XOŞ GƏLMİSƏN, YEĞİŞE...

	12 mart 2010


Onlayn ictimai-siyasi qəzet

Zamin HACI
zaminhaci@gmail.com

XOŞ GƏLMİSƏN, YEĞİŞE...

Bir azdan o da dəli olacaq

Naxçıvanda əla bir hadisə olub. «Mediaforum» saytı erməni mənbələrinə əsasən yazır ki, Yeğişe Petrosoviç Gevorkyan adlı bir Ermənistan vətəndaşı təzəlikcə arvadını və üç azyaşlı uşağını doldurub bir avtomobilə, sürüb Naxçıvan sərhədinə. O taydan erməni əsgərlər, bu taydan bizim əsgərlər partapart salıblar, maşını gülləyə tutublar, ancaq Yeğişe deyib ki, öldü var, döndü yoxdur. Maşını sürüb keçibdir bizim tərəfə. “Bizim” deyəndə ki, Vasif xanın idarə elədiyi nəzarətsiz zonaya. Yəni Naxçıvana.

Maraqlıdır ki, qabaqlar bizim camaatdan bu məzmunda çoxlu sözlər eşitmişik. Elə son bələdiyyə seçkiləri vaxtı haqqı tapdanan bəzi namizədlər aşkar bəyan edirdilər ki, belə yaşamağa dözmək olmaz, Ermənistandan ailəlikcə sığınacaq istəyəcəklər. Ancaq belə bəyanatlar həmişə söz olaraq qalıbdır, tək-tək əsirliyi belə vətəndə yaşamaqdan üstün seçənlərimiz olsa da ailəlikcə Ermənistana qaçanımız olmayıb. Bilmirəm bu patriotizmə nə mükafatı verilə bilər, hər halda fakt göz qabağındadır ki, alçaq ermənilər bu məsələdə də bizi qabaqladılar. Necə deyərlər, biz fikirləşincə erməni vurdu Naxçıvana keçdi.
Məsələnin başqa detalları da var. Məsələn, erməninin arvad-uşağı doldurub nicat üçün vətənimizə sürdüyü avtomobilin markası “Yeraz” adlanırmış. Bəlkə gənc insanlar bilmir, hələ sovet dövründə İrəvanda avtomobil zavodu var idi, bir növ “Qazel”ə bənzər yük maşınları buraxırdılar. “Yeraz” markası da elə bu demək idi, yəni “Yerevan Avtomobil Zavodu”. Erməni həmişə bic olub, biz sovetlər dövründə axmaq-axmaq işlər görüb, pambıq, üzüm yığıb, ümumittifaq büdcəsinə xammal verən respublikaya çevriləndə, yaxud Sumqayıtı zəhər zavodları ilə doldurub “qazovkadan” boğulanda Ermənistan saat, avtomobil, konyak, ayaqqabı qayırırdı, brendə çevrilən məhsulları ilə tanınırdı.
Bəli, Yeğişe “Yeraz”da, bütün külfəti də ətrafında sıx birləşərək - bunu ona görə ediblər ki, əsgərlərin atdığı güllə dəyməsin, çünki adam maşının içində nə qədər geniş yayılsa gülləyə o qədər asan tuş gəlir - keçib gəlibdir Naxçıvana. Bəs niyə Naxçıvana? Niyə Qazağa, Tovuza-filana yox? Bu onunla bağlıdır ki, bu saat Azərbaycanda ən inkişaf etmiş bölgə Naxçıvandır. Vasif xanın sayəsində Naxçıvan Amerikanı da ötüb keçibdir, bizim ora çatmağımıza min il var. Özü də xan camaatı döyə-döyə inkişaf elətdirir, son dəfə Bənənyar camaatını demokratiya yoluna sürümüşdür. Neyləsin yazıq, bizim camaatı özbaşına qoysan heç vaxt inkişaf eləmir, gərək ildə beş-on dəfə ağacın altına salıb budayasan, soyuq suda isladasan və sairə. Onda inkişaf da eləyir, hələ analoqu da olmur.
Uzun sözün qısası, erməni Yeğişe cənuba baxıb görüb ki, ara, bu Naxçıvan dəhşət tərəqqi edir, cumub Vasif xanın himayəsinə. Ümidvarıq ki, xan Yeğişenin özü cəhənnəmə, heç olmazsa arvad-uşağına bir gün ağlayacaqdır. Yazıqdırlar, qoy yaşasınlar.
Yeri gəlmişkən, Yeğişe haqda saytda balaca bir məlumat da var idi ki, həmin məlumata əsasən Vasif xanın çox hörmətli bir qonaq əldə etdiyini söyləyə bilərik. Bu Yeğişe Ermənistanda nə az, nə çox - düz 8 (səkkiz) dəfə quldurluq və oğurluq üstündə həbsə salınıbmış!
Məncə, Vasif xan üçün heç də asan olmayacaq - rəqibin təcrübəsi daha böyükdür. Səkkiz dəfə - zarafat gəlməsin...
Vasif xan, görsən Yeğişe ilə bacarmırsan, mindir uçağa, göndər Bakıya. Burda təcrübəli quldurlarımız var - yola verərlər.

781 dəfə baxılıb