“LAĞLAĞI” SERİALI - 6-cı SERİYANIN SONU

	30 iyul 2010


Onlayn ictimai-siyasi qəzet

Zamin HACI
zaminhaci@gmail.com

“LAĞLAĞI” SERİALI - 6-cı SERİYANIN SONU

Belə bir ilin axırında məhz bu cür zarafat olmalıydı. Yazda monarxiya qurulması üçün konstitusiya dəyişiklikləri, yayda başqa lağlağılar, payızda qanunların saxtalaşdırılması məzəsi... İndi isə bizim qazpulu borcumuzu bağışlayıblar. Doğrusu, bu sərəncamı oxuyanda güldüyüm qədər o biri zarafatlara gülməmişdim. Təsəvvür elə, sənin heç bir borcun yoxdur, ancaq günlərin bir günü gəlib deyirlər ki, borcunu bağışlayırıq, get kef elə. Uca yapokratiyaya minnətdar ol, bir az artıq təşəbbüskar olsan lap dombalaq aşa bilərsən - sərbəstlikdir. Bizdə yaltaqlıq təşəbbüsləri yeganə azad təşəbbüslərdir, yalnız yarınmaqda yaradıcılığa heç bir məhdudiyyət, sınır qoyulmur.

Əgər “bağışlanan” 327 milyon manatlıq qazpulunu hazırda ölkədə rəsmən guya yaşayan, pəpə yeyəndən məmə deyənə qədər hər bir kəsi saymaqla 8 milyon 800 min adamın arasında bölsək adambaşına 38 manat borc edir. Dəhşətdir! Belə çıxır ki, biz görməmişcəsinə az qala “Şahdəniz” yatağının yarısını yandırmışıq, üstəlik, indiyəcən heç bir qəpik də qazpulu ödəməmişik. Ancaq xoruzun quyruğu həmin borc məbləğinin gələnilki dövlət büdcəsindən ARDNŞ-nin hesabına ödənilməsi ilə ortaya çıxır. Aldım qoz, satdım qoz iqtisadi siyasətinin davamıdır bu. Dövlət şirkəti qazı çıxardır, yalandan camaata satır, guya pulunu ala bilmir, təzədən elə həmin şirkətin hesabına formalaşan büdcədən pullar şirkətə qaytarılır. Arada kim qazanır? Neft-qaz sektorunun üstündə yatan hakimiyyət. Xalqa da barmağını sormaq qalır.
Eynulla Fətullayevə Avropa Məhkəməsində uduzacağını görən hakimiyyət indi onun ayaqqabısından narkotik “tapır”. Bu da ilin son qara yumor akkordlarından biridir. Adamı qəzet yazısına görə tutmaqla yanlış yapdıqlarını hələ indi anlayıblar. Elə əvvəldən Mirzə Sakit kimi cibinə nəşə atmaq lazım idi. Yazıya görə adam tutmağa Avropada bir az pis baxırlar.
Naxçıvanda 15 ağsaqqalın Aşura mərasimini Vasif xandan icazəsiz qeyd etməkləri səbəbindən ağaca bağlanılıb döyülməsi xəbərini oxuyanda isə dəli şeytan mənə pıçıldadı: “Maraqlan, bəlkə ağaclar küknar ağacı olubdur?” Açıq deyim, maraqlanmadım.
Deputat Qənirə Paşayeva “Nobelçi qadınlar” adlı bir kitab hazırlayıb. Dəqiq məlumatım var ki, hazırda “Nobelçi subaylar”, “Nobelçi kişilər”, “Nobel ödülünü almış keçəllər” mövzusunda da kitablarımız üzərində gərgin iş gedir. Biz çox ciddi işlərlə məşğuluq. Şəxsən mən “Nobel mükafatını almış şəxslər arasında qaynanası ilə danışmayanlar” adlı analitik məcmuə üzərində çalışıram. Təki canım sağ olsun.
Naftalanın icra başçısı Musa Musayev bir vaxtlar deputatxanada xalqın üzərinə ən bərk gedənlərdən biri idi. İndi MSK sədri Məzahir əkə Musayevi bələdiyyə seçkilərini saxtalaşdırmaqda suçlayır. Əla xəbərdir. Musayevin saxtakar olduğunu onun öz hakimiyyətinin, düşərgəsinin dilindən eşitmək üçün 2009-cu ilədək yaşamağa dəyərmiş. Eh, gör adam nə qədər ucuzlaşıb - bələdiyyənin zibilinə salıblar.
Son olayı da yazaq, ilin zarafat siyahısının başı bağlansın.
Təhsil Nazirliyinin xətti ilə bir sarsaq “Təhsil lüğəti” çıxmışdı. Ekspertlər bunu tənqid elədilər, Fikrət Süleymanoğlu isə bu lüğəti öz yazısında ümumiyyətlə cırıq-cırıq eləmişdi, vurmuşdu nazirliyin sifətinə. Utandılarmı? Qətiyyən. Hələ açıqlama verdilər ki, guya bu kitab sınaq üçün buraxılıbmış, hər kəs öz təkliflərini versin, lüğət yenidən işlənib çap olunacaq. Mən fürsətdən yararlanıb bəzi təhsil terminləri təklif edirəm:
ishalat - Mərdanovun ölkə təhsilinin qarnını ağrıtmaq üçün gördüyü işlər, islahatlar;
pulu - uşaqlardan alınan vəsaitin adı;
rüşvət - müəllimlərə verilən şirinlik;
müəllim - dərsi evdə keçib pepetitor pulu alan, məktəbdə lağlağı ilə məşğul olan, seçkilərdə, hakimiyyətin mitinqlərində, müxalifətin üzünə durmaqda istifadə edilən kiçik və yazıq ziyalı qrupunun arxaikləşmiş adı.
Çoxdur belə təkliflərim, qalsın gələn ilə. Gələn il daha lağlağı il olacaq, buna əmin ola bilərsiniz.

1877 dəfə baxılıb