ƏN DEMOKRATİK PARTİYA

	30 iyul 2010


Onlayn ictimai-siyasi qəzet

Zamin HACI
zaminhaci@gmail.com

ƏN DEMOKRATİK PARTİYA

Ölkədə ən demokratik partiya YAP-dır. Zarafat eləmirəm. İnanmırsınızsa bu cümləni oxuyun: “Yəqin, Siyavuş müəllim riyaziyyatdan ”iki" alıb, ya da gözləri zəifdir deyə 150 nəfəri 11 nəfər görüb". Cümlənin müəllifi Sabirabadın Şəhriyar kəndindən sıravi YAP üzvü Mehman Əmirli, burada adı çəkilən “Siyavuş müəllim” isə - hərçənd onun müəllimliyi, hansı məktəbdə dərs deməsi haqda qəti məlumatımız yoxdur - YAP icra katibinin müavini, deputat Siyavuş Novruzovdur.

Söhbət ondan gedir ki, Sabirabad yapçıları bələdiyyə seçkisində saxtakarlığa etiraz üçün paytaxta gəlib Mərkəzi Seçki Komissiyası önündə piket keçirmişdilər. Qəzetlər də 150 nəfərin piketdə iştirakını yazmışdı, lakin Novruzov həmişəki adəti üzrə orada cəmi 11 nəfər olmasını söyləmişdi. Axı müxalifətin etiraz aksiyalarında adam sayını azaltmaq yapçıların köhnə peşəsidir. Sadəcə bu dəfə öz partiya üzvlərinin sayını azaltmaq lazım olmuşdu.
Gördüyünüz kimi, bir sıravi partiya üzvü birbaşa icraçı katibin müavini ilə məzələnir, onun rəqəm tanımadığını, ya da gözünün kor olmasını söyləyir. Əsl demokratiya, aşkarlıq, plüralizm bəs necə olur? Mənim bu YAP-dan xoşum gəlməyə başlayır. Üzv qəbul eləsələr, etiraz etməzdim. O qədər riyaziyyat qanmayan adam tanıyıram ki... O cümlədən, gözü zəif görən, ancaq mənasız komplekslər üzündən gözlük taxmağa utanan adamlar.
YAP-da belənçik demokrasi halları ilk dəfə deyil. Məsələn, son yadımda olan elə Masallıda YAP-çı deputat Əhəd Abıyevin başqa partiya üzvünü, yerli icra başçısı Qəzənfər əkəni söyməsi idi. Doğrudur, sonradan Abıyev, el diliylə söyləsək, “dala verdi”, quzu kimi danışmağa başladı. Elə Sirus Təbrizlini də bu cür demokratik püskürtülər üzündən partiyadan qovmuşdular. Ancaq sonra nə olur - önəmli deyil. Əsas odur ki, YAP-da tam plüralizm, fikir azadlığı hökm sürür. Siz indiyəcən hansı müxalifət partiyasının bir kəndli üzvünün mərkəzi aparatda çalışan adi bir qarovulçu haqda olsa da - “gözün kordur” tipli bəyanatını eşitmisiniz? Mən eşitməmişəm. Yaşasın YAP! Xilasımız bu partiyanın daha da genişlənməsindədir.
Genişlənmə demişkən, hazırda YAP-ın 500 min üzvü var. Ancaq bu da son deyil, yaxın illərdə partiyanın sıralarına bütün azərbaycanlıların - pampers geyəndən qulağının dibindən bozbaş iyi gələnə qədər - qoşulacağı mütləqdir. Mən o gözəl günü indidən görürəm. Yaxşı, bəs sonrası? Hamımız yapçı olandan sonra nə etməli? Məncə, partiya bu yöndə proqramını indidən açıqlamalıdır. Ölkəmizdə hamı yapçıya çevriləndən sonra YAP ideyalarının (nə qədər qəribə səslənsə də belə ideyaların olduğu haqda ciddi ehtimallar vardır) başqa ölkələrə ixracı haqda düşünməliyik. İlk növbədə Gürcüstan, Ermənistan, Rusiya, İran, Türkiyə kimi yaxın qonşularımızı yapçı eləməliyik. Türkmənistanı yaplaşdırmağa ehtiyac yoxdur, onlar geridə qalıblar, YAP-a layiq deyillər.
Yapçılıq bir məfkurə sistemi olaraq (düzü, bunu yazanda ağzım əyildi, düzəldib davam elədim) insanı heç vaxt tərk eləmir. Bircə gün bu partiyanın sıralarında olmaq insana ölümünə qədər onu atmayan keyfiyyətlər qazandırır. Məsələn, Rəsul Quliyev 14 ildir Amerikaya qaçıb, ancaq hələ dəyişməyib. Bu yaxında deyib ki, müxalifətin bələdiyyə seçkilərində uğursuzluğu öz günahıdır. Sitat: “Əgər idmançı uduzmasının səbəbini həmişə hakimdə görürsə, yenə uduzacaq, özü də daha acınacaqlı uduzacaq”. Əlbəttə, Azərbaycana və ümumiyyətlə Avrasiya materikinə hakimiyyətin qorxusundan ayaq basmağa cürət eləməyən şəxsin belə sözləri qəlbimizi fərəhləndirir. Rəsul bəy Amerikada böyük işlər görür, elə Barak Obama onun sədr olduğu Açıq Cəmiyyət Partiyasının xəttilə ABŞ prezidenti seçilmişdir. Havay adalarının Qonolulu bələdiyyəsi isə bütövlükdə ACP üzvləridir. Rəsul bəyin Nyu York, Alabama, Viskonsin, Texas, Alyaska bələdiyyələrində də üstünlüyü vardır.
Sabirabad yapçılarına eşq olsun!

902 dəfə baxılıb