OĞURLANMIŞ ADAMLA SÖHBƏT

	03 sentyabr 2010


Onlayn ictimai-siyasi qəzet

Şahvələd ÇOBANOĞLU

OĞURLANMIŞ ADAMLA SÖHBƏT

Azərbaycanın milli sərvətlərinin talan edilməsindən yorulmadan yazırıq. Talan o qədər böyük və açıqdır ki, artıq milli sərvətlərimizə “bizim sərvətlər” deməyə adamın dili gəlmir. Məsələn, “bizim neftimiz” desək, elə bil adamın ağzı yanar. Şəxsən mənim üçün bu talan təkcə maddi zərər kimi başa düşülmür, bəzən onu təhqir kimi qəbul edirəm.

Milyonlarla adamı heçə sayıb kimlərinsə bir ölkənin ictimai sərvətlərini öz atasının mülki kimi talan etməsi hətta gələcək nəsillərin də maraqlarını ayaq altına atmaqdır. Maddi zərərlə yanaşı mənəvi təhqirdir. Halbuki neft pullarının köklü inkişafa qoyulması Azərbaycanı inkişaf etmiş ölkələr səviyyəsinə qaldıra bilərdi. Çəkinmədən demək olar ki, 10 ilə bu ölkəni iqtisadi göstəricilərinə görə Almaniya səviyyəsinə qaldırmaq olar.
Almaniya səviyyəsinə çatmağımız nağıldırmı?
Nağıl bu deyil, nağıl körpü tikib, bəzi yolları təzələyib Azərbaycanın inkişafından danışmaq, gerçəkdə isə ölkəni gerilik məngənəsində saxlamaqdır. “Konfet kağızı siyasəti” heç bir ölkəni irəli apara bilməz. Ağlı başında olan adam bilir, ölkə yolları təkcə əsas magistrallardan ibarət deyil, “ara yollar” bu yollardan o qədər çoxdur ki, neft pullarını oğurlamasan və qəpiyinəcən onların yenilənməsinə xərcləsən, hamısını təzələyə bilməzsən. Bir tərəfdən təzələnmə başa çatanda o biri tərəfdən yol köhnələr.
Köklü inkişafın möcüzəsi
Qeyri-neft sektoru formalaşsa, bölgələr inkişaf etsə, onlar öz gəlirlərindən yollarını da çəkər, qollarını da açar. Doğrusu budur, çünki “pul pul gətirər” prinsipinə əməl etmədən bütün pulları görüntü və müvəqqəti layihələrə xərcləməyin sonu iflasdır. Onda neft qurtaran zaman rəzalət və səfalət qarşısı alınmaz olacaq. Odur ki, demokratiyanın olmaması neft pullarını da yelə verir...
Heyf bu pullardan, onlar bu ölkədə hər kəsə bəs edərdi, amma bölməklə, ciblərə yığmaqla, evlərə paylamaqla deyil. Köklü inkişafa sərmayə etməklə. Köklü inkişaf isə o pulları bizə və bizdən sonrakılara beş qat qaytaracaqdı.
Ən böyük bəla - mənəvi sınma
Talan dövrü qanunsuzluq, ədalətsizlik, haqsızlıq dövründə olur, indi də belə oldu. Lakin nəticə təkcə maddi sərvətlərin talanması ilə getmədi. Azərbaycanlılar da talandı. Onların inamı sındı, onların mənəviyyatı dağıdıldı. Yaltaqlıq ictimai epidemiya halına gəldi. Satqınlıq axın yaratdı. Yaşlılar, gənclər, kişilər, qadınlar, siyasətçilər, jurnalistlər, alimlər, müəllimlər... Hər yandan, hər sahədən satqınlığın xain səsləri gəlməyə başladı.
Satqınlıq elə dərin izahat tələb etmir, sadəcə adam yalançı və haqsız olan tərəfə keçir. Adam bu halda ölkəsinə qarşı getməyə məhkumdur. Adam bu halda xain bir fəaliyyət yolu tutmağa məcburdur. Yalana və haqsızlığa tərəf keçmək hətta gizli şəkildə mümkündür - sən deyirsən ki, ayrı yol yoxdur, yaxud həqiqətin yolu xeyir gətirmir. Amma eyni şeydir.
Həqiqət xeyir gətirməyə bilərmi?
Azərbaycanlılar talandı. Adamları bu tərəfdən o tərəfə keçirdilər - satın aldılar. Azərbaycanlılar təkcə neftini itirmədi, düz yolda olan adamlarını itirdi, üstəlik, həmin adamlar Azərbaycanın əleyhinə işləməyə başladı. Onların bir çoxu deyir ki, həqiqət indi xeyir gətirmir, həqiqəti deməyin xeyri yoxdur. Amma belə ola bilməz. Yalnız həqiqət xeyir gətirə bilər. Həqiqəti demək həmişə xeyir gətirib. Sadəcə, onu çox az deyəndə, az adam deyəndə az xeyir gətirir. Deyənlərin çoxunu isə talan ediblər, həqiqət tərəfdən oğurlayıb yalan tərəfə aparıblar. O adamlar girov kimidir, özləri də bilmir. Onlarla söhbət şəxsən məndə girov götürülmüş adamla söhbət təəssüratı yaradır.

504 dəfə baxılıb