ÇEKİSTLƏRİN SƏVİYYƏSİ

	25 may 2012


Onlayn ictimai-siyasi qəzet

Zamin HACI

ÇEKİSTLƏRİN SƏVİYYƏSİ

Dünənki sayımızda QHT-lərə Dövlət Dəstəyi Şurasının pul ayırdığı layihələri tənqid eləmişdim, bu münasibətlə şuranın icraçı direktoru Fərasət Qurbanovdan məktub almışam: “Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyələşdirdiyi layihələrə göstərdiyiniz diqqət bizim tərəfimizdən yüksək qiymətləndirilir.

Məşhur köşə yazarı olaraq yazınızdan bir daha aydın göründüyü kimi, digər donorlardan fərqli olaraq, şura Azərbaycanda yeganə donor təşkilatıdır ki, maliyyə yardımı müsabiqəsini obyektiv və şəffaf təşkil etmişdir. Şuranın maliyyə yardımı müsabiqəsinin yekunları və maliyyələşdirilən layihələr barədə fikirlərinizə görə Sizə öz təşəkkürümüzü bildiririk”. Mən də minnətdaram, hər halda, ilin-günün bu vaxtında hər hansı dövlət qurumundan tənqiddən sonra bu cür məktub almaq nadir hadisədir. Ümid edirəm ki, şura mənim yazımı jurnalistlər üçün müsabiqəsində nəzərə alacaqdır, olmayan yerdə biz də dövlətdən beş-on manat qazanarıq.
Mən “ilin-günün bu vaxtı” ifadəsini havadan yazmadım, hazırda media-hakimiyyət münasibətləri olduqca gərgindir. Rauf Arifoğlunu Milli Təhlükəsizlik Nazirliyinə çağırıb danlayıblar ki, nə üçün o, öz qəzetində Eynulla Fətullayevin açıqlamalarına yer verir. Guya bu, Elmar Hüseynovun qətlinin istintaqına mane olurmuş. Beş ildə hansı istintaq aparılıb ki, biz jurnalistlər də ona mane olaq? Ortada yalandan iki nəfərin adı var, vəssalam. Elə bu günlərdə Eynullanın atası Emin Fətullayevin evinə hədə-qorxu zəngləri edilməsi də bəzilərinin necə başını itirdiyini göstərir. Artıq açıq diktaturaya gedirlər. Rauf bəyin ardıyca başqa jurnalistlər də MTN-ə - əslində “NKVD” qılaflı bir idarəyə - çağırılır, hamısına Elmar Hüseynovun qətlindən danışmaq, yazmaq qadağan edilir. Politoloq Ərəstun Oruclunun adından yalançı internet bloq yaradılması, orada Elmar Hüseynovun xanımının təhqir edilməsi də bu iyrənc kampaniyanın tərkib hissəsidir. Bu “siyasətin” anlamı budur: “Biz sizi öldürək, ancaq siz danışmayın”.
Rauf Arifoğlu MTN zabitinin onunla çox kobud, qışqıra-qışqıra danışdığını qeyd edib. Eynilə “NKVD” üslubudur. Yapokratiyanın məxfi xidmətindən gerçək, sivil məxfi xidmət zabitinə yaraşan elitarlıq gözləmək əbəsdir, bu saat Eldar Mahmudov oraya xeyli “abaxeyis” yığıbdır. Ömründə iki kitab arası açmayanlar bizim milli təhlükəsizliyimizi “qoruyurlar”.
Milli təhlükəsizlik nazirinin müavini Əli Şəfiyev dünən bir tədbirdə deyib ki, xarici kəşfiyyata işləyən 25 nəfəri zərərsizləşdiriblər. Ancaq adam məsələni tam demir. Söhbət ondadır ki, həmin 25 nəfərdən düz 16-sı hərbçi olubdur. Əgər bir ildə bu qədər əsgər vətəni xarici kəşfiyyata satırsa, onda siz bu vətəni nə kökə saldığınızın fərqindəsinizmi, yoldaş yapokratlar və onların milli təhlükəsizliyinə cavabdehlər? 25 casus tutmaqla fəxr eləməyin, utanmaq lazımdır. O insanları casusluğa vadar edən səbəbləri siz yaratmısınız. Vətəni beş qəpiklik eləmisiniz.
Deputatxana spikeri Oqtay Əsədovun çıxışlarını dinləyəndə istər-istəməz MTN zabitinin kobudluğunu anlayırsan. Qabaqda gedən bu olandan sonra... Ta nə deyəsən? Buyurun, görün Əsədov “Washington Post”da prezident İlham Əliyevi tənqid edən jurnalisti necə adlandırır: “Prezidentimiz hər gədənin sözünə fikir vermir... Prezidentimizin öz yolu var, o, nə sağına baxır, nə soluna”. Nə yaxşı bunu su idarəsindən çıxardıblar, yoxsa indi camaat Allah bilir nə içirdi. Yenə baxanda deputatxana spikerliyi daha ziyansız vəzifədir.
Yeri gəlmişkən, həmin amerikalı jurnalistin yazısına indiyəcən Prezident Administrasiyasından Əli Həsənov, bəzi deputatlar fikir bildiriblər. Belə çıxır ki, Əli Həsənov hansısa gədənin yazısını ciddiyə alıbmış.
Səviyyə ayrı şeydir...

1708 dəfə baxılıb