MANYAKA HAQSIZLIQ ETMƏYƏK

	06 sentyabr 2010


Onlayn ictimai-siyasi qəzet

Sevinc TELMANQIZI

MANYAKA HAQSIZLIQ ETMƏYƏK

Deyilənə görə, “o manyak” yenə peyda olub. Özü də biz tərəfdə, lap konkret desəm, yaşadığım qəsəbədə. “Niyə o manyakdan bizdə yoxdur” deyə paxıllanmağınızı qəzet səhifəsindən duyur kimiyəm. Və belə hisslər keçirməkdə haqlı olduğunuzu da düşünürəm. Çünki bu situasiyanın şanslı tərəfləri az deyil...

Hələliksə məlumatın tragikomik yönləri barədə. Demək, ötən gün telekanallar Bakının içi mən yaşadığım qəsəbəsi də daxil olmaqla, bir neçə bölgəsində peyda olan manyakın fotorobotunu təqdim etdi və əlamətlərini sadaladı. Ortaboylu, qarasaç, yekəqarın, bığlı... Azərbaycan kişilərinin 70 faizinin əlamətləri elə sadalanan kimi olduğundan, durumu siz təsəvvür edin. Küçədə-bacada hamı bir-birinə potensial manyak kimi baxmağa başlayıb. Harada qarasaçlı, yekəqarın, bığlı kişi görürsənsə, nifrət dolu baxışlarını ona yönəldirsən. Adamın suçsuzkən suçlu duruma düşməsi situasiyası bax belə yaranır.
Keçək şanslı olduğumuz tərəflərə. Xəbər çıxandan bəri valideynlər uşaqlarını bayıra daha az buraxır. Demək ki, evdə onlarla daha çox maraqlanır, sevgi, qədir-qiymət söhbəti də təbii ki, artır. Məhlələrdə sakitçilik hökm sürür, qonum-qonşular arasında məhrəmlik, mehribançılıq da öz yerində. Dünənə qədər bir-birinə zorla salam verən qonşular artıq can bir qəlbdə, görüşən kimi hal-əhval tutmaqda, təhlükəni eşidən “yaxından-uzaqdan gələn” qohumlar hər gün adamı yoluxmaqda. Xəyali bir manyak insanların bəlkə də illər boyu başarmadığı bir işin öhdəsindən gəlib. Azdır?
Və situasiyanın ən ləzzətli yönü. Telekanalları izləyənlər bilir ki, sözügedən xəyali manyakın işıq, qaz pulu yığmaq adı ilə evlərin qapısını döydüyü bildirilib. Əlində qara bir bloknot tutur, guya sayğacı yoxlamaq istədiyini deyir və qapını açan kimi ... bummm. Neçə gündür biz tərəfdə işıq-qaz pulu yığanların günü qara olub. Adamlar rəsmən əzab çəkirlər, təsəvvür edin. Üzlərinə bir Allahın bəndəsi də qapı açmır. Hər gün bloklarda “ay bacı, vallah mən manyak deyiləm”, “atam-anam, bu qaz pulunu ödəyin də, heç mən manyaka oxşayıram?” deyə zarıyan Bakqaz işçilərinin naləsi, eləcə də onlara verilən “sübut elə ki, manyak deyilsən” kimi mırt cavabların yüzü bir qəpikdən olur. (Təəssüf ki, biz tərəflərdə hələ də qaz pulu kustar üsullarla, “mən ölüm-sən öl” prinsipi ilə yığılır, yəni, qəbzsiz-filansız-S.T.) Dedim axı, biz şanslıyıq. Sözün bütün mənalarında. Canın bir neçə ay qaz pulu verməkdən qurtulur. Neyləyək, həyatımızı küçədən tapmamışıq ki?
Mən də öz payııma sevinirəm. Bir anlıq düşünün - manyak qazpulu yığmaq adı ilə qapıya gəlir, sən onun manyak olduğunu bilir və qapının arxasından da olsa, söhbətə çəkirsən. Bu arada ilin bomba projesini də yapmaq olar. (Bu arzumu eşidən anamın mənə dediyi ilk söz “pis niyyət” oldu-S.T.) “Manyakla ilk və son müsahibə...” İnşallah, mənim yox, manyakın son müsahibəsi təbii ki...
Girişdə də dediyim kimi, bunlar söhbətin gülmək üçün yazdığım qismidir. Adətən qaranlıq meşədə gəzən adam neynir? Qoxmamaq üçün hündürdən mahnı oxuyur. Bizimki də elə o hesab. Rusun sözü ilə desək, mən qorxaq deyiləm, amma qorxuram. (ya ne trus, no ya boyus - tərcüməsi belədir - S.T.) Biz balaca qızları Dəvəçili manyak tərəfindən qətlə yetirilən bir məmləkətin insanlarıyıq. Yəqin sözügedən hadisəni xatırladınız - qızlar öldürüldü, olay böyüdü, 3 qatil qardaşa iri-iri məmurların himayədarlıq etdiyi ortaya çıxdı. Qurbanlar torpağın altında, qatillər “dütdülü” cəzalarla türmədə... Yəni göz gördüyündən qorxar. Amma “”analoqu olmayan inkişafla irəliləyən" ölkəmizin şanlı polisi bir neçə həftədir, Bakı manyakını tapa bilmirsə, adam şübhəyə düşür. Məqsəd nədir? Qorxan əhalini elə bu hissin köməyilə hökumətin ətrafında daha sıx birləşdirmək? Zatən birləşəcəkləri qədər birləşiblər, bundan artığı ürək sıxıntısı yaradar.
Mitinqlərdə-piketlərdə insanları döymək üçün istifadə edilən alətlər, sonradan elə həmin insanları təsbit etmək üçün yüksək texnologiyalı gizli kameralar... haradadır? Doğrudanmı 21-ci əsr Azərbaycanında bir manyakı tapıb təsbit etmək bu qədər çətindir? Bir cüt Məcidova bacıları, eləcə də başqa bacılar “əjdaha” üçün bəs etmədimi?
Bu çağırışa laqeyd qalanlar varsa... Lütfən heç kim manyaka haqsızlıq etməsin. Gerçək manyakları başqa yerdə axtarmaq lazımdır... Harada? Nə demək istədiyimi anladınız...

345 dəfə baxılıb