ORDU, YOXSA DƏLİXANA | Yeni Müsavat

	30 iyul 2010


Onlayn ictimai-siyasi qəzet

Zamin HACI
zaminhaci@gmail.com

ORDU, YOXSA DƏLİXANA?

Milli Məclisin sədr müavini Bahar Muradova “Mediaforum” saytına bildirib ki, Daşkəsəndə hərbi hissədə törəyən faciənin səbəbi əsgərin psixoloji durumunun qaydada olmamasıdır. Ancaq orada 4 hərbçini öldürən, 2-sini yaralayan, sonradan özləri də intihar edən - başqa versiyaya görə qətlə yetirilən - əsgərlər axı iki nəfər olublar! Belə çıxır ki, onların ikisinin də psixoloji durumu anormal imiş.

Təzə yarlıq deyil. İndiyəcən ölkədə baş verənlərin çoxunu yapokratlar camaatın dəliliyi ilə izah ediblər. Ən son Naxçıvanda, Bənəniyarda camaata divan tutan hakimiyyət az qala bütün kəndin havalandığını söyləmişdi. Hamıya dəli adı yapışdıra-yapışdıra gedirlər, guya bu ölkədə yalnız özləri ağıllıdır. Ölkənin sərvətlərini asudə talan edə bildikləri üçün ağıllıymışlar. Bəlkə də elə bu cürdür. Bizim ağlımız varsa, belə mənasız rejimdə 17 ildir necə yaşayırıq? Deyəsən bizim hamımız elə dəli olmuşuq. Şübhəniz varmı? Varsa onda yadınıza salın, neçə nəfərə bu cür demisiniz: “Ağlın olsun, hakimiyyətə qarşı çıxma, yaltaqlan, boyun əy, bir parça çörəyini qazan”. Şəxsən mənə bu cür sözləri çox deyiblər, hələ də “ağıllanmadığım” üçün özümü dəli hesab etmək haqqını saxlayıram.
Daşkəsəndə qətlə yetirilən 4 zabitin polkovnik-leytenant olduğu bildirilir. Azərbaycan üst-üstə 6 əsgərini itirib. Bu böyük biabırçılığa görə kimin başı ağrıyacaq? Bəlkə təzəlikcə, faciədən cəmi bir gün öncə 60 yaşı münasibətiylə “Şöhrət” ordeni alan Səfər Əbiyev utanacaq, aparıb ordeni geri qaytaracaq? Axı o, cənab nazir, ömrü boyu bircə qələbə də qazanmamış insan bizdən fərqli olaraq gözəl psixoloji duruma malikdir! Qaytarma ordeni geri, Səfər bəy, qaytarsan olarsan bizim tayımız. Ağlın olsun, necə ki, var...
Bizim hətta futzal komandamız da varmış, qələbə qazanırmış. Mən futbolla maraqlanmıram, oxucumuz Vasif Həsənov yazıb: “Futzal üzrə yığma komandamız Avropa çempionatında ilk dörd komanda sırasına düşə bildi. Böyük futbolda biabırçı və uğursuz nəticələrin ardından ”kiçik" futbolda qazanılan bu böyük uğur təəccüblü görünə bilər. Amma məsələyə diqqətlə baxanda görürük ki, qələbələri milliləşdirilmiş braziliyalılardan və ruslardan ibarət heyətin hesabına əldə etmişik. Komandanın hətta baş məşqçisi belə xaricidir. Burdan belə nəticəyə gəlmək olar ki, biz dövlət səviyyəsində bu transfer məsələlərinə diqqət etməliyik. Məsələn, kurruklium (qurbağa qurultusuna oxşayır) haqq-hesabını biz Hollandiyadan mütəxəssislər çağırıb öyrənincə, holland təhsil naziri transfer etsək daha yaxşı olar. Nəqliyyat nazirini isə Koreyadan və ya Yaponiyadan gətirsək körpülərimiz, yollarımız və limanlarımız da yüksək səviyyədə inşa olunar. Bu siyahını uzatmaq da olar, amma məncə, bizə daha çox xarici baş məşqçi lazımdır. Görəsən “transfer pəncərəsi” nə vaxt açılır!?" Gördüyümüz kimi, bu oxucunun da psixoloji durumu yerindən oynayıbdır, işi-gücü qurtarıb, ilin bu vaxtında vətən, millət haqda düşünür, xaricdən prezident dəvət eləməyimizi istəyir. Bunun adresini Bahar Muradovaya göndərmək mənə borc olsun.
17 ildə həmin deputatxana bir dəfə də olsun ordudakı durumu müzakirə eləməyib, ümumiyyətlə orduya heç bir nəzarət yoxdur. Arada hansısa deputatlar gedirlər, əsgərlərlə tərəkəmə oynayıb qayıdırlar, guya hər şeyin yaxşı olduğunu söyləyirlər. Allah rəhmət eləsin, əgər həmin qətlə yetirilən zabitlər də hadisədən qabaq AzTV-yə intervü versəydilər, onlar da şübhə etmirəm ki, ordumuzun qüdrətindən danışardılar, hər şeyin yaxşı olduğunu söyləyərdilər. Göründü ki, yaxşı deyilmiş. Bəs bu haçanacan davam edə bilər? Polkovnik-leytenantlar generalları gülləboran edənəcənmi?
Azərbaycan mənəvi-psixoloji deqradasiya, aşınma içində ölür, onun oğulları da can verir. Ordu vətəni qorumaq üçün silahlı bir qurumdur, ancaq bu ordu 17 ildir nə işlə məşğuldur?
Əqidəsini satıb hakimiyyətə işləyən siyasətçilərimiz, partiya sədrləri arasında bir vaxt populyar olan aforizm var idi: “Ancaq ölülər və dəlilər fikirlərini dəyişmir”. Guya bunlar diri və ağıllı idilər. Bəs dəlilər və ölülər artanda nə etməliyik? Fikirləşin.

1346 dəfə baxılıb