BİZ NİYƏ QUŞLARI MİNMİRİK

	11 mart 2010


Onlayn ictimai-siyasi qəzet

Zamin HACI
zaminhaci@gmail.com

BİZ NİYƏ QUŞLARI MİNMİRİK?

Yanvarın 18-də dövlət başçısı nazirləri, komitə sədrlərini yığıb keçən ilə aid yığıncaq keçirtdi, uğurlarımızdan danışdılar, bir növ ilə yekun vuruldu.

Bu, dövlət idarəçiliyində qaydadır, gərək hər il başa çatanda ona yekun vurasan, yoxsa növbəti ilə keçməyin mənası olmur. İl ilə qarışır, camaat da çaşır, inkişaf edə bilmir. Məsələn, iki qonşu təsəvvür edin. Onlardan biri yeni iqtisadi ilin başladığını bilir, işıqların tez-tez sönməsinə, qazın hər saat kəsilməsinə öyrəşir, o biri qonşu isə hələ köhnə ilin havasındadır və tez-tez bayıra çıxıb səfeh kimi soruşur ki, sizdə də işıq yanır, qaz gəlir, və sairə... Hətta belə yersiz sorğu-suallara görə davalar, kriminal olaylar da ola bilər. O üzdən, hər bir iqtisadi ilin başını bağlamaq vacibdir. Hələ onu demirəm ki, elə illər var, xüsusilə sırtıq olur, burnunu növbəti ilə soxmağa cəhd edir. Gərək ilin başını bağlamağı yanvar ayından sonraya saxlamayasan.
Əlqərəz, prezident müşavirədə dedi ki, Azərbaycan 2009-cu ildə də uğurla inkişaf edib, ölkəni daha da gücləndirmək, ölkə qarşısında duran bütün problemləri həll etmək üçün bizim bütün imkanlarımız vardır. Əslində prezidentin çıxışında “uğurla inkişafa davam edib” cümləsi səslənmişdi, ona görə də bunu xüsusi araşdırmağa ehtiyac var.
Biz ötən illərdə dünyada analoqu olmayan inkişaf etmişdik, əgər keçən il uğurla inkişaf davam edibsə məntiqlə indi biz harda olmalıyıq? Doğrusu, bunu anlamaq mənim zəif intellektim xaricindədir. Axı daha Yer planetində bizim müqayisə ediləcəyimiz heç bir ölkə qalmamışdır. Mən bugünlərdə “Titanik” filminin rejissoru Kameronun (bəlkə də Kemeron - nə bilim) yeni filminə - dünyaya səs salmış “Avatar”a baxdım. Olduqca mənasız, kompüter effektləriylə tıxışdırılmış bir kinodur. Sözüm onda deyil. Filmdə Pandora adlanan planetdə yaşayan humanoidlərdən bəhs edilir. Onlar bir yekə ağacın koğuşunda yaşayırlar, arxeopteriksə bənzər nəhəng quşları minib uçurlar. İnsanlar Pandoranı işğal edir, oradakı ağacları, humanoidlərin - həmin camaatın adı filmdə deyəsən “navi” idi - evini ekskavatorla, polis gücüylə uçurdur, dağıdır, naviləri öldürürlər.
Mən bu filmə baxanda eynən Sulutəpədə, Bayılda, Binəqədidə evləri ekskavatorla uçurdulan camaatımız yadıma düşdü. O cümlədən, Bakıda, rayonlarda çoxillik ağacların vəhşicəsinə qırılması gözüm önünə gəldi. Elə bil Kemeron bizim ölkədə baş verənləri fantastik film qılafına salıb.
Bax, mənim dediyim budur ki, əgər bizim kainatda inkişaf baxımından geri qaldığımız yeganə yer varsa o, elə Pandora planeti olmalıdır. Deyəcəksiniz ki, bəs axı hər şey uyğun gəlirdi? Yox! Axı mən pandoralıların quşları minib uçmağını da qeyd elədim! Bu boyda inkişaf etməyimizə baxmayaraq, biz hələ də quş minməyi öyrənməmişik. Şəhərdəki tıxaclardan qurtulmaq üçün hərəmiz bir qarğadan-quzğundan əhliləşdirib minsək pis olarmı? Hacıleyləyin belinə lap ailəliklə yerləşmək olar. Özü də sizə deyim ki, bu quş minmək bizim mentalitetimizdə var, nağıllarımızda əks olunub, sadəcə unutmuşuq, yadırğamışıq. Gərək camaatda da təşəbbüs olsun, yoxsa elə hər şeyi hökumətdən gözləyirik. Necə deyərlər, “Hər kəs 9 milyonuncu doğulmasa, Günah onun özündədir”.
Ümumi Daxil Məhsul artır, yeni körpülər tikilir, hətta körpülərə çıxmaq üçün də körpülər tikirik, əhali 9 milyonu keçib, Ermənistanda isə adam qalmayıb, ünvanlı sosial yardım, pensiya almağa ərindiyimizdən getmirik. Qaz, işıq məsələsini yuxarıda yazdım, bir az da yazım. 2009-cu ildə işıqlarımız hər gün iki-üç saat sönürdüsə, indi gündə beş-altı dəfə, hərəsində iki saat sönür. Əməllicə inkişaf var. Yaxud, qaz tez-tez kəsilir, çünki inkişafın elə mərhələsindəyik ki, daha qaza ehtiyacımız yoxdur.
Elə bu yazını da qaranlıqda yazıram, noutbukun enerjisi qurtarmaq üzrədir, ona görə də salamat qalın. İşıq yanan kimi inkişaf edəcəyəm, yəni yazının ardı...

1021 dəfə baxılıb