HAMIYA ÇİRKİN OLSAM DA...

	06 sentyabr 2010


Onlayn ictimai-siyasi qəzet

Sevinc TELMANQIZI

HAMIYA ÇİRKİN OLSAM DA...

Şikayətlənmək, umu-küsü etmək, minnət qoymaq ən asanıdır. Belədə insan özünü mənən sakitləşdirir bir növ. Daha çox da məsuliyyətdən uzaqlaşırsan, kimisə içinə düşdüyün duruma ortaq edirsən və sair və ilaxir. Söhbətə çox uzaqdan başladığımın fərqindəyəm. Amma misalları sadaladıqca niyə belə giriş verdiyimi anlayacaqsınız.

Siyasətlə işim olmaz, lap səmimi desəm, bu sahədən başım çıxmaz. Mətbuatda çalışdığım illər uzunu da siyasətçilərin üzünü siyasətdən uzaq rubrikalarda görmüşəm. Amma buna baxmayaraq, siyasətçi sevgisinin nə demək olduğunu Türkiyədə CHP lideri Dəniz Baykalın siyasətdən gedəcəyi ilə bağlı verdiyi açıqlamadan sonra gördüm. Adama “getmə, qal” deyərək yalvaranlardanmı danışım, evinin önündə aclıq aksiyası keçirənlərdənmi, “sənsiz siyasət siyasət deyil” deyə piketdə qışqıranlardanmı? Təbii ki, bu da bir siyasi gedişə bənzəyir. “Gedərəm ha” taktikasını millət olaraq bizlər də çox görmüşük. Gedəcək-filan da deyil Baykal. Onun hərəkəti daha çox anasından küsüb yemək yeməyən uşağın jestinə bənzəyir. Ki, hamı yatandan sonra uşaq mütləq mətbəxə qaçıb, qarnını doyurur. Amma qarnını doyurana kimi ata-anasının onu nə qədər çox sevdiyini də öyrənmək istəyir. Baykal da belə etdi və təkrarlamağı sevdiyimiz o xalq sevgisini gördü.
Elə eyni günlərdə bizdə də “dəqiq, vicdansız və qərəzsiz” telekanalın ortağı xalqa bəyan etdi ki, “bizdən ummayın, biz sizə bu haqqı verməmişik”. Buna əsas olaraq da xalqın 2006-cı ildə - telekanal bağlananda onlara dəstək vermədiyini göstərdi. Öz aləmində haqlı ola bilər, şübhəsiz. Baxmayaraq ki, elə bu hadisədən üçcə il əvvəl “vandal” adını qoyduğu xalqdan dəstək gözləməsi bir o qədər anormal görünür. Amma əlahəzrət insaf deyir ki, onun sözündə də az-çox həqiqət payı yox deyil. Biz millət olaraq çox az halda hansısa məsələyə görə bir araya gəlib etiraz edirik. Demirəm, müxalifətdən gedən Etibar Məmmədovun, iqtidara keçib, üz görməyən Tahir Kərimlinin qapısında aclıq aksiyası keçirək. Amma bu adamların hər birinin arxasında 2-3 min adam varsa, onun ölüsü 200-300 nəfəri nəsə bir addım atsın da. Yəni hərdən qosqoca partiyaların etiraz akisyasına baxırsan, say baxımdan gəzintiyə çıxan veteran “ordusunu” xatırladırlar. Niyə insanlar ancaq yaxşı gündə vaxtilə bəh-bəhlə təriflədikləri siyasətçilərin yanında olur? Doğrudur, “yaxşı gündə, pis gündə..” deyə başlayan andlar daha çox evlilik zamanı verilir. Amma siyasi bağlılıq da başqa növ nikahdır, əqidə nikahı...
Türkiyədən başladım, elə ordan da davam edim. Baxmamış olmazsınız, hələ aylar öncə telekanallarda 2 ibtidai sinif şagirdinin öz yoldaşlarına necə ağıl verməsi ilə bağlı rolik fırlanırdı. Demək, biri sinif nümayəndəsi, o biri sinif nümayəndəsinin köməkçisi olan iki qızcığaz dərsə qulaq asmayan, müəllimi incidən sinif yoldaşlarına müraciətlə elə təsirli danışırdılar ki, adamın gözü yaşarırdı. Qızlardan biri atasının çox kasıb olduğunu, onları oxutmaq üçün binada gözətçilik etdiyini deyir, cırıq ayaqqabısını göstərir, varlı dostlarının isə atalarının puluna baxmayaraq, dərs oxumadıqlarından şikayətlənirdi. Özü də ağlaya-ağlaya... Bunu cib telefonu ilə çəkən müəllimsə yaşananları bütün telekanallara yayandan sonra olanlar oldu. Qızlardan birinin məktəb xərclərini bir xeyirxah öz üzərinə götürdü, geyim xərclərini o biri xeyirxah... Sözügedən məktəb ən müasir kompüterlərlə təchiz olundu, təmirlər, yardımlar da ki, öz yerində...
Bunu nəyə görəmi xatırladım? Çünki “qonşunun uşaqları” da lazım gələndə hansısa formada öz haqq səslərini qaldıra bilirlər. Bizdə hansı kasıb balası belə bir şeyi 70 milyon demirəm, 70 nəfər arasında etiraf edər? Halbuki elə hər şey o yaşlardan başlayır. Məktəbli özünün elementar hüquqları uğrunda elementar formada qovğa aparır və qazanır. O, gələcəkdə də özünün pozulmuş başqa haqlarına görə bu cür şivən (bəli, məhz şivən - çünki başqa cürəsi kəsərini itirib - S.T.) qoparacaq.
Çox sevdiyimiz xalq mahnısında necə deyir? “Hamıya çirkin olsam da, yarıma göyçək olaydım...” Yəni hər siyasətçinin, telekanalın... nə qədər çirkin olsa da, sevənləri (ən azı bunu iddia edənləri) tərəfindən müdafiəyə ehtiyacı var. Qalanlarının gözündə çirkin də olmaq olar.

418 dəfə baxılıb