ƏDALƏTSİZ DÜNYA | Yeni Müsavat

	30 iyul 2010


Onlayn ictimai-siyasi qəzet

Zamin HACI
zaminhaci@gmail.com

ƏDALƏTSİZ DÜNYA

Seçkini Musa saxtalaşdırır, Çavuşoğlunu prezident qoyurlar

Musa Musayev yanıb-tökülməsin neyləsin? Onu Naftalanın icra hakimiyyəti başçılığından azad edən gün Mövlud Çavuşoğlunu Avropa Şurası Parlament Assambleyasına prezident qoydular. Mahiyyətcə Çavuşoğlu və Musayev eyni adamdırlar, ikisi də hər zaman Azərbaycanda demokratik rejim qurulmasına əngəl olublar, badalaq vurublar, seçkiləri saxtalaşdırıblar.

Axı təkcə seçki qutusuna, səsvermə protokuluna barmaq eləyən saxtakar deyil, həm də belə seçkini “demokratiya yolunda irəliyə addım” sayanlar saxtakardır. Bəli, indi belə saxtakarların birini Avropada prezident qayırırlar, o birini isə Məzahir Pənahovun sözüylə işdən qovurlar. Çox ədalətsiz, insafsız dünyada yaşayırıq. Musa Musayevin yerində olsam acığa gedib MSK-nın, ya da YAP-ın önündə özümü yandıraram. Belə dünyada niyə yaşayırsan, Musa bəy? Var, get burdan.
Bizim astronom alimlərin bu vurhavurda, Əliağa Vahid demişkən, “soxasoxda” işi-gücü qurtarıb, birbaşa kainata burun dürtmək fikrinə düşüblər. Şamaxı rəsədxanasına təzə bir alət (Qarabağ tərəfdə buna “həcəmət” də deyirlər) quraşdırıblar. Sitat: “Onun vasitəsilə uzaq ulduzların ətrafında naməlum planetlərin axtarışı və müşahidəsi aparılacaq” (Azadlıq radiosu). Rəhmətliyin uşağı, sizin naməlum planet nəyinizə lazımdır? Bəlkə Ziya Məmmədov, Bəylər Əyyubov, Kəmaləddin Heydərov və başqa məmurlar sifariş ediblər, naməlum planet tapıb orada yarmarka açacaqsınız, şadlıq sarayı tikəcəksiniz? Ya bizim camaata bu naməlum planetin nə xeyri var? Hazırda üstündə yaşadığımız Yer planetində camaatımızın bəxtinə bir qarış yer düşüb, orda da imkan vermirsiniz rahat yaşasınlar. Elədən-beləyə qovursunuz, evlərini ekskavatorla başlarına uçurdursunuz. Bax elə bu cür mənasız siyasət üzündən Musa Musayev kimi unikal kadr işsiz qaldı. Naftalanın seçki müşahidəsini düzgün aparmaq lazım idi, ulduzların və qalaktikaların öz yiyəsi var.
Mən heç də kosmik şəxsiyyət deyiləm - bizdə bundan cəmi bir dənə olubdur - ancaq balaca ağlımla dərk edirəm ki, insanlara qiymət vermək lazımdır. Məsələn, bu yaxında Binəqədi “Sobes”inə yolum düşmüşdü. Əslində bu idarənin dilimizdə uzun bir adı var, ancaq elə “Sobes” yaxşıdır, çünki bu idarədə işlər ruscadır. Təsəvvür edin, idarənin uşaq puluna baxan bölməsi ilə pensiya işinə baxan şöbəsi bir-birindən hardasa 1 kilometr aralıda yerləşir! Siz heç iki ayrı-ayrı binada yerləşən dövlət qurumu görmüsünüz? Belə biabırçılıq harda var? Adamlar, xüsusən də bu idarəyə işi düşən yaşlılar Dərnəgül yolundakı “Həyat” ticarət mərkəzinin yanında avtobusdan düşürlər, qalırlar vurnuxa-vurnuxa, bilmirlər hansı tərəfə getsinlər. Səhv getsən, gərək yol ölçəsən. Məncə, hakimiyyət uşaq pulu ilə pensiya arasında məsafəni uzun eləməkdə haqlıdır, çünki uşaq pulunu düzəldənəcən adam elə pensiyaya çıxır. Mən bu qədər idiot vəziyyət görməmişdim, sən demə, uşaq pulu almaq üçün qonşulardan həqiqətən işləmədiyin haqda arayış almalı - həm özünün, həm arvadın adına - bunu notariusda təsdiqləməli, sonra üstəlik, JEK-dən yaşayış yeri haqda arayışı rüşvət verib götürməlisən, doğum haqda şəhadətnamənin, ər-arvadın şəxsiyyət vəsiqəsinin surəti, nə bilim bacanağın varsa onun Azərbaycan vətəndaşı olması, yoxsa niyə olmaması, donuz qripinə tutulmadığın haqda, Xruşşovun vaxtında eşşək vergisini ödəməyin barədə və sairə və ilaxır... arayışları gətirib verməlisən. Adam belə dövlətdən uşaq pulu istəyərmi? Hətta ürəyindən keçir ki, uşağa dəyməsinlər, cəhənnəm olsun pulları.
Ulduzların birində yapokratlara naməlum yer qalıbsa köçüb məmnuniyyətlə ora gedərdim. Burda nə sifətlər var!.. Adam marsiançik olmaq istəyir onlara baxanda.

1207 dəfə baxılıb