəzetdir. Ümumiyyətlə, azad qəzetlər indi hər kəsə bu çətin və boğucu zamanda yaşamağa kömək edir.
“Azadlıq”ın timsalında azad sözü yaşadan hər kəsi təbrik etmək istərdik. Həmçinin Eynulla Fətullayevi, həbsdə olan gənc bloqçular Adnanla Emini. Onların hamısı bir AZADLIQdır.
Mən başqa bir şeir tapa bilərdim. Başqa bir mətni də bu yazıya əlavə edə bilərdim. Amma hesab etdim ki, Qənimət Zahidin ad günündə “Yeni Müsavat”da verdiyim bir şeiri yenidən yazıma əlavə edim. Onu bir daha oxuyun, sətri tərcümədir, amma mənası aydındır. Fridrix Nitşe:

Elə bir həyat yaşadım ki,
Cənnəti də gördüm, cəhənnəmi də,
Elə bir eşq yaşadım ki,
Tutqunu da gördüm, məmnunluğu da.
Bəziləri seyr edərkən həyatı ən öndən,
Özümə bir səhnə tapıb mən də oynadım.
Elə bir rol vermişdilər ki,
Oxudum, oxudum, bir şey anlamadım,
Öz-özümə danışdım bəzən yerimdə,
Həm qızdım, həm də güldüm halıma,
Sonra dedim ki, “yox, söz ver özünə!”,
Dənizləri sevirsənsə, dalğanı da sevəcəksən,
Sevilmək istəyirsən, öncə sevəcəksən,
Uçmağı sevirsənsə, düşməyi də biləcəksən,
Qorxaraq yaşasan, həyatı yalnız seyr edərsən,
Elə bir həyat yaşadım ki,
Son yolçuluğu erkən tanıdım,
Anladığım bir şey var -
Zaman o qədər dəyərliymiş ki,
Heç tələsməm, heç!

668 dəfə baxılıb