EMİN DAYIYA TƏBRİK | Yeni Müsavat

	13 mart 2010


Onlayn ictimai-siyasi qəzet

Zamin HACI
zaminhaci@gmail.com

EMİN DAYIYA TƏBRİK

Və psixoloji zərbə haqda

Emin dayının 60 yaşının tamam olmağını 3-4 gün sonra öyrəndim və gec olduğuna görə utandığımdan zəng edib təbrik edə də bilmədim. Emin Fətullayev isə Azərbaycanda bu saat yaşayan ən qiymətli insanlardan biridir, onun yubileyini qəzetdə olsa da təbrik eləməyi özümə borc sanıram.

Emin dayı məhbus jurnalist Eynulla Fətullayevin atasıdır. Kaş bu dünyadakı hər bir suçsuz məhbusun bu cür əzmkar, cəsur və yorulmaz atası olaydı. (Əlbəttə, mən heç kəsin suçsuz həbsini arzulamıram, ancaq avtoritar rejimlər qaldıqca təəssüf ki, bu qismətdən yan qaçmaq olmur). Əgər bu gün Eynulla bəy rejimin qazamatında zülmə boyun əymədən söz azadlığı uğrunda qutsal savaşını aparırsa gərək cəmiyyət bunu mütləq bilsin: bu əyilməzlik məhz Emin dayının, Eynullanın anası Gülşən xalanın tərbiyəsinin nəticəsidir. Və Eynulla həbs ediləndən sonra biz Emin dayını yaxından tanıdıq, gördük ki, bu kişi heç də Eynulladan geri qalan mübariz deyil, hətta bir çox cəhətlərinə görə Eynulladan üstün şəxsiyyətdir. Bunu elə-belə yazmıram. Mən Emin dayı ilə uzaq yol da getmişəm, dəfələrlə ən fərqli mövzularda danışmışıq - yeri gəlmişkən, bu insanla eyni şəkildə həm klassik musiqidən, həm siyasətdən, həm də məsələn, sovet dövründəki hansısa avtoritet qədeşdən maraqlı söhbətlər eləmək olar - mən görmüşəm, bu insan cəmiyyətdəki proseslərə bəzən Eynulladan dəqiq qiymət verir.
Uzun sözün qısası, Emin dayı haqda hələ çox yazılacaq və mən sizə deyim ki, onun şəxsiyyəti hazırda bir qədər Eynullanın kölgəsində qalıb. Yaxın zamanlarda Eynulla qazamatdan çıxandan sonra biz Emin dayı haqda daha geniş yazılar yazarıq. Bir daha təbriklər, gözəl insan!

***

Sülh və Demokratiya İnstitutunun rəhbəri Leyla Yunus ölkə hakimlərinin kürkünə birə salmağı ilə tanınır. Gah onlara zolaqlı mantiya, gah xoruz bağışlayır, ürəyimizdən tikan çıxardır. Keçən ilin noyabrında isə hörmətli Leyla xanım qanunları, insan haqları konvensiyalarını pozaraq qanunsuz hökmlər çıxardan məhkəmə hakimlərinin qara siyahısını açıqlamışdı. Ədliyyə Nazirliyinin Məhkəmə Hüquq Şurası guya Leyla xanımın hesabatına cavab verib, əslində isə ağızlarına gələni dövlət qəzetlərindən birində yazıblar. Leyla xanım onların cavabını verib və mən də bu mövzuya toxunmaq istərdim.
Hakimlər Leyla Yunusun haqqında yazıblar: “Azərbaycanın uğurlarına kölgə salmağa, beynəlxalq imicinə xələl gətirməyə çalışan Leyla Yunusun milli maraqlara zidd fəaliyyəti ölkə ictimaiyyətinə yaxşı məlumdur”. Belə yerdə deyiblər ki, utanmasan oynamağa nə var... Qanunsuz hökmlər çıxardan, axırda həmin hökmləri Avropa Məhkəməsinin qərarıyla ləğv edilən bu adamlar qızarmaq əvəzinə başqalarına şər atırlar. Onlara elə gəlir ki, beynəlxalq imic deyərkən rüşvətxorluq və korrupsiya, insan haqlarını tapdalama, söz azadlığını boğma üzrə beynəlxalq hesabatlarda qara yerlərə Azərbaycanın adını salmaq nəzərdə tutulur, belə daha yaxşıdır. Ancaq bu adamlara nə deyəsən? Növbəti sitatı oxuyun, özünüz görəcəksiniz bizim hakimlərin yüksək dərrakəsini: “Bir məqamı da unutmaq lazım deyil ki, məhkəmədə çəkişən hər iki tərəfin hansının haqlı olmasını müəyyən eləmək sadəcə qeyri-mümkündür”. Hakimlər yazır bunu! Bəs onda məhkəmə nəyə lazımdır, yoldaşlar? Əgər haqqı müəyyən eləmək “sadəcə qeyri-mümkün”sə... Sizə diplom verənin, hakim qoyanın da... Televizorda deyilən kimi, düüüttttt...
Mən başa düşürəm, onu təbrik eləməklə başladığım yazını Fəzail Ağamalıdan sitatla bitirməyim Emin dayını üzəcəkdir, ancaq gərək bağışlasın. Çünki sitat çox məzəli idi, yazmaya bilmədim.
Qəzetimiz “Haiti zəlzələsindən sonra yetim qalmış uşaqları övladlığa götürərsinizmi” mövzusunda sorğu keçirib, Ağamalının cavabı: “Zəlzələ həmin uşaqlara böyük psixoloji zərbə vurub, o baxımdan başqa ölkədə böyümək onlara daha pis təsir edər”. Nə olsun yapokratdır, hətta Fəzail bəy də başa düşür ki, haitili uşağın Azərbaycanda böyüməsi ona psixoloji zərbə olar.
Haiti camaatına səbr diləyirəm - bizə baxın, şükür eləyin.

1018 dəfə baxılıb