DÖVLƏTÇİLİK İLLÜZİYASI

	30 iyul 2010


Onlayn ictimai-siyasi qəzet

Zamin HACI
zaminhaci@gmail.com

DÖVLƏTÇİLİK İLLÜZİYASI

Hacıqabulun icra hakimiyyəti başçısı ilə bağlı triller davam edir. Müxbirimiz bu günlərdə həmin rayonda olub, orada icra hakimiyyətinin işçiləri ona deyiblər ki, başçı Əhməd Muxtarovu qara maskalıların aparması xəbəri yalandır, əslində yoldaş Muxtarov hələ keçən il 25 dekabrdan məzuniyyətə çıxıbdır, harasa xaricə gedibdir və yanvarın axırlarında qayıdacaq. Təki belə olsun, istəməyənin gözü çıxsın.

Yeri gəlmişkən, orada bir başçı köməkçisi çalışır, keçən günlərdə bizim qəzeti hədələmişdi, demişdi bizim hamımızı - qəzetin tam redaksiya heyəti olaraq - yox edəcək. Canıma xeyli qorxu düşmüşdü, çünki yox olmaq istəmirdim, hələ YAP-ın bütün dünyada qalib gələcəyi yaxın gələcəyi görmək ümidiylə yaşayıram. Üstəlik, məndə belə fikir yaranmışdı ki, bəlkə elə başçını da bu adam yox eləyibdir, əgər belə illüzionçu qabiliyyəti varsa, nədən olmasın? Ümumiyətlə Devid Kopperfildi gətirmək lazımdır Azərbaycana və Hacıqabula, bütöv redaksiya heyətini yox eləməyi öyrənsin.
Ancaq həmin başçı köməkçisi əməkdaşımızla söhbətində deyib ki, onun kimisə yox eləmək fikri olmayıb, qəzetçilərə hörməti var, yanlış anlaşılıb və sairə. Ürəyim yerinə gəldi, yoxsa arvad-uşaqla vidalaşıb artıq yox olmağa tam hazır vəziyyətə gəlmişdim. Şükür, bu xatadan adladıq, Allah hamını xətadan-bəladan uzaq eləsin.
Bu öz yerində, ancaq bir sual hələ açıq qalır: Hacıqabulun icra başçısı hardadır, ümumiyyətlə o, xaricdə nə edir? Bəlkə bizim icra başçıları həm də Xarici İşlər Nazirliyində görəvlidir, indi Hacıqabulun başçısı da gedibdir xaricdə Qarabağ münaqişəsiylə bağlı danışıqlar aparmağa? Niyə də olmasın, onsuz bizim bir çox diplomatlar ya keçmiş polis rəisləridir, ya da indiki polis rəislərinin uşaqlarıdır. Ona görə də diplomatiyamız əlində zopa, dünya boyu qabağına çıxanı çırpa-çırpa gedir.
Biz Hacıqabulun başçısını axtarmaqda ikən o yanda Oğuzun icra hakimiyyəti başçısı Aydın Əlihüseynov yoxa çıxmışdır. Deyilənə görə, bu adam keçən ilin sentyabrından xaricdə müalicə alır, lakin versiya var ki, yoldaş Əlihüseynov fövqəlnazir Kəmaləddin Heydərovla toqquşub, o üzdən baş götürüb qaçıb.
Yoldaşlar, axı bu nə prosedurdur? Nə üçün bütün icra hakimiyyəti başçıları öz məzuniyyətlərini, müalicələrini xaricdə keçirirlər? Bəyəm bununçün ölkəmizdə dilbər guşələr, dilbər xəstəxanalar yoxdurmu? Canınız çıxsın vətəndə istirahət edin, turizm naziri Əbülfəs Qarayevi sevindirin, o cümlədən canınız Oqtay Şirəliyevin xəstəxanalarında çıxsın. Ayıbdır, dünyada analoqu olmayan ölkə qayırıblar, ancaq istirahətə, müalicəyə xaricdəki dılğır yerlərə gedirlər. Yəqin, burdakı gözəl şəraiti xalqın istifadəsinə buraxmaq istəyirlər. Lakin biz tələb edirik: qoy Oğuzun icra başçısı Hacıqabul xəstəxanasında müalicə olunsun, Hacıqabulun icra başçısı isə Oğuzda istirahət eləsin.
Biz icra başçılarının yoxa çıxmasını gələcəkdə gözləyirdik, hardasa neft bitəndə. Ancaq proses başlayıbdır və davam edir. Bu günlərdə Ağır Cinayətlər Məhkəməsində 1997-1998-ci illərdə Sumqayıtın icra hakimiyyəti başçısı olmuş Süleyman Rəşidovun cinayət işinə baxmağa başladılar. Adam görün nə gözəl maddələrlə suçlanır: mənimsəmə və israf etmə, vəzifə səlahiyyətlərini aşma, vəzifə saxtakarlığı. Rəşidov bu maddələrlə düz 10 il axtarışda olubmuş, nəhayət keçən il quyruğu ələ keçibdir. Hələ maraqlıdır ki, bunlar Rəşidovun icra başçısı olmazdan öncəki əməllərinə aiddir - onu Sumqayıtın təhsil şöbəsi müdiri olarkən törətdiyi cinayətlərə görə ittiham edirlər. Paradoksal haldır: əgər adam bu cinayətləri törətməsə necə icra hakimiyyəti başçısı olacaqdı? Başqa cür axı mümkün deyil.
Abşeronun polis rəisi Məmmədəli Əliyevi də uzun axtarışlardan sonra tutublar. Əliyev hətta prezidentə sui-qəsddə suçlanır.
Avtoritar rejimlərin hamısı bu günə düşür - səni tutmasınlar deyə vaxtaşırı kimlərisə tutmalısan. Yapokratiyada heç kim xoşbəxt deyil.

1314 dəfə baxılıb