LİDERLƏR BİR DAİRƏDƏ YARIŞSINMI

	30 iyul 2010


Onlayn ictimai-siyasi qəzet

Şahvələd ÇOBANOĞLU

LİDERLƏR BİR DAİRƏDƏ YARIŞSINMI?

Biz real müxalifətin parlament seçkilərinə gecikmədən, durmadan hazırlaşmasını, indidən birləşərək bir yumruq kimi səfərbər olmasını, 2010 seçkilərini ölkənin xeyrinə olan bir şansa çevirməsini arzulayır, bir neçə aydır bu haqda yazılarla çıxış edirdik. Əlimiz ağzımızda qaldı və dediyimizə peşman olmaqdayıq.

Nə baş verdiyini anlamaq olmur. Artıq bəzi hərəkətlər seçkini zərli sinidəki xonça kimi hakimiyyətə bəxş etməyə bənzəsə də, bu addımların arxasında nələr durduğunu yazmağa tələsmirik. Obyektivliyimizi qorumaq üçün, ictimai maraqlar naminə, bəlkə də bəzi maskaların tam və birdəfəlik yırtılması üçün səbirliyik. Geriyə baxıb bəzi keçmiş hərəkətləri də müqayisə edir, şok yaradan təəssüratlara düşürük.
Bu fikirlər müəmma toxumu səpmək üçün deyil, sadəcə, müxalifətin seçkini necə dəyərləndirməsi, zəruri görünən birliyi və s. məsələlər barədə yaranan ilkin təəssüratlardır. Amma 2010 ən azı aydınlaşma ili olacaq, kimin kim olduğunu bu il hökmən biləcəyik...
“Bir dairə - bir lider” istəklərinin alt üzü
Birlik ideyasının üzərində dayana bilməyən müxalifət liderləri “bir dairə - bir lider” prinsipi ilə dərhal razılaşırlar. Bu, o deməkdir ki, onlar dairədə müxalifətin vahid namizədi olacaqlar. Heç kim narazı səsləri parçalamayacaq, hamısı liderlərin olacaq. Başqa sözlə, həmin dairədə müxalifət birləşəcək. Bunun başqa adı yoxdur. Adama deyərlər ki, müxalifətin bir-birinə dəstəyi, səslərini birləşdirməsi vacibdirsə, bu prinsip niyə başqa dairələrə, başqa namizədlərə də tətbiq edilməsin. Bu prinsipin adını nə qoyursunuzsa qoyun, bu, birlik modelidir, amma nədənsə yalnız liderlər üçün nəzərdə tutulur. Yenə adamdan soruşarlar ki, liderlər namizəd olan dairədə niyə hamı bir olmalı, başqa dairələrdə isə müxalifətin müxtəlif namizədləri bir-biri ilə yarışmalıdır...
Bir yandan da deyirlər birlik ideyası aktual deyil, mümkün deyil və s. Fikir verin, liderlər ən güclü namizədlər sayılır. Onları daha da gücləndirmək vacibdirsə, digərlərini niyə gücləndirmirlər? Müəmmalı deyilmi?!
“Bütün liderlər bir dairədə”
Məsələni bu cür görüb adamın ürəyindən tamam əks model irəli sürmək keçir. Cənablar, bəlkə bütün liderlər bir dairədə yarışsınlar?! Nəhayət, biz də bilək ki, xalq kimi seçir, kim kimdən üstündür, ən güclü lider kimdir. Heç olmasa bəzi mübahisələr aradan qalxardı...
“Yaramır” - deyəcəksiniz... Bilirik bunu! Amma unutmayın ki, müxalifətin hər dairədə vahid namizəd irəli sürməsi prinsipinə qarşı gedən hər bir adam ən adi məntiqə qarşı çıxır.
ADP-çi Həsrət Rüstəmovun qəzetdən maraqlı bir yanaşmasını oxudum. O hesab edir ki, partiyaların birinci şəxslərinin dairələrindən başqa liderlərin namizədliyini irəli sürməməsi məsələsini liderlərin müzakirə aparması qeyri-etikdir: “Belə çıxar ki, liderlər toxunulmaz insanlardır, liderlərə yalnız özlərinin seçilməsi önəmlidir. Ona görə də təkcə birinci şəxslərin yox, müxalifətin əsasını təşkil edən siyasətçilərin bir-birinə alternativ olmaması məsələsi müzakirə edilməli və anlaşmalar olmalıdır. Bu həmin şəxslərin xeyrinə olardı”.
Həsrət bəy haqlıdır. Amma tam haqlıdırmı? O da daha düzgün prinsipi müxalifətin əsasını təşkil edən siyasətçilərə qədər genişləndirir, amma yenə müxalifətin bütün namizədlərinə aid etmir.
Niyə? Başqaları çox imkanlıdır, çox güclüdür, buna ehtiyacları yoxdur bəlkə? Bəlkə onlar ikinci dərəcəlidir?

488 dəfə baxılıb