ESTAFET ETİBARLI ƏLLƏRDƏDİR

	11 mart 2010


Onlayn ictimai-siyasi qəzet

Zamin HACI
zaminhaci@gmail.com

ESTAFET ETİBARLI ƏLLƏRDƏDİR

Hacı Məmmədov məşhur “Qara kəmər” əməliyyatından sonra tutuldu, məhkəməsi oldu, yanılmıramsa ömürlük cəza aldı. Ancaq Məmmədovu hər hansı qazamata köçürmədilər, matah kadr kimi (bilmirəm nədənsə burada öncə “matah armud” yazmaq istədim) Milli Təhlükəsizlik Nazirliyinin təcridxanasında saxladılar. Hələ də yoldaş Hacı oradadır, hərdən düşük-düşük rəsmlər çəkib Elçin Behbudova bağışlayır. Heç kim bilmir ki, Məmmədovu MTN-də nə üçün saxlayırlar. Bir fərziyyəyə görə Məmmədov bizim milli təhlükəsizliyimizin qarantı kimi bir şeydir, idarədən qıraqda olsa təhlükəsizliyimiz yağış vurmuş makiyaj kimi axıb gedərmiş.

Bütün hallarda Məmmədovun günü MTN izolyatorunda pis keçmir, orada onun süpürgəçi və dalandar vəzifələri daşıdığını söyləyənlər də var. Rəssamlıq da öz yerində.
Mənim kriminal ünsürlərlə heç bir alış-verişim yoxdur, Məmmədovu xatırlamağımın səbəbi ayrıdır. Hacı tutulandan sonra bir neçə il bizim ölkədə adam oğurluğu sahəsi boş qaldı. Hətta yadımdadır, bir dəfə daxili işlər naziri Ramil Usubov yekun hesabatında fəxrlə qeyd eləmişdi ki, bu il Azərbaycanda adam oğurluğu hadisəsi qeydə alınmayıb.
Bu, insanın qəlbində bir qədər kədərli hisslər oyadırdı. Axı hər bir pis hadisənin müsbət tərəfləri də var, biz son illər bu təcrübəyə öyrəşmişik. Belə bir sözümüz də var ki, adamın bir üzü ağlayanda o biri üzü gülər. İkiüzlü yaşamağın formuludur bu əslində. Nə isə, adam oğurluğu az qala cinayətlərimizin “Qırmızı kitabı”na düşəcəkdi. Və elə çıxırdı ki, daha Azərbaycanda qiymətli, oğurlanası adamlar qalmayıbdır. Halbuki belə deyil. Bu haqda az sonra.
Son bir ayda Bakıda adam oğurluğu ilə bağlı iki cinayətin üstü açıldı, bunların hər ikisini Çin Xalq Respublikası vətəndaşları törətmişdi. Özü də çinlilər elə çinliləri oğurlamışdılar. Hətta bu cinayətlərin birində girovun barmağını kəsib pul tələb elədikləri adama göndərmişdilər. Eynən Hacı Məmmədov üslubunda! Axı o da vaxtilə oğurladığı şəxsin qulağını kəsib atasına göndərmişdi. Çinlilərin estafeti Hacı Məmmədovdan alması, ümumiyyətlə, ölkəmizdə quldur sferasının yabançıların əlinə keçməsi xalqımızda ümidsizlik doğura bilərdi.
Burada bir haşiyə çıxım. Hələ də təəccüblənirəm ki, çinlilər bir-birini Bakıda nə üçün oğurlayıblar. Bir xalqdan dünyada milyard yarım adam ola, bu durumda onun hansınısa oğurlayasan... O cümlədən, bizim güc strukturları da mat qalınasıdır. Oğurlanmış çinlini bu dünyada tapmaq samanlıqda iynə tapmaq qədər çətin işdir.
Uzun sözün qısası, dünən Bakıda yeni adam oğurluğu cinayətinin açılması xəbəri gəldi. Bu dəfə öz vətəndaşlarımız elə öz camaatımızdan kimisə oğurlayıbmış! Sağ olsunlar, böyük bir xəcaləti üzərimizdən götürüblər. Yoxsa çinlilər çinliləri... Ayıb olardı bizə ki, vətənimizdə əcnəbi quldurlar at oynatsınlar. Özümüzdə quldur qəhətdirmi? Yoxsa Azərbaycan quldur yetişdirməkdə də qısır olmuşdur? Olmamışdır, olamaz! Biz çinlilərə sübut edərik ki, adam oğurluğu necə olur. Biz cinayətin orijinalını edərik, “kitayskisini” yox!
Məsələn, bizdə oğrular var, dövlət idarələrində çalışırlar, əlləri təmiz, əyinlərində kostyum, xarici maşınlarda oğurluğa, yəni işləməyə, dövlət qulluğuna gəlib-gedərlər. Ta sifətinə corab keçirt, maskalan, nə bilim, əlcək geyin, silah çək... Bunlar kustar metodlardır, bizim quldurlara yaraşmır. Bizimkilər ərz elədiyim kimi, modern üslubda çalışırlar. Özü də bir-iki nəfəri oğurlamaq, girov götürmək uşaq oyunudur, oğul ona deyərəm ki, bütöv xalqı, respublikanı girovluqda saxlasın.
Hələlik bu qədər. Qismət olsa qiymətli adamlarımızdan biri haqda növbəti köşədə yazacağam.

949 dəfə baxılıb