MƏRDANOV RAMİZ MEHDİYEVİ DƏ MƏHKƏMƏYƏ VERƏCƏKMİ

	13 fevral 2012


Onlayn ictimai-siyasi qəzet

Şahvələd ÇOBANOĞLU

MƏRDANOV RAMİZ MEHDİYEVİ DƏ MƏHKƏMƏYƏ VERƏCƏKMİ?

O gün səhər qəzetlərə baxarkən gözlərimə inanmadım. Misir Mərdanov növbəti tənqidçisini - son vaxtlar təhsil haqqında öz yazıları ilə diqqət çəkən pedaqoq-alim Əlövsət Osmanlını məhkəməyə verdirib həbs etdirmək istəyir. Bu adam mətbuatı susdurmaq niyyətindən əl çəkmir və orijinal üsul tapıb. Bundan əvvəl də Etibar Əliyevi bir neçə dəfə məhkəməyə verdirmişdi. Həm də kimin əli ilə? Birinci dəfə direktorların, ikinci dəfə rüşvətə görə həbsdə yatmış adamın əli ilə.

Misir müəllim yazıya görə adam tutdurmaqla təhsil haqqında tənqidləri dayandırmaq istəyir. Başqa sözlə, mətbuatda təhsil haqqında yazı və fikirlərin qarşısını almaq istəyir. Əslində bu əməl mətbuata qarşı yönəlib və hara fırlatsan da söz azadlığına qarşı basqıdır. Təhsil spesifik sahədir, təhsildən yazan jurnalist isə bu sahənin ekspertləri olmadan yaza bilmir. Çox vaxt isə ekspertlərin özlərinin danışması və yazması lazımdır. Reallıq isə budur ki, mətbuata açıq danışmaqdan çəkinməyən belə ekspertlər çox azdır. Etibar Əliyev, Rövşən Ağayev, son vaxtlar Əlövsət Osmanlı. Olsa-olsa bu siyahıya bir neçə adamın adını da salmaq mümkündür.
Əlövsət Osmanlı isə həm də öz yazıları ilə çıxış edən bir ekspertdir. Maraqlı və uzun yazılar yazır, özünəməxsus yazı üslubu ilə təhsilin problemlərinə aid heç kimin toxunmadığı məqamları şərh edir. Mətbuatda bir təhsil təlatümü yaratmağa nail olub və açığı bizim məktəb dərdlərimizə görə Misir Mərdanovu ifşa etməyi bacarır. Həmişə də obyektivdir, səviyyəlidir. Maraqlıdır ki, əks tərəf onun yazılarına cavab verə bilmir, cavablarda onun şəxsiyyətinə toxunmaqdan uzağa getmir. Elə bu acizliyin nəticəsidir ki, onu yalnız məhkəmə ilə susdurmaq istəyirlər...
Əslində canlı efirdə Misir Mərdanovla üz-üzə dayanıb naziri tənqid etməsindən sonra Osmanlı biz jurnalistlərin diqqətini çəkmişdi. Şəxsən mənə bu qarşılaşma o qədər müsbət təsir etmişdi ki, zəng edib onunla tanış oldum. Onsuz da illərdir bu adamı görmək istəyirdim. Səbəbini də gizlətməyəcəyəm. Akademik Azad Mirzəzadəyə bir qrup alim adı daşıyanlar tərəfindən haqsız hücumlar edəndə, biz onun müdafiəyə qalxmışdıq. O zaman gözləmədiyimiz halda Əlövsət Osmanlı adlı bir alim də onu müdafiə etmişdi. Əlövsət bəylə görüşüb fikirlərini bir daha dinlədikdən sonra isə düşüncələrini ictimaiyyətə çatdırılmasını zəruri saydığımı ona dedim. Mətbuatın yaxşı bir ekspert qazanacağına əmin idim.
Maraqlı bir məqam var. Bu arada bəziləri bizə deyirdi ki, Əlövsət Osmanlı maraqlı tərəfdir, onun öz maraqları var. Misir Mərdanovun ətrafı da bu fikir yayırdı. Amma bunun da məsələyə dəxli yoxdur. Bəli, mən elə bu cür də deyərdim...
Birincisi, Əlövsət Osmanlının fikir və yazılarının ictimai faydası danılmazdır və bizim ürəyimizdən xəbər verir. İkincisi, bu yazı və fikirlər doğrudur, həqiqəti əks etdirir. Üçüncüsü, heç kim unutmasın ki, müasir demokratiyada maraq qrupları və yaxud konflikt qrupları deyilən bir anlayış var. Mətbuat məlumat almaq, debatlar və ictimai müzakirələr yaratmaq, proseslərin mahiyyətini açmaq üçün bundan istifadə edir və bu, dünyanın mütərəqqi ənənələrindən biridir. Əks halda kim danışsın? Elə məsələlər var ki, ondan məhz bu qruplar danışmalıdır və yalnız bu qruplar danışır.
Nəhayət, niyə bu ölkədə başqalarının marağı olmalı deyil? Adam görəndə ki, onun səviyyəli dərsliyini qoyub 1000 səhvi üzə çıxan biabırçı dərsliyi qəbul edirlər, məgər susmalıdır? Niyə susmalıdır? Nədir ki, deyəcəklər sənin marağın var?! Məncə, bu halda susmaq pis olardı. Əlövsət Osmanlının həmişə “dil tapıb işləmək” şansı olub və şəxsən susub buna getməsi biabırçılıq sayılardı.
Misir Mərdanov Əlövsət Osmanlını Dərslikləri Qiymətləndirmə Şurası deyilən bir qurumun əli ilə məhkəməyə verib. Bəs bu adamlar dərsliklərə baxıb nə düşünürlər? Uşaqlarımız bu dərsliklərdən özləri səhv tapır.
Bəli, Misir Mərdanovun müəllifi olduğu bir dərslikdə şagirdin tapdığı səhv barədə nə vaxtsa yazmışdım. Bəs Ramiz Mehdiyevin tənqidləri necə olsun? Bəs niyə Ramiz Mehdiyevin yazısından sonra Mərdanov bir çox dərsliklərin tezliklə əvəzlənəcəyini demişdi? Niyə Ramiz Mehdiyevi məhkəməyə vermirlər?
Bunlar öz yerində. Əsas məsələ odur ki, Misir müəllim qəzetləri susdurmaq istəyir.

584 dəfə baxılıb