SABİR AZƏRİNİN ÖLÜMÜ

	03 sentyabr 2010


Onlayn ictimai-siyasi qəzet

Şahvələd ÇOBANOĞLU

SABİR AZƏRİNİN ÖLÜMÜ

Yazıçı Sabir Azəri mənəvi sağlamlığını axıracan qoruyan az sayda ziyalıdan biri idi. Rauf Arifoğlu dünən yas yerində onun haqqında bir fikir dedi: “Bütün zamanlarda sınaqdan çıxan adam idi”.

Yadıma onun xəstə olduğu illərdə vurduğu zənglər, sakit və ağır danışığı, aydın fikirləri düşdü. Yadıma düşdü ki, biz onunla uzun illər yalnız telefonda danışmışdıq. Heç vaxt bizi zəngsiz qoymurdu. Hamısı da dəstək zəngləri idi, hamısı da doğma bir tərzdə. Hamısı da çətin günlərimizdə. Hətta özünün də xəstə olduğu, çətin və ağır günlərində də...
Amma bir dəfə mən onu heç gözləmədiyim bir yerdə gördüm. Sağaldığını bilmirdim. Eynulla Fətullayev təzəcə həbs olunmuşdu və bulvardakı biznes mərkəzində bir etiraz forumu keçirmək istəyirdik. Mərkəzin qapısını bağlayıb bizi oraya qoymadılar, öncədən ödədiyimiz pulu da özümüzə qaytardılar. Adamlar da az gəlmişdi, daha doğrusu, dəvətlilərdən çox adam “qeyb” olmuşdu. Biz də açıq havadaca qısa bir tədbir keçirdik. Tədbiri açdım və qətnamə oxuyarkən qarşımda duran adamlardan birinin Sabir müəllim olduğunu gördüm. Həmin gün bir xeyli söhbət etdik, dedi ki, hələ ağrıları çoxdur, amma dözməyib bu ağır gündə evdə oturmağa...
Elə bu andaca kövrək bir hisslər keçirirəm. İnanmaya bilərsiniz, bu illərdə heç zaman bizdən özü ilə bağlı nəsə xahiş etmədi, nə haqqında yazılan bir yazını dərc etməyi, nə müsahibə verməyi, nə də kitabları və əsərləri haqda yazmağı. Bir dəfə də soruşmadı ki, onun əsərlərini oxumuşuqmu, oxuyuruqmu. Bir yazıçının məhz bu məsələlərdə bu qədər biganə olması doğrudan da nadir hadisə idi.
Bir dəfə “Gündəlik Azərbaycan”ın yaxşı tiraj yığdığını söylədi və məni təbrik etdi. Dedim:
- Sabir müəllim, mən bildiyimə görə, sizin roman 3 milyon tirajla çap olunub. Biz isə cəmi 10 min tiraja qalxmışıq.
Lakin bunun üzərində dayanmayaraq yenə bizim qəzetin maraqlı olmasından danışmağa başladı, xeyli təriflədi bizi. Bu günlərdə isə bilmişəm ki, yazıçının “Dalanda” romanı 3 milyon tirajla deyil, 3 milyon 500 min tirajla çap edilib, mənsə özü ilə söhbətdə onun kitabının nə az, nə çox - düz 500 min tirajını “yemişəm”. Lakin Sabir müəllim bunu mənə nə irad tutmayıb, nə də yanlışımı düzəltməyib. Halbuki mənim səhvimi görməmiş deyildi...
Bu qədər tərbiyəli, bu qədər vicdanlı, şəxsi uğurlarının fövqündə duran bir adamın itkisi ağırdır. Ruhu şad olsun! Satılmadı, yaltaqlanmadı, hiyləyə əl atmadı, özünü gözə soxmadı, eyni zamanda qorxmadı. Azərbaycanın dərdləri ilə yaşadı, bu dərdləri dilə gətirməkdən çəkinmədi, heç vaxt jurnalistlərin çoxlarının qaçdığı suallarına cavab verməkdən qaçmadı. Həmişə üstünə getdik, həmişə də çəkinmədən düz sözü dedi. O cür böyük qəlbi olan bir adamın ürəyində təlatümlər olması, o cür ürəyin parçalanması heç də təəccüblü deyil, amma bu ölkənin elə adamlara çox böyük ehtiyacı var. O cür adamın bu ölkənin tarixində şərəfli bir yer tutmağa tam haqqı var.
Ölüm xizək kimi sürüşəndə
Dünən axşam “Yeni Müsavat”ın xəbər lentinə baxdım. Hər yanda ölüm xəbər idi. Elə bilməyin ki, bütün xəbərlər Daşkəsəndə hərbçilərin ölümü ilə bağlı idi. Xeyr, buyurun oxuyun, ölüm və ölüm iyi gələn xəbərlərin bir qismi:
BDU-nun I KURS TƏLƏBƏSİ İNTİHAR EDİB [16:12]
YOL QƏZASINDA BIR AİLƏNİN 3 ÜZVÜ HƏLAK OLUB [16:08]
VƏHHABİ OLDUĞU DEYİLƏN ŞƏXS İNTİHAR EDİB [12:12]
TƏCRİDXANADA İKİ MƏHBUS AĞZINI TİKƏRƏK ACLIQ AKSİYASI KEÇİRİR [09:40]
BAKIDA BEŞMƏRTƏBƏLİ BİNADA PARTLAYIŞ: 2 YARALI [09:21]...
Hətta Naxçıvanda bir molla iki mollanı bıçaqlayaraq öldürüb... Hamısı ölkədəki başıpozuqluğun, talanın, qanunsuzluqların, ədalətsizliklərin doğurduğu hallardır. Nəzərə alın ki, bu şəraitdə cəmiyyətlərin mənəvi sağlamlığı da sarsılır, ölür. Mənəvi sağlamlığı itirmək mənəviyyatın ölümüdür və özü ilə hər cür faciə gətirir. Bu, oksigeni azalan qapalı sığınacaqda insanların başını itirməsinə bənzəyir.

302 dəfə baxılıb