ƏBƏDİ ÖZƏLLƏŞDİRMƏ

	03 sentyabr 2010


Onlayn ictimai-siyasi qəzet

Zamin HACI
zaminhaci@gmail.com

ƏBƏDİ ÖZƏLLƏŞDİRMƏ

Bizdə elə mənasız-məzmunsuz sistem qurulub ki, burada heç nəyin əvvəli olmadığı kimi sonu da olmur. Qapalı bir dairəyə salınmışıq.

Bu günlərdə prezidentin bir-birinə məzmunca bənzəyən iki fərmanı oldu. Birinci fərman yeni doğulan uşaqlara görə birdəfəlik müavinətin 2010-cu ildən 75 manata qaldırılması haqda idi. İndiyəcən 50 manat imiş. Nə böyük səxavət, necə lütfkarlıq... Adam az qala ağlamaq istəyir. Bu ölkədə nə böyüyə hörmət var, nə uşağa. Yolu dövlət xəstəxanalarından düşmüş hər kəs bunu gözəl bilir. Siz doğum şöbəsində adamlardan hər cür rüşvət alındığını görmüsünüz, eşitmisiniz, ancaq əminəm ki, muştuluq üçün konkret məbləğ müəyyən edilməsini bilmirdiniz. Mən də bilmirdim, bu yaxında canlı şahidi oldum. Tibb bacısı yeni doğulmuş körpənin qohumlarından 20 manat muştuluq istədi, onlarsa cəmi 16 manat düzəldib verdilər. Siz tibbi heyətin çatışmayan 4 manata görə necə qışqırıq qopardığını bir görəydiniz... Ancaq “həyat uğrunda savaş” nəticəsini verdi, 4 manatı ala bildilər.
Əgər yeni doğulmuş uşağa görə valideynlər dövlət xəstəxanalarına minimum 500 manat ödəyirlərsə, bütün dərman və ləvazimatları - adi şprisdən tutmuş bintə, yoda qədər - valideynlər alırsa, dövlətin yeni doğulan uşaqlara ayırdığı 50 manatı 75 manata qaldırmaq acı istehzadan başqa bir şey deyil.
İkinci fərmanla isə özəlləşdirmə çeklərinin ömrünü uzadıblar. Kimin yadına düşür indi bu özəlləşdirmə? Özəlləşdirmə haçan başladı, camaata nə xeyri dəydi? Boş bir şeydir. Ölkədə neft sektorundan başqa iki-üç qotur sənaye müəssisəsi var, onların da hər birinin arxasında hansısa nazir, məmur durur. Bələdiyyə kimi, uşaq müavinətləri kimi, insan haqları kimi və sairə kimi özəlləşdirmə də ölkəmizdə mənasını itirib. Lap bu çeklərin ömrünü uzat, apar 2099-cu ilə qədər. Heç nə dəyişməyəcək. Sovetlərdən qalan əsas zavodlar ya satılıb-sovulub, ya da dibindən sökülüb. Yalnız neftə bağlı obyektlərə maraq olardı, onunla maraqlanmaq da rəsmən qadağandır. İnanmırsan Kojeninin nakam taleyini yada sal. Məncə, 2010-cu ildə doğulacaq və valideynlərinə 75 manat dəhşətli qazanc gətirəcək uşaqlar böyüyəcəklər, orta məktəbi bitirəcəklər, yekə kişi və qadın olacaqlar və hər il dekabr ayında prezidentin növbəti sərəncamını oxuyacaqlar: “Özəlləşdirmə çeklərinin vaxtı uzadılmışdır”. Dünya dağılacaq, camaat Marsa köçürüləcək, bizdə hələ də “28 May” metrosu tərəfdə əlində çek tutan insanlar veyillənəcək.
Ancaq deputatxana spikeri Oqtay Əsədovun bir açıqlaması bu mənasız günlərə rəng qatmışdır. Yoldaş Əsədovdan siyasi məhbusların əfvi üçün prezidentə müraciət etməsi xahiş olunub, o isə deyib ki, hamıya görə müraciət edər, bir Eynulla Fətullayevdən başqa. Niyə, guya jurnalist Fətullayev xalq düşməni kimi bir adam imiş. Mən bu mövqeyə pis baxmıram, təki Əsədov müraciət eləsin, ora Fətullayevin adını sonradan da əlavə eləmək olar. Onsuz qanunlar deputatxanada bu cür qəbul edilir: deputatlar səs verir, sonra qanunu dəhlizə çıxardırlar, orada hər kəs istədiyi sözü artırır, istəmədiyi sözü pozur. Qanun parlamentdən Prezident Aparatına dığırlanan müddətdə yolda duran polislər, avtobus sürücüləri, Şəhidlər Xiyabanını ziyarət etməyə gedənlər, sadəcə yol keçənlər - uzun sözün qısası, hər kəs qanuna əlavə və dəyişiklik edir. İndi Oqtay Əsədov başqaları haqda əfv müraciətini eləsin, biz küçədə durub Fətullayevin adını ora yazarıq.
Gəncədə isə bu arada İlham Əliyevin ad günü münasibətilə hazırlanan tort kəsilib. Lent.az-ın Gəncəbasar müxbirinin verdiyi məlumata görə, Avropanın ən böyük şirniyyatının uzunluğu 48 metr, çəkisi 11 ton olub. Tortun hazırlanması üçün 3,5 ton un, 3 ton şəkər tozu, 500 kq kərə yağı, 35000 yumurta, 500 kq qoz ləpəsi və digər məhsullardan istifadə olunub. Nəhəng şirniyyatın üzərində prezident İlham Əliyevin anadan olmasının 48 illiyinə həsr olunan kompozisiya, sağ və sol tərəfində isə Gəncənin tarixi memarlıq abidələrinin, şəhərin müxtəlif ərazilərinin təsvirləri öz əksini tapıb. Tortdan şəhər icra hakimiyyətinin başçısı Eldar Əzizov və xanımı başda olmaqla, 30000-dən artıq insan dadıb.
Bakı icra hakimiyyəti başçısı Abutalıbovun yenə də mərifəti çatmadı ki, adi bir piroq bişirtdirsin. Ayıb olsun...
P.S. Yazdığı xoş sözlər dolu məktuba görə 1-ci qrup əlil Məmmədəli Həmidova dərin minnətdarlığımı bildirirəm.

1146 dəfə baxılıb