GÖRMƏMİŞİN KƏŞFİ OLDU...

	06 sentyabr 2010


Onlayn ictimai-siyasi qəzet

Sevinc TELMANQIZI

GÖRMƏMİŞİN KƏŞFİ OLDU...

Bir günümüz kəşfsiz keçmir. Allah bu alimlərin balasına dəyməsin. Adamlar sanki səhər oyanan kimi əl-üzlərini yumaq üçün hamama yox, elə laboratoriyalara cumurlar. Amma daha bu qədər də yox da. Vallah, hər şeyin şiti-şoru çıxıb. Bunların sayəsində adam başını qaşımağa da qorxur.

Heç uzağa getmirəm - elə dünən nəşr olunan iki ayrı qəzetin sonuncu səhifəsində bir-birinə bənzər iki elmi nəticəyə diqqət kəsildim. Qəzetin biri yazır ki, tərləmək adamın ağlını azaldır. O birisi isə sanki tamam fərqli bir kəşfi açıqlayır - qarpız adamın ağlını artırır, yaddaşını gücləndirir. İgidsən indi baş aç.
Yay aylarında, yəni istidən buxarlanıb tərləyəndə adamın yadına ən əvvəl qarpız düşür. Düzdümü? Düzdür. Tərləyərək azalan ağlı dərhal qarpız yeyib artırmaq mümkünsə, Allah kəssin o ağlı.
Və ya “depressiv qadınlar daha çox yaşayır” kəşfi. Amma ürək ağrısının insanı tezliklə o dünyaya müsafir etdiyi gerçəyi də var. Hansı kəşf düzdü, hansına inanaq? Sarışın qadınlar ağılsızdır - bir kəşfdə belə deyilir. Başqa birində isə qarabənizlərin kişilərin həyatını cəhənnəmə çevirdiyi önə sürülür. Bu, təxminən qırxayağa hansı ayağını birinci atdığını soruşmaq kimidir - çaşır və yıxılır. Zarafat deyil, hətta ayaqyoluna gedərkən ilk olaraq hansı ayağının birinci atılmasının da səbəbi çıxıb ortaya. Hər şeyə dərin-dərin mənaların yüklənməsi, ondan teoriyalar uydurulması... Düzü, cansıxıcı hal alıb.
Məni qınamayın, amma bu elmi kəşflərlə baxıcı-görücü, cindar-falçı proqnozları arasında heç bir fərq görmürəm. Falçıya gedən adamların hər birinə təxminən eyni şeyləri deyirlər - düşmənin çoxdur, yaxşılıq edirsən, amma əvəzini görmürsən, itiyin tapılmır, evinizin ruzisi yoxdur və sair və i. a. Bizlərdə də maşallah, özündən müştəbehlikdən, həyatdan narazılıqdan bol nə var? Hamı özü barəsində düşünür ki, düşməni çoxdur, hamıya yaxşılıq etsə də əvəzində pislik görüb. Üstəlik, ilin-günün bu vaxtında kim öz maddi durumundan razıdır ki?! Hamı evinin ruzisinin qaçdığı qənaətindədir. Gündə bir inomarka “mələdən” varlıdan da soruşsan, deyəcək ki, bu maşınları imkansızlıqdan tez-tez dəyişir.
Haqlı olduğumu gördünüzmü? Ona görə də deyirəm ki, bu alim tayfasının gündə çıxardığı pəstahlara çox da baş qoşmayın. “Keçəlin dərmanı olsa, öz başına yaxar” deyiblər. Heç keçmişdə bu qədər kəşf, yeni-yeni texnologiya xarüqələri yox idi. Amma əvəzində insanlar daha sağlam yaşayırdı, ölümcül xəstəliklər yaxamızdan yapışmamışdı, bir sözlə daha xoşbəxt idik. Zarafat deyil, bir il əvvəl aldığımız mobil telefon bir il sonra muzey abidəsi statusuna düşür. O qədər köhnəlir yəni... Paltaryuyanlar, kompüterlər də onun kimi. Amma yeni-yeni modellər çıxdıqca onların yaratdığı fəsadlar da gün keçmədən artır. Guya dünyada ağıllı, bilgili insanların sayı artıb. Bəs elə bu kateqoriyaya daxil olanların depressiyadan əziyyət çəkmələrinin səbəbi nə? Gördünüzmü, çomağın iki başı var - qeyd-şərtsiz. Odur ki, çomağa çox da baş qoşmayın...
Bax, məsələn, mən alim deyiləm. Heç tüstüsü çıxan kolbalarla dolu laboratoriyam da yoxdur. Amma elə indicə, əlüstü bir neçə “kəşf”ə mübarək imzamı atdım. Getdik...
Simasını tez-tez dəyişən adamlar sonda varlı olurlar.
Hər şeyi peysərə verənlər digərlərindən daha çox yaşayır.
Uzunömürlü məmur olmaq üçün kar, kor, hətta mümkünsə lal olmaq məsləhətdir. Səsi olmadığı halda “güclü sənətçi” ünvanına layiq görülmək üçün “mahir ovçu” olmaq lazımdır. Gördünüz, heç də çətin deyilmiş... Siz siz olun, alimlərin kəşfinə qulaq tıxayın. Həyatınız öz “kəşflər”inizin əlində... Bu da bir bazar günü gerçəyi olsun.
P.S. Az qalmışdı son kəşfimi unudam. Şənbə günü köşə yazan jurnalistlər fədakar, ağıllı, zəhmətkeş... olurlar. İnanmırsınız?

457 dəfə baxılıb