QARA MASKALI QAYĞIKEŞLİK

	30 iyul 2010


Onlayn ictimai-siyasi qəzet

Zamin HACI
zaminhaci@gmail.com

QARA MASKALI QAYĞIKEŞLİK

Bir dostum var, qəzet köşkündə çalışır, istəsəm burda adını və qəzet satdığı yeri də yazaram, ancaq yazmıram, özüm də hərdən ordan qəzet alıram, gedib obyektini bağlayarlar, qalarıq ikimiz də avara. Uzun sözün qısası, dostumuz iki-üç gün qabaq mənə deyir ki, bu hakimiyyət xalqı saymır, belə hörmətsizlik olmaz və sairə. Osmanlılar demişkən, şaşırdım, “bu nə deyir” düşündüm. Guya yapokratlar xalqı haçan sayıb, indi də saysınlar? Ancaq dostum sözünün canını deyəndə gördüm çox haqlıdır.

Deyir ki, hər yeni il girəndə elektrikin, qazın, benzinin, ən pis halda suyun, lap ölü halda kanalizasiya və liftin qiymətlərini qaldırırdılar, biz də başa düşürdük ki, hakimiyyət xalqı fikirləşir, xalq sarıdan narahatdır. Bəs bu il? Təsəvvür elə, artıq yanvarın ortalarıdır, hələ də hökumət heç nəyi qaldırmayıbdır. Özü də qaldırmağa bu qədər imkan ola-ola heç nəyin qaldırılmaması xalqa aşkar sayğısızlıqdır.
Mən gördüm adam tamamilə doğru buyurur. Bizdə hakimiyyətlə xalq arasında bir neçə ünsiyyət vasitəsi vardır, bunlardan birincisi polis dəyənəyidirsə, ikincisi qiymətlərdir. Həmişə xalqa nəsə çatdırmaq lazım olanda qiymətləri qaldırırlar. Bu il isə qiymət qalxmayıb, deməli, hakimiyyətin camaata heç bir sözü yoxdur, daha onu vecinə almadan yaşamağa başlayıbdır.
Yaxşı olmayacaq. Xalqa bu cür mənfi münasibətin nəticəsidir ki, Elçin bəy adlı bir dostumuz “dövlət qulluqçuları” ifadəsinin tam yeni formasını tapmışdır: dövlət quldurçuları! Mən bu ifadəni çox bəyəndim. Quldurçuluq deyil, bəs nədir?
Quldurçuluq demişkən, təzəlikcə Hacıqabul rayonunda maraqlı söhbət yayılıbdır. Yerli camaat danışırmış ki, bir dəstə qara maskalı adam gəlib, rayonun icra hakimiyyəti başçısını, polis rəisini, prokuroru basıb qara şüşəli avtomobilə, harasa aparıb. Düzdür, icra başçısının xaricə getdiyi də deyilir, ancaq bu heç nəyi dəyişmir. Ola bilər ki, qara maskalılar icra başçısını elə xaricə aparıblar. Məsələn, Mayamidə istirahət etməyə. Əlbəttə, zarafat edirəm, bizdə qara maskalılar turizm işinə baxmır.
Biz ölkədə gedən prosesləri 37-ci il repressiyaları ilə analogiya etməyi, eyniləşdirməyi sevirik, qara maskalıların adam aparmağı da o dövrü xatırladır. Sadəcə cüzi fərq var - geyim formasında. O vaxtlar Stalin rejimi kimisə gedər-gəlməzə yola salmaq istəyəndə gecələr adamın yaşadığı yerə qara paltarlı, qara plaşlı və yaxud qara dəri gödəkçəli “NKVD” işçiləri gələrdilər. İndi isə maskanın rəngi qaradır. Adam aparanların geyim rənginin necəliyi indi elə önəm daşımır, əsas odur üzdə qara maska olsun. Rayonun az qala bütün rəhbər şəxslərinin eyni vaxtda qara maskalıların əlinə keçməsi isə yeni hadisə də sayıla bilər. Dövlətçilik, sabitlik budur.
Sizcə, ekologiya və təbii sərvətlər naziri Hüseyn Bağırov nədən vətəndən didərgin düşübdür, sorağı eyzən dağdan-daşdan gəlir? Gah Kilimancaroya, gah And dağlarına dırmaşır, Azərbaycanda isə ağacları milçək kimi qırırlar. Mən bilirəm Hüseyn bəyin cəlayi-vətən olmasının səbəbi nədir. Adam qorxur ki, Bakıda çox otursa qara maskalıların diqqətini cəlb eləyər, gəlib onu da “hoppalara” apararlar. Bu saat bir azərbaycanlı nazir üçün ən təhlükəsiz, sağlıqlı yer elə Kilimancarodur, And dağlarıdır. Kim deyir ki, alpinizm bizim dövlət idarəçiliyindən daha təhlükəlidir? Boş sözdür. Alpinizmdə heç olmazsa bir dəfə dərəyə yuvarlanıb ölüb getmək ehtimalı var, yapokratiyada isə adamı illərlə çürüdürlər, işgəncə verib həzz alırlar.
İnanmayan qazamata baş çəkib keçmiş nazirlərdən, məsələn, Fərhad Əliyevdən soruşa bilər.

909 dəfə baxılıb