PUL DÖVRÜ | Yeni Müsavat

	30 iyul 2010


Onlayn ictimai-siyasi qəzet

Zamin HACI
zaminhaci@gmail.com

PUL DÖVRÜ

Öncə bir müşahidəmi sizinlə bölüşmək istəyirəm. Sevindirici haldır ki, xalqımız ildən-ilə daha realist olmağa başlayır, ömrü puç edən xəyallardan əl çəkir. Mən Yeni il və Həmrəylik Günü münasibətilə aldığım təbrik mesajlarının balaca bir araşdırmasını apardım, özü də müqayisə üçün əlimdə imkan var idi, “Nokia PC Suite” proqramının canı sağ olsun, qabaqlar, ötən illərdə aldığım mesajları da kompyuterin yaddaşına atıb saxlayıram.

2007-ci il bitəndə aldığım mesajların heç birisində vətəndaşlarımız yazıq bəndənizə pul, var-dövlət arzulamamışdı. 2008-in sonunda belə yağlı təbriklər cəmi iki dənə idi. Ötən ilin son gecəsi isə mənə növbəti ildə həm də pul arzu edənlərin sayı yeddiyə qalxmışdır.
Gördüyünüz kimi, xalqımız, vətəndaşlarımız gerçəkliyi lazımınca qiymətləndirməyə başlamışdır. Yoxsa “sənə xoşbəxtlik, sevgi, sevinc dolu həyat diləyirəm” məzmunlu təbriklərlə yaşamaq mümkün deyildir. Öncə çoxlu pul lazımdır, qalanı boş şeylərdir. İndiki Azərbaycan hakimiyyətinə həyatımıza gətirdiyi dəyərlər içərisindən məhz pula sevgi dəyərinə görə minnətdar olmalıyıq. Doğrudur, pula məhəbbət qabaqlar da xalqımızın canında olmuşdur. Təkcə dahi Üzeyir bəyin əsərindən
“- Pulun var? - Var, var! - Pulun var, gələrəm! - Bilirəm, gələrsən!” dialoqunu xatırlamaq yetər. Lakin yapokratiya dövründə pula sevgi, pulun kultu aşırı dərəcədə inkişaf etmişdir.
Bu, indi hər yerdə özünü göstərir. İqtisadiyyatımızın güclü olmağından danışanda dövlət başçıları həmişə deyirlər ki, bizim pulumuz çoxdur. Elə ölkənin iqtisadi gücü də Mərkəzi Bankın sərt monetar siyasəti ilə, manatın kursunun sabit saxlanması ilə göstərilir. Azərbaycanda elə bir şey qalmayıb ki, onun dəyərini pulla ölçməsinlər. Buraya kişilik, qeyrət, insanlıq, sevgi-məhəbbət, vətənpərvərlik və sairə də daxildir. Məsələn, kimsə vətənpərvər olduğunu isbat etmək istəyirsə ondan silahlı qüvvələrə yardım fonduna zorla pul alırlar. Hörmətin, haqqın, ədalətin, can sağlığı və elmin... uzun sözün qısası, hər şeyin adı, özü də ikinci yox, çox vaxt birinci, əsl adı puldur. Bütün dəyərlərin ümumi ekvivalenti kimi pul Azərbaycanda tarix boyu heç yerdə qazanmadığı hörməti qazanmışdır.
Qədim Romada hansısa imperator şəhər ictimai tualetlərini pullu eləmək qərarı vermişdi, oğlu buna etiraz edib deyibmiş ki, belə iyrənc, çirkli məkanlardan pul qazanmaq nəyimizə gərəkdir. İmperator heç nə demir, ancaq tualetlərdən yığılan ilk pulları oğluna verib iylədir, tarixə düşmüş qanadlı ifadəsini işlədir: “Gördünmü, oğlum, pulların iyi olmur”.
Ancaq biz imperatorun böyük qələt elədiyini söyləyə bilərik. Biz pulların gül-çiçək qoxuduğunu, cənnət ətri verdiyini anlamış camaatıq.
Paytaxtda bir nəfər özünü qumbara ilə partlatdı. Polis deyir ki, keçmiş futbolçunun ona 15 min dollar borcu varmış, adam pulu almağa gedirmiş. Ümumiyyətlə, son illər bizdə adamlar əsasən pulsuzluqdan, ya da pulluluqdan ölürlər. Tavtalogiya kimi görünsə də bu cümlədə böyük məna var. (Təvazökarlığa görə üzr istəyirəm).
Heydər Əliyev Fondunun adından pul yığan quldur dəstəsi yaxalanıb. Qəzetimiz yazır ki, həmin dəstənin soyduğu adamlardan biri deputatxana vitse-spikeri Bahar Muradovanın yaxın qohumu imiş. Yaxşı, bəs axı Muradovanın özü saxta yolla deputat qoyulmayıbmı? Ümumiyyətlə, elə bu fonda vəsaitlər hansı yolla yığılır? Bir ara “Azadlıq” radiosu bunu araşdırmağa çalışdı, heç nə öyrənə bilmədi. Fondun saytında çoxmilyonlu xərclər haqda xəbərlər var, lakin bu milyonlar haradan toplanır - yazılmayıb. Bəlkə Milli Təhlükəsizlik Nazirliyinin saxladığı bu insanlar da heç quldur-filan deyil, elə fonda qanuni (hansı qanuni - bunu, açığı özüm də bilmirəm) pul yığmaqla məşğulmuş?
Uzun söhbətlərdir bunlar, pullu söhbətlərdir, hamısını birdəfəyə yazmaq olmaz. Biz tezliklə ölkənin ən yaraşıqlı yerində pula heykəl qoymalıyıq. Hələlik son təklifim budur.
Təbriklərdə mənə pul arzulayanlara dərin minnətdarlığımı bildirirəm.

905 dəfə baxılıb